Obuli kiro kinalobire ery’owa ababuti baghu?— Hakanabya akatambi ikyakala. Unasi ngoko Yesu aby’akowa Yehova n’ababuti biwe?— N’omo kyangakala, wamab’igha oko Yesu kyangana kuwatikya eryowa ababuti baghu. Leka tw’ighe binji oko mwatsi oyu.

Embere ase oko kihugho, Yesu abya ikere elubula na Tata wiwe Yehova. Aliwe n’oko kihugho nako Yesu mwayira ko ababuti. Babya Yozefu na Maria. Unasi nga babya babuti biwe bati?—

Yehova mwalusya engebe ya Yesu y’elubula n’erihirayo omo nda ya Maria atoke eributwa n’eribya oko kihugho. Omwatsi oyu abya kitikotiko! Yesu mwakulira omo nda ya Maria nga bandi bana. Habere habihwa emisi nga mwenda, Yesu mwabutwa. Maria n’iba wiwe Yozefu ko babya batya babuti ba Yesu oko kihugho.

Omughulu Yesu abya n’emiaka 12, mwakola ekindu ekyakanganaya ngoko anzire Tata wiwe Yehova yo kutsibu. Eki kyabya omughulu Yesu n’ekihanda kiwe baghenda lughendo luli bakaya e Yerusalema oko Pasaka y’Abayahudi. Babere bakalwayo, Yozefu bana Maria mubabula Yesu y’ahosi-hosi. Unasi ng’abya hi?—

Yozefu bana Maria mubasuba e Yerusalema bakarondya Yesu. Mubakwa obuba bungi kundi mubatamusunga. Aliwe habere hahwa biro bisatu bamamweya omo hekalu! Unasi ekyalekya Yesu iniaya omo hekalu?— Kundi omo mw’endighira oko Tata wiwe, Yehova. Aby’anzire Yehova kandi aby’anzire erigha ngoko angamutsemesya. Yesu mwabya abikula n’eribya mulume mukulu, mwataleka ery’owa Yehova. N’omughulu kyabya ikikalire erihika okwighalwa, Yesu abya iniakowa. Yesu anabya akowa Yozefu na Maria?— Inga, eBiblia yikabugha yiti mwakola atya.

Omwatsi wa Yesu akatw’ighisayaki?— N’omo kyangakala utolere iwowa ababuti baghu. Unemwendikola utya?—