Unawatabwirwa ekumbo (esiri)?— * EBiblia ikakaniraya oko kumbo eyikahulawamo “Ekumbo yibughirire.” Yibughirire kundi yikalwa ew’oMungu. Kandi yikahulawamo kumbo kundi abandu sibabya basiyo. Nibya n’abamalaika babya b’anzire eriminya binene kuyo. Unanzire iwaminya ekumbo eyi nga niki?—

Kera kera, oMungu mwahangika omulume n’omukali abe rimbere. Ibakahulawamo Adamu na Eva. Neryo oMungu mwahirabo omo ririma eryuwene kundu erikahulawamo Edeni. Adamu na Eva ko bakenga oMungu, ibo n’abana b’abo bendiyira ekihugho kyosi mo paradiso. Kandi bendibya omo paradiso kera na kera. Aliwe wanam’ibuka ekyo Adamu na Eva bakola?—

Situli omo paradiso munabwire kundi Adamu na Eva mubatakenga oMungu. Aliwe oMungu ati akendyuwania ekihugho kyosi, n’obuli mundu akasyatsema eribya mukyo kera na kera. Angakolire ekyo kyati? Omo biro bingi abandu mubataminya. Yabya kumbo.

Omughulu Yesu asa oko kihugho, mwasyakangirirya abandu b’emyatsi minji oko kumbo eyo. Mwabugha ati y’ihambene n’oBwami b’oMungu. Yesu mwakangirirya abandu basabe bati Obwami obo bwase. Bukendisyayira ekihugho mo paradiso.

Une n’engumbu y’eriminya ekumbo eno?— W’ibuke ngoko abakakenga Yehova basa bo bakasyabya omo paradiso. EBiblia yikakanaya oko balume n’abakali abakenga Yehova. Unanzire eriminyabo?— Uleke tulebaye abaghuma ba kubo n’ekyo twangab’ighako.