Habya hakisiya hake iniahola, Yesu mwakania n’abigha biwe bani; Petero, Yakobo, Yoane na Anderea. Abere anemukania nabo oko myatsi eyikendisyakangania ngoko ebiro bye nduli byabirihika, mwabulya ati: ‘Omughombe oyutereghula n’owamenge nindi kwehi? Ya n’oyo mukama wiwe asighira abaghombe ab’enyumba yiwe eriteya n’erihabo akalyo kabo oko mughulu atolere?’ (Matayo 24:3, 45; Mariko 13:3, 4) Yesu mwabugha atya batoke eriminya ngoko, iyo nga “mukama” wabo, akendisyahiraho omughombe kutse abandu abakendisyalisya abakwenda biwe akalyo k’obunyamutima omo biro by’enduli. Omughombe oyu nindi?

Ni kikundi kike ky’abakwenda ba Yesu abahirweko amaghuta. ‘Omughombe’ oyu ky’Ekyaghanda Kikulu ky’Abimiri ba Yehova. Akaha abaghombe ba Yehova balikyabo akalyo k’obunyamutima oko mughulu atolere. Tukayiketera omughombe oyutereghula oyu atoke erituha “erighabo lyetu ly’akalyo oko mughulu atolere.”​—Luka 12:42.

Akimanira abandu b’omonyumba y’oMungu. (1 Timoteo 3:15) Yesu mwaha omughombe omubiri munene w’erimanira emibiri y’endondeko yiwe oko kihugho, ni bughambu eriteya ebindu biwe, erisondola omubiri w’eritula engulu mbuya, n’eritukangirirya eKinywa ky’oMungu omo syondeko. Neryo, ‘omughombe oyutereghula n’owamenge’ oyu anemutughabira akalyo k’obunyamutima okwilabira ebitabu, emihindano mike-mike n’eminene-minene, atoke erituha ebyo tuyiteyirye oko mughulu atolere.

Omugombe oyu ni mutareghula kundi syalihengemaya ekwenene eyiri omo Biblia kandi akakola ndeke ndeke omubiri owahebawa ow’eritula engulu mbuya. Ni w’amenge erikwamana ngoko akateghaya ndeke ebindu byosi bya Kristo ebiri oko kihugho. (Emibiri 10:42) Akalyo k’obunyamutima kanemukanya, n’abandu banene banemuminya ekwenene, ebyo bikakanganaya ngoko Yehova anemutsumula omubiri w’omughombe oyu.​—Isaya 60:22; 65:13.

• Yesu mwasombola ndi atoke erilisya abigha biwe akalyo k’obunyamutima?

• Omughombe oyu ni mutareghula kandi ni w’amenge ati?