Ukalengekanaya uti kikalire erikola ebibuya?— Abandu banji bakalengekanaya bati kikalire. EBiblia ikatubwira yiti kyabya kikalire kutsibu oko mulwana oyukahulawa mo Yosiya erikola ebibuya. Aliwe aby’awite abira abuwene abamuwatikaya. Tuter’igha oko Yosiya n’abira biwe.

Tata wa Yosiya abya Amoni, omwami w’Abayuda. Amoni abya mundu mubi kutsibu kandi inyakaramaya esyosanamu. Omughulu tata wa Yosiya ahola, Yosiya mwabya mwami we Yuda. Aliwe abya awite myaka 8 misa! Ukalengekanaya uti naye anabya mubi nga tata wiwe?— Iyehe, mwatabya atya!

N’omo anabya mulere kutsibu, Yosiya aby’anzire erikenga Yehova. Nikwa mwasombola abira ababya b’anzire Yehova basa. Kandi mubawatikya Yosiya erikola ebibuya. Abaghuma b’oko bira ba yosiya babya bahi?

Omughuma wa kubo abya Zefania. Zefania abya muminyereri oyo wakunga  Abayuda ati mwamabiramya esyosanamu imukandilola oko myatsi mibi. Yosiya mwowa Zefania n’eriramya Yehova butsira esyosanamu.

Oghundi w’oko bira ba Yosiya abya Yeremia. Abya awite emyaka eyisimbirire eya Yosiya, kandi mubakulira haghuma. Babya bira kundu kusangwa omughulu Yosiya ahola, Yeremia mwahandika olwimbo olw’erikandira Yosiya. Yeremia bana Yosiya mubawatikania erikola ebibuya n’erikenga Yehova.

Omwatsi wa Yosiya akakw’ighisayaki?— N’omo Yosiya anabya mulere mwasombola erikola ebyuwene. Mwaminya ngoko litolere erikola obwira n’abandu ab’anzire Yehova. Lebaya ndeke ngoko wangasombola abira abanzire Yehova n’abangakuwatikya erikola ebibuya!