N’omo twangalaba omo musitu, n’omo obutuku bwangatsanda, tukayikasa tuhike oko mihindano yetu obuli yenga. Amalighe w’ebiro byosi kutse eriluha sibirileka itumbya eriyahindana n’abalikyetu. Ekyo kikatuwatikaya kiti?

Tukayowa ndeke. Akakania oko bandu abali omo buli ndeko, omukwenda Paulo mwahandika ati “oghundi alengekanaye oko ghundi.” (Abaebrania 10:24) Ebyo Paulo abugha bikaminyisaya biti litolere itwasonda eriminyana. Neryo, tukabya n’omuhwa w’eritsomana abandi. Twamabisonda eriminya Abakristo balikyetu, itukendiminya ngoko babirilaba omo malighe tulimo kandi banganatuwatikya erikindawo.

Likahimba obunwani. Abo tukahindana nabo ni bandu abo twasi, na kandi ni bira betu. Oko sindi ndambi, tukasiba haghuma omo butseme n’eritsanga ndeke. Erilabya akatambi nabo likatuwatikaya liti? Likaleka itw’igha erisikania, kandi likatumatanaya haghuma omo lwanzo. Neryo, omughulu abalikyetu bakabana amagumu, tukanguha eribawatikya kundi twabiribya n’obunwani obusikire nabo. (Emisyo 17:17) Eribya haghuma n’abaghala n’abali bosi bomo ndeko yetu likakanganaya ngoko tutsomene abandi.​—1 Abanya Korinto 12:25, 26.

Tukakusaba usombole abanwani baghu omo bandu abakakola erisonda ly’oMungu. Ukandibana abanwani abo omo katikati k’Abimiri ba Yehova. Kisi, isihabya ekikaleka iwataluka erihindana netu.

• Busanaki eribya haghuma oko mihindano likatuwatikaya kutsibu?

• Wanganza iwahindana netu mughulu wahi utoke erituminya?