Ekinywa “painia” kikaminyisaya ngendo nene omundu oyukatsuka erihika omo bulambo n’eritula enzira eyo abandi bakendikwama. Twanganabugha tuti Yesu abya mupainia kundi mwatumwa oko kihugho atoke eritulughania omwatsi owakaha abandu b’engebe n’eribakyingulira enzira y’erilamibwa. (Matayo 20:28) Munabwire, abamukwamire bakakola ngaye kundi bakalabaya endambi nene ngoko bangatoka omo mubiri ‘w’eriyira [abandu mw’] abigha.’ (Matayo 28:19, 20) Abandi babiringira omo mubiri owo tukahulamo omubiri w’obupainia.

Omupainia ni mundu oyukahubiraya mughulu wosi. Abimiri ba Yehova abosi bakahubiraya. Aliwe, abandi babiriligha eribya abapainia b’omughulu wosi, bakalabaya esyosaha 70 obuli mwisi omo bughambuli. Eritoka erikola eki, abangyi bakakola emibiri eyitimaya endambi yabo yosi. Abandi babirisombolwamo abapainia b’embaghane omo malambo awasabire abaghambuli banene. Abo bakalabaya esyosaha 130 obuli mwisi omo bughambuli. Abapainia bakatsemera ebike bawiteko kandi balighire ngoko Yehova akendibaha ebyo bakayitagha. (Matayo 6:31-33; 1 Timoteo 6:6-8) Abate bangatoka eribya bapainia b’omughulu wosi banganabya abapainia bawatikya ngoko bangatoka. Nabo bakalabaya esyosaha 30 kutse 50 obuli mwisi omo bughambuli.

Eryanza oMungu n’abandu ly’erikaha omupainia y’omuhwa. Nga Yesu, netu tukalangira ngoko munabwire abandu banene batolere ibaminya oMungu. (Mariko 6:34) Aliwe twabiriminya ebyangabawatikya lino, batoke eribya n’eriyiketera omo biro bikasa. Eryanza abandu likaleka omupainia iniakolesya endambi n’akaghala kiwe eriwatikya abandi batoke eriminya oMungu. (Matayo 22:39; 1 Abanya Tesalonika 2:8) Erikola atya likahimba erikirirya liwe, likamuwatikaya abye hakuhi n’oMungu, kandi likamuletera etseme nene.​—Emibiri 20:35.

• Omupainia nindi?

• Ekikaleka omundu inyabya mupainia w’omughulu wosi niki?