Wunanzire erisondya-sondya emyatsi utoke eriminya binene oko Biblia? Hane abandu, ebindu, n’emiyi omo Biblia eyo wanzire iwaminya ndeke? Kutse wune watayibulya eKyinywa ky’oMungu nga kyanganakuwatikya kiti omo malighe waghu? Byamabya bitya, kolesaya ekibikiro ky’ebitabu ky’omo Kisenge ky’Obwami.

Muli ebyanganakuwatikya erisondya–sondya emyatsi. Wanganabya isiwuwite ebitabu byosi ebihambene n’eBiblia eby’Abimiri ba Yehova omo mubughe waghu. Aliwe ekibikiro ky’ebitabu ky’omo Kisenge ky’Obwami kirimo bitabu binene ebya hulukibawa lino-lino. Kandi mwanganabya imune esyo Biblia mina-mina, esyodikisyonere esyuwene, n’ebindi bitabu ebyangakuwatikya erisondya-sondya emyatsi. Wanganakolesya ebiri omo kibikiro ky’ebitabu ekyo embere sye mihindano kutse yabihwa. Mwamabya imune e ordinatere, yanganabya iyinemo e Watchtower Library. Eyi ni programe eye ordinatere eyirimo ebitabu byetu binene, kandi sirikalire erisondya-sondyamo emyatsi, ekinywa, kutse ehandiko.

Ni ky’omughaso oko bakolo omo muhindano Omubírí n’Amaisa w’oMukristu. Wanganaghenda omo ekibikiro ky’ebitabu ky’omo Kisenge ky’Obwami omughulu ukatayarisaya omukania waghu. Omulebererya w’omuhindano Utumishi na Maisha ya Mukristo (Omubírí n’Amaisa w’oMukristu) yw’akimanira ekibikiro ekyo. Yukaminya ebitabu ebya lino-lino nga bine omo kibikiro kandi nga binatondirwe ndeke. Iye kutse oyukakwighisaya eBiblia banganakukangania ngoko wangabana omwatsi owo ulaghireko. Aliwe siwuhamulirwe eritwala ekitabu ekiri omo kibikiro ekyo ehihya ly’Ekisenge ky’Obwami. Kandi tutolere itwateya ebitabu ebyo n’eritendikwararya mubyo.

EBiblia yikabugha yiti eribana ‘eriminya ly’oMungu,’ tutolere itwasonda lyo ‘ng’ebindu bibisirwe.’ (Emisyo 2:1-5) Ekibikiro eki kyanganakuwatikya eritsuka erisondya-sondya emyatsi omo bitabu.

• Ni byahi ebiri omo Kibikiro ky’Ebitabu ky’omo Kisenge ky’Obwami ebyangakuwatikya erisondya-sondya emyatsi?

• Nindi yo wangakuwatikya erikolesya ekibikiro ky’ebitabu?