Erilwa kera, Abimiri ba Yehova bakateghekanaya ehilasi hye Kiteokrasi. Abaghombe bo mughulu wosi bakakangiribawa ‘batoke erikola ndeke omubiri wabo.’​—2 Timoteo 4:5.

Akalasi k’Abapainia. Omupainia akabya abibugha omwaka mughuma omo mubiri w’obupainia, akahandikawa omo kalasi k’ebiro 6 akangakolwa oko Kisenge ky’Obwami ekiri hakuhi. Akalasi ako kateghekanibwe katoke eriwatikya abapainia baseghere hakuhi na Yehova, bakole ndeke omubiri w’erighambula, n’erilola embere omo mubiri oyu.

Akalasi k’Abatula-ngulu y’Obwami. Akalasi aka k’akabugha emisi 2; kakateghekanibawa eribegherya abapainia ababiribeghera omubiri w’obughambuli abanzire erilwa omo muyi kutse ekihugho kyabo busana n’eriya kolera ahosi aho bangatumwa. Bakabugha nga Isaya bati: ‘Ingye yono hano. Unitume.’ Eki kikakanganaya ngoko bakigha oMutula-ngulu mukulu oko bosi ababirikolera oko kihugho, ni bughambu Yesu Kristo. (Isaya 6:8; Yoane 7:29) Kundi bakahumira omo bindi biharo, litolere ibabeghera eriishi n’ebindu bike. Emibere y’abandu, obutuku, n’ebyalya byanganabya isibisosire nahake ebye wabo. Lyanganatolera ibigha eyindi mibughe. Akalasi ak’Abatula-ngulu y’Obwami kakawatikaya abaghala n’abali abatatahirye kutse eritahibwa na baghala n’abakali babo abawite miaka katikati ke 23 ne 65, babye n’emibere ye Kikristo, kandi kakabakangiriraya esyonzira esyangabawatikya erikola ndeke emibiri yosi eyo Yehova kutse endondeko yiwe yangabaha.

Akalasi k’eGileadi: Omo Kiebrania, ekinywa “Gileadi” ni bughambu “Ekirundo k’yobuminyisyo.” Erilwa oko mwaka we 1943, abamisionere kulenga 8 000 abasomire aKalasi k’eGileadi babiritumwa omo bindi bihugho batoke eritula engulu ‘oko nduli ye kihugho.’ Omubiri wabo abirileka Abimiri ba Yehoba ibakanya kutsibu. (Emibiri 13:47) Omughulu abamisionere betu bahika e Peru, sihabya n’endeko ne nguma, aliwe munabwire yiri syondeko kulenga 1 000. Omughulu abamisionere bahika e Japani, isiyiri n’Abimiri ikumi. Munabwire, yiri Abimiri kulenga 200 000. Omo misi 5 eyo bakabugha oko Gileadi, bakigha ndeke ndeke eKyinywa ky’oMungu. Abali bapainia b’embaghane kutse abamisionere abakakolera omw’irima, kutse oko syo Beteli, kutse abali omo mubiri w’omutimbo bakabirikirawa oko kalasi kano batoke erikangiribwa ndeke ndeke ngoko bangawatikya n’erisighika ndeke omubiri w’eritula engulu omo kihugho kyosi.

• Akalasi k’Abapainia kakateghekanibawa busanaki?

• Ni bahi abakabirikirawa oko Kalasi k’Abatula-ngulu y’Obwami?