ESOMO 5
Samweli aby’akakola ebibuya
Erilwa omo bwana bwiwe, Samweli aby’ikere n’erikolera eyiri ehema y’oMungu. Ehema abya mwanya oho abandu babya bakaramirya Yehova. Unasi Samweli ng’ahika eyiri ehema ati? Tutsuke erikanirya oko Hana, mama wa Samweli.
Muhalaba miaka minji, Hana abya anzire iniabuta aliwe mwatabuta. Neryo mwasaba Yehova n’erimulemba-lemba amuhe omwana. Mwalaghanira Yehova ati: ‘Namabibuta omwana w’obulume ingendikuhaye; akolere eyiri ehema Yaghu.’ Yehova mwasubya oko musabe wiwe, amamuha omwana w’obulume. Amamwahula mo Samweli. Hana mwaberererya endaghane yiwe, neryo omughulu Samweli ayira e miaka 3 kutse 4 mwamutwala eyiri ehema ayakolere oMungu.
Omughulu oyo, Eli yo wabya Muhereri Mukulu omo hema y’oMungu. Abana biwe babiri ibakakolerayo. W’ibuke ngoko ehema yabya nyumba y’eriramiryamo oMungu, kandi kyabya kitolere abandu ibakoleramo emyatsi mibuya. Aliwe baghala ba Eli ibakakoleramo ebitsibu. Samweli mwalangirabyo. Samweli mwanakola nga baghala ba Eli?— Iyehe, mwabya akakola ebibuya, ebyo ababuti biwe bamukangiriraya.
Ukalengekanaya uti Eli endiyira baghala biwe bati busana n’ebitsibu byabo?— Endikunga bo kutsibu. Eli endihighabo omo nyumba y’oMungu. Aliwe Eli mwatakola atya neryo Yehova mwamuhitanako na baghala biwe. Yehova mwasombola eritabo.
Samweli akatulira Eli omulaghe wa Yehova
Kiro kighuma, Samweli inianaghotsere, mw’owa omulenge akamubirikira: ‘Samweli!’ Neryo mwabuka, amatibita eyiri Eli, aliwe Eli mwamubwira ati: ‘Sindita kubirikira.’ Omwatsi mughumerera mwakoleka ngendo kabiri. Oko ngendo ya kasatu, Eli mwabwira Samweli ati: ‘wamatasy’owa omulenge oyo, iwabugha uti: ‘Ubughe, Yehova, nyinakuhulikirire’. Samweli mwakola atya. Neryo Yehova mwabwira Samweli ati: ‘Ubwire Eli uti ngendiswirya ekihanda kiwe busana n’ebitsibu ebyo bakola.’ Ukalengekanaya uti kyanabya kyolo oko Samweli eritulira Eli y’omulaghe oyo?— Iyehe, sikyabya kyolo. Samweli mwakwa obuba! Aliwe mwakola ngoko Yehova amubwira. Ebyo Yehova abugha mubyakoleka. Abaghala babiri ba Eli mubitwa, Eli naye mwahola.
Samweli ni kyerileberyako kibuya. Iye aby’akakola ebibuya n’omo abandi bandu babya bakakola ebitsibu. Naghu ukakola uti? Wanganabya nga Samweli omw’ikola ebibuya? Wamabikola utya iwukenditsemesya Yehova n’ababuti baghu kutya.
