ESOMO 2
Rebeka Aby’anzire eritsemesya Yehova
Rebeka abya mukali oyw’anzire Yehova. Iba wiwe abya Isaka. Naye kutya aby’anzire Yehova. Rebeka na Isaka basungana bati? Rebeka mwakangania ati ngoko anzire eritsemesya Yehova? Twighe buli okwiye.
Ababuti ba Isaka babya Abrahamu na Sara. Babya b’ikere omo kihugho kye Kanana. Abandu be Kanana babya isibaliramaya Yehova. Aliwe Abrahamu aby’anzire mughala wiwe iniatahya omukali oyukaramaya Yehova. Neryo mwatuma omughombe wiwe ye Eliezeri arondere Isaka y’omukali e Harani, eyabya abandu b’omo kihanda kiwe.
Rebeka mwaghenda oko kitehero ko ngendo ngendo akanywisya esyongamia
Eliezeri mwaghenda n’abandi baghombe ba Abrahamu. Lwabya lughendo luli kutsibu. Mwaghenda n’esyongamia ikumi n’ebindu ebyuwene-wene. Eliezeri endiminya ati omukali oyutolere Isaka? Iye n’abandi baghombe babere bahika e Harani, mub’imana ahali ekitehero kundi Eliezeri abya inianasi ngoko abandu bakateheraho amaghetse. Mwasaba Yehova ati: ‘Omumbesa oyo ngendisaba amaghetse neryo inyambagho n’erinywisya esyongamia syaghe, abye iyo mumbesa oyo wabiri sombolera omughombe waghu.’
Neryo Rebeka mwasa oko kitehero. EBiblia yikabugha yiti abya mubuya kundu erimusamalira. Eliezeri mwamusaba amaghetse aw’erinywa, na Rebeka mwabugha ati: ‘Inga. Ngendikuha amaghetse, kandi ngendinywisya n’esyongamia syaghu.’ Terilengekania! Esyongamia sikanywa amaghetse manji omughulu sikwire enyota, Rebeka endiya oko kitehero ngendo ngendo. Wanamamulangira oko foto inianemukola atya n’omuhwa?— Eliezeri mwasweka ngoko Yehova mwasubya oko musabe wiwe.
Eliezeri mwaha Rebeka ebindu ebyuwene-wene. Rebeka mwakokya Eliezeri n’abaghombe abo abya naye eka wabo. Eliezeri mwakaniryabo ekiryaleka Abrahamu iniabatuma. Kandi mwakaniryabo ngoko Yehova mwakasubaya oko musabe wiwe. Ekihanda mukyatsema kikasunga omukwe, ni bughambu ye Isaka.
Rebeka mwaghenda e Kanana haghuma na Eliezeri akayalunga na Isaka
Ukalengekanaya uti Rebeka mwayowa ati eritahibwa na Isaka?— Rebeka mwaminya ngoko ni Yehova yo w’atuma Eliezeri. Abo mwabo mubamubulya ng’anamaligha eritahibwa na Isaka, naye mwabugha ati: ‘Inga, ngendighenda.’ Mwalw’iniaghenda aho n’aho. Babere bahika e Kanana, amalunga na Isaka.
Yehova mwatsumula Rebeka, kundi abya akakola ebikamwanzisaya. Habere halaba miaka minji, Yesu mwasyabutwa omo kihanda kya Rebeka! Wamatsemesya Yehova nga Rebeka, naghu iwukendisyatsumulwa.
