ESOMO 11
Mubahandika Ebilebirye Yesu
Wanamalangira abalume abali oko foto?— Ni Matayo, Mariko, Luka, Yoane, Petero, Yakobo, Yuda na Paulo. Abalume bosi aba babya b’oko mughulu wa Yesu, kandi mubahandika ebilebirye Yesu. Twighe binji kubo.
Wasi kyahi oko balume aba?
Abasatu ba kubo babya bakwenda ababya bakahubirya haghuma na Yesu. Unasi abasatu abo nga ni bahi?— Matayo, Yoane, na Petero. Abakwenda Matayo na Yoane babya basi Yesu yo ndeke, kandi obuli mughuma wa kubo mwahandika ekitabu ekikakanaya oko Yesu. Omukwenda Yoane mwahandika ekitabu ekikahulawa mo Eribisulirwa n’esyobaruha isatu esikahulawa mo Yoane w’Erimbere, Yoane wa Kabiri, na Yoane wa Kasatu. Omukwenda Petero mwahandika esyobaruha ibiri omo Biblia. Sikahulawa mo Petero w’Erimbere na Petero wa Kabiri. Omo baruha ya Kabiri, Petero mwahandika oko katambi omughulu Yehova abugha erilwa elubula oko Yesu ati: ‘Oyu ni Mughala waghe. Nimwanzire kandi akanitsemesaya.’
N’abandi balume abali oko foto nabo bakatwighisaya emyatsi eyilebirye Yesu omo bitabu ebyo bahandika. Omughuma wa kubo ni Mariko. Alinga anabyaho Yesu akahambwa, neryo imwalangira ebyosi ebyakoleka. N’owundi ni Luka. Abya munganga neryo alinga mwabya Mukristo Yesu iniabirihola.
Abandi babiri abahandika oko Biblia abo ulangire oko foto babya balere ba Yesu. Unasi amena wabo?— Hali Yakobo na Yuda. Oko mwanzo mubat’ikirirya Yesu. Nibya mubalengekania bati alinga omutwe wiwe atsandire. Aliwe enyuma syaho mub’ikirirya neryo bamabya Bakristo.
Owo mwiso okwihandika oko Biblia oyo wamalangira oko foto, ni Paulo. Embere abye Mukristo, abya akahulwamo Saulo. Abya iniaponire Abakristo kandi iniakakolabo nabi kutsibu. Unasi ekyaleka Paulo inianza eribya Mukristo?— Kiro kighuma, iniane omo lughendo, Paulo mwowa omundu akabugha naye erilwa elubula. Abya ini Yesu! Mwabulya Paulo ati: ‘Busanaki ukakola aba nyikirirye bo nabi utya?’ Enyuma syaho, Paulo mwabya Mukristo. Paulo mwahandika omo Biblia mw’ebitabu 14, eritsuka oko ky’Abaroma erihika oko ky’Abaebrania.
Tukasoma eBiblia yo biro byosi, ko bite bitya?— Tuk’igha binene oko Yesu tukasoma eBiblia. Unanzire erigha binene oko Yesu?—
