Erina Beteli omo Kiebrania ni bughambu, “Enyumba y’oMungu.” (Enzuko 28:17, 19) Erina eri litolere amanyumba awo Abimiri ba Yehova babirihimba omo kihugho kyosi, eyo omubiri w’eritula engulu mbuya akasondolibawa n’erisighikwa. Ekyaghanda Kikulu kikakolera oko biro ngulu eye kihugho kyosi ey’Abimiri ba Yehova omo muyi we New York, e Amerika, kandi kikalebereraya emibiri eyikakoleka omo syobiro nge esiri omo bihugho bingyi. Abosi abakakolera omo myanya eyi, basibwe mo kihanda kye Beteli. Bakikala n’erikolera haghuma, bakalira ebyalya haghuma, n’erigha eBiblia yo haghuma omo bughuma ng’ekihanda kighuma.​—Esyonyimbo 133:1.

Oyu ni mwanya w’embaghane oko banya Beteli abakayiherera. Oko buli Beteli, kukabya abalume n’abakali ababiriyiherera erikola erisonda ly’oMungu n’erikola emibiri y’Obwami mughulu wosi. (Matayo 6:33) Sibalipokera, aliwe bakahebawa ah’erikesya, ebyalya, n’olufranka luke olweribawatikya oko biyitawa byabo. Obuli mundu oko Beteli awite ekyo akakola; hali abakakolera omo syobiro, omo mafika, kutse aho bakalira. Abandi bakakolera aho ebitabu bikakokotibawa, kutse eryerya ebyumba, erifula esyongimba, erisugha n’erikokotya eBeteli kutse eyindi mibiri.

Abanya Beteli bakawatikaya kutsibu erisighika omubiri w’obughambuli. Ekighendererwa kikulu eky’obuli Beteli ly’erihikya ekwenene y’eBiblia oko bandu bangyi. Eky’erileberyako k’akatabu kano. Erihandikwa ly’akatabu kano lyasondolawa n’eKyaghanda Kikulu, omo nzira ye Enternete, mukatumwa omo kihugho kyosi oko bakahindula omo yindi mibughe, mukaghenda oko mashini awakahulukaya ebitabu bingyi oko ndambi nge awali oko syo Beteli, n’eryo mokatumwa omo syondeko kulenga 110 000. Omo byosi ebi, Abanya Beteli bakasighika kutsibu omubiri w’omughaso n’owerikolwa butsirilinda kwilaba eyindi, ni bughambu, omubiri w’eritula engulu mbuya.​—Mariko 13:10.

• Ni bahi abakakolera oko Beteli, kandi bakawatikibawa bati?

• Ni mubiri wahi owerikolwa butsirilinda owakasighikawa n’obuli Beteli?