Endwa ikatsukisaya obunyumba buhya buhya. N’omo ukine n’edeni y’eryanza n’erisikya ababuti baghu, omundu w’omughaso munene okwiwe kulenga obuli mundu omo kihugho n’iba waghu kutse omukali waghu. Abandu baghuma baghuma b’omo kihanda kyaghu banganaghana omwatsi oyo. Aliwe esyokanuni sy’eBiblia syanganakuwatikya utoke erihulikirirana n’abandu b’omo kihanda kyaghu omughulu unemuyikasa erihimba obunyumba bwaghu.

EKYO EBIBLIA IKABUGHA: ‘Usikaye tata wawe na koyo wawe.’ (Abanya Efeso 6:2) N’omo wabirikula, litolere iwakenga n’erisikya ababuti baghu. Isiwibirirawa ngoko iba waghu kutse omukali waghu naye anawite ababuti biwe abo litolere iniawatikya. “Olwanzo silulibya n’[eritsuro, NWT].” Isiwayowa muhanda kusangwa iba waghu kutse omukali waghu akinabeghere oko b’ewabo.​—1 Abanya Korinto 13:4; Abanya Galatia 5:26.

EKYO WANGAKOLA:

• Utsire eribugha ghuti: “Ekihanda kyaghu kinyighonere” kutse “Nyinya waghu syalyanza ebyo nga kola”

• Terilangira omwatsi ngoko iba waghu kutse mukali waghu akalangirawo

EKYO EBIBLIA IKABUGHA: ‘Omundu asyasighania ise wuwe na nyinya, asyalanda oko mukali wiwe neryo basyabya muguma.’ (Enzuko 2:24) Omughulu ukalunga, ababuti baghu banganalengekania bati ukine mwana kutse ukine omo byala byabo, kandi bangananza eriyingirya omo myatsi y’obunyumba bwaghu omo nzira eyituwene.

Iwe na mwira waghu, litolere imwahulikirirana oko myatsi eyo ababuti benyu bangana bawatikyako n’eyo batebangatulako. Mwabihulikirirana, imwabaminyisya. Mubaminyisaye ndeke-ndeke omo mutima molo n’owerisikya. (Emisyo 15:1) Eriyikehya, obolo, n’eriyibombeka likandibawatikya eriteya obuholo n’abandu b’omo kihanda kyaghu ‘n’eriganyirana omo lwanzo.’​—Abanya Efeso 4:2.

EKYO WANGAKOLA:

• Wamalengekania uti ababuti benyu babiribya bakayingirya omo myatsi yenyu, usondaye akatambi akuwene akerikania n’iba kutse omukali waghu

• Muhulikirirane ngoko mukendisoha emyatsi eyo