Obuli Kisenge ky’Obwami eky’Abimiri ba Yehova kihekire erina ribuyirire ly’oMungu. Busana n’ekyo, tukayowa inisikibwa kandi ini kikulu omwiramya lyetu omughulu tukawatikaya erikyerya, erikisugha n’erikikokotya kyamatsanda. Itwe bosi twanganakola oko mubiri oyu.

Uyiherere oko mubiri w’eribirya n’eryerya emihindano yabihwa. Emihindano yabihwa, balikyetu bakalusaya omutsafu omo Kisenge ky’Obwami. Kandi bakeraya Ekisenge kyosi ndekendeke kaghuma obuli yenga. Omusyakulu kutse omughombe muwatikya yukimanira omubiri oyu, akalebaya ebitolere erikolwa. Erikwamana n’ebilaghirweko, abalikyetu bakayiherera eribirya, erikoropa, erisangula olututu, eritonda ebitumbi, eryerya emisolani kutse ehibine, eryerya amadirisa n’ebiyo, eryuta ebiti kutse eritema-tema obutala. Obuli mwaka, hakasombolawa ekiro eky’erikola omubiri munene w’eryerya Ekisenge ky’Obwami n’obutala obo kirimo. Erileka abana betu nabo bakole oko mubiri oyu, tukabakangiriraya erisikya ebisenge byetu eby’eriramiryamo.​—Omugambuli 5:1.

Uwatikaye omwikokotya ahatsandire. Obuli mwaka, hali abakasondaya ahatsandire emwisi kutse ehihya h’Ebisenge by’Obwami. Eki kikaleka ibaminya luba ah’erikokotya isihali hatsanda kutsibu, neryo esyofranka nene sisyangalihwa omwikokotyaho. (2 Emyatsi y’Emighulu 24:13; 34:10) Ekisenge ky’Obwami ekyerire ndeke kye kitolere eriramibwa m’oMungu wetu. Omwikola oko mubiri oyu, tukakanganaya ngoko twanzire Yehova n’erisikya aho tukamuramiraya. (Esyonyimbo 122:1) Abandu bakapipa oMungu busana nekyo.​—2 Abanya Korinto 6:3.

• Busanaki litolere itwatsomana Ekisenge ky’Obwami?

• Ni miteghekere yahi eyikawatikaya Ebisenge by’Obwami bibye ibinuwene?