Omughulu muke embere ahole, Yesu mwabugha ati: ‘Engulu yuwene eyi y’obwami yasyatulwa omo kihugho kyosi, ng’eriminyisya oko bihanda byosi, neryo enduli iyahika.’ (Matayo 24:14) Aliwe, omubiri w’eritula engulu omo kihugho kyosi angakolirwe ati? Ngoko Yesu akola omughulu abya oko kihugho.​—Luka 8:1.

Tukalenderera abandu omo syonyumba syabo. Yesu mwakangirirya abigha biwe eritula engulu mbuya nyumba oko nyumba. (Matayo 10:11-13; Emibiri 5:42; 20:20) Abaghambuli aberimbere mubahabwa amalambo awerihubirya. (Matayo 10:5, 6; 2 Abanya Korinto 10:13) Na munabwire, omubiri wetu w’erihubirya akakolawa omo mibere eyiteghekanibwe ndeke, kandi obuli ndeko iwite obulambo obo ikahubiraya. Eki kikaleka itwatoka erikwama ekihano kya Yesu ky’eritula ‘engulu mbuya oko abandu.’​—Emibiri 10:42.

Tukayikasa erisungana n’abandu aho bangabanika. Yesu mwatulekera ekyerilebereryako omwihubirya aho bandu banene babya ibakasungika, ng’oko mushike w’engetse kutse aho bandu babya bakateha amaghetse. (Mariko 4:1; Yoane 4:5-15) Netu tukakanaya n’abandu ahosi-hosi aho twangabeya—omo bibalabala, omo syosoko, omo malima, kutse tukakanaya nabo oko telefone. Kandi twamabana omwanya, tukahubiraya abikere hakuhi netu, abo tukakola nabo, abo tukasoma nabo, n’abomo kihanda kyetu. Ebyosi ebi byabirileka abandu banene omo kihugho kyosi batoke eriowa ‘engulu mbuya eyo mulamu.’​—Esyonyimbo 96:2.

Nindi yo wangabwira engulu mbuya y’Obwami b’oMungu n’emiyisa eyo bukandisyaleta omo biro bikasa? Isiwayihunira n’omwatsi owakaha abandu amaha. Bwiragho abandi butsirilinda!

• Ni ‘ngulu yuwene’ yahi eyitolere erihubiribwa?

• Abimiri ba Yehova bakakola bati nga Yesu omo bughambuli?