Wabirilangira esyofoto esiri omo katabu kano ngoko Abimiri ba Yehova bakambala ndeke omughulu bali oko mihindano yabo? Busanaki tukatsomana eryambala n’eriyipamba lyetu?

Tusikirye oMungu. Kwenene oMungu akalebaya omutima. (1 Samweli 16:7) Nomo bine bitya, omughulu tukahindana tutoke erimuramya, tukanza erikangania ngoko tumusikirye kandi tusikirye abo tukahindana nabo. Twamabirikirwa embere sy’omwami, busana n’erimusikya, tukayikandanga tutoke eryambala ndeke. Kutya, eryambala n’eriyipamba lyetu omugulu tuli oko mihindano bikakanganaya ngoko tusikirye ‘Omutsweri we kihugho kyosi,’ Yehova Mungu, naho tukamuramiraya.​—Enzuko 18:25.

Tukakanganaya esyokanuni esikatusondola buli kiro. EBiblia yikahana Abakristo b’ambale esyongimba ‘esitolere n’eriyiteya’ ng’abandu ‘abakengire oMungu.’ (1 Timoteo 2:9, 10) Eryambala esyongimba ‘esitolere’ ni bughambu eritendyambala esyongimba esyangaleka abandu ibatutungerera kutsibu, esikamakirira omubiri, kutse esikakanganaya omubiri. Kandi ‘eriyiteya’ nalyo likatuwatikaya erisombola esyongimba esyuwene, butsira esyongimba nyitya-nyitya kutse esikaswekaya abandu. N’omo bine bitya, esyokanuni sy’eBiblia sikatuha omwanya w’erisombola esyongimba esyo twanzire. Butsiri bugha kindu, eryambala lyetu elyuwene ‘lyanganuwania amakangirirya w’oMusabuli wetu’ ‘n’eripipa oMungu.’ (Tito 2:10; 1 Petero 2:12) Eryambala ndeke oko mihindano yetu likaleka abandu ibatsemera eriramya lya Yehova.

N’omo bine bitya, isiwaghana erihika oko mihindano yetu busana n’olukimba. Isiwalengekania uti esyongimba esikaghula esyofranka nene syo utolere eryambala. Ekikulu lyeribya n’olukimba olufulirwe n’olukakubyako ndeke.

• Busanaki litolere itwambala ndeke omughulu tukaramaya oMungu?

• Ni kanuni ki esikatuwatikaya erisombola esyongimba esitolere n’eriyipamba ndeke?