Abandu banene bakalengekanaya bati Abimiri ba Yehova ni dini ya muligholo. Aliwe, emyaka kulenga 2 700 kera, oMungu we kwenene mwahula abaghombe biwe mo ‘bimiri’ biwe. (Isaya 43:10-12) Erihika oko mwaka we 1931, twabya tukahulawamo Abigha b’eBiblia. Neryo busanaki mutwimya erina ly’Abimiri ba Yehova?

Erina eryo likaminyisaya oMungu wetu. Erina ly’oMungu, ni bughambu, Yehova, likabanika ngendo nene omo syo Biblia sya kera. Omo syo Biblia nene esikabindulawa munabwire, erina ly’oMungu lyabirilusibwamo, n’omo mwanya walyo babiri hiramo amena w’erimusikya nga: Mukama kutse oMungu. Aliwe, oMungu mwabwira Musa ngoko erina liwe yo Yehova. Mwamubwira ati: ‘Eri ryo rina lyaghe kera na kera.’ (Eriluayo 3:15) Omo nzira eyo, mwakanganya ngoko iye syali ng’eyindi miungu. Tutsemire kundu erihulwa omo rina ly’oMungu eribuyirire.

Erina lyetu likakanganaya omubiri wetu. Abandu bangyi ba kera, eritsuka oko Abeli, oyo wabya atunganene, mubakangania ngoko babya bikirirye Yehova. Omo myaka minene, Noa, Abrahamu, Sara, Musa, Daudi n’abandi mubayingirya omo ndeko nene eyi ‘ey’abimiri.’ (Abaebrania 11:4–12:1) Ngoko omundu anganimira oghundi oyutawite embanza oko tribinali, netu twanzire eribwira abandu b’ekwenene oko Mungu wetu.

Tukakwama enzira ya Yesu. EBiblia ikamwahulamo ‘omwimiri oyuteleghula n’owekwenene.’ (Eribisulirwa 3:14) Yesu mwabugha ati ‘mwaminyisya erina ly’oMungu’ kandi mwabya ‘akatula omwatsi w’ekwenene’ oko Mungu. (Yoane 17:6; 18:37) Busana nekyo, abigha b’ekwenene ba Yesu batolere ibahulwa omo rina lya Yehova n’eriliminyisya abandi. Ekyo ky’Abimiri ba Yehova bakayikasa erikola.

• Busanaki Abigha b’eBiblia mubimya erina ly’Abimiri ba Yehova?

• Yehova mwatsuka eribya n’Abimiri biwe oko kihugho erilwa mughulu wahi?

• Omwimiri mukulu wa Yehova nindi?