ESOMO YE 9
Muramaye Yehova omo bunyumba bwenyu
‘Muramaye oyo wahangika olubula n’ekihugo.’—Eribisulirwa 14:7
Ngoko wabirigha omo katabu kano, eBiblia yirimo esyokanuni nyinji esikandikuwatikya iwe n’abomo nyumba yaghu.Yehova anzire imwabya omo butseme. Abirilagha ati mwamabihira eriramya riwe ryembere, “naye asya baha ebindu byosi ebi.” (Matayo 6:33) Yehova anzire iwabya munywani wiwe. Urondaye akatambi akerikulya obunywani kutse obwira bwaghu n’oMungu. Sihali olusunzo olulengire olu.—Matayo 22:37, 38.
1 MUWATAYE OBWIRA BWENYU NA YEHOVA
EKYO EBIBLIA IKABUGHA: “Nasyabya Tata wenyu, Nenyu mwasyabya bagala bage n’abali bage Omukama w’Obutoki Bosi akabuga atya.” (2 Abanya Korinto 6:18) OMungu anzire imwabya banywani biwe b’oko mutima. Erisaba ni nzira nguma eyikatuwatikaya erikola tutya. Yehova anzire ‘itwamusaba butsira eriumbya.’ (1 Abanya Tesalonika 5:17) Ayitayire erihulikirira amalengekania waghu w’omo mutima n’ebikakuhanga-hangaya. (Abanya Filipi 4:6) Omughulu ukasaba haghuma nab’omo nyumba yaghu bakalangira ngoko omo meso waghu oMungu ni mundu oyuliho.
Ngoko ukakanaya n’oMungu, litolere naghu iwamuhulikirira. Wangakola wutya omughulu ukigha eBiblia n’ebitabu ebikakanaya oko myatsi y’eBiblia. (Esyonyimbo 1:1, 2) Lengekanaya kutsibu oko myatsi eyo ukigha. (Esyonyimbo 77:11, 12) Eyindi nzira y’erihulikirira oMungu, n’ihika oko mihindano y’Ekikristo y’obuli yenga.—Esyonyimbo 122:1-4.
Erikanirya abandi emyatsi ya Yehova ni yindi nzira y’omughaso eyeriwatya obwira bwenyu na Yehova. Omughulu ukakola eki kyo ndeke, ukalumaya obwira bwaghu naye.—Matayo 28:19, 20.
EKYO WANGAKOLA:
-
Rondaya akatambi obuli kiro ak’erisoma eBiblia n’erisaba
-
Omo bunyumba bwenyu, muhire emibiri y’Ekikristo embere sy’ebitsange
2 MUTSEMERE ERIRAMYA RYENYU RY’OBUNYUMBA
EKYO EBIBLIA IKABUGHA: “Muyitunde hakuhi n’[oMungu, NWT], naye akandiyitunda hakuhi nenyu.” (Yakobo 4:8) Mutolere imwapanga n’erikwama eprograme y’eriramya ly’obunyumba. (Enzuko 18:19) Sighuluhire aho. Litolere iwahira oMungu omo maisha waghu w’ebiro byosi. Uwataye obwira bw’abomo nyumba yaghu haghuma n’oMungu ukamukaniako “omughulu w’ikere omo nyumba yawe, n’omugulu ukalendera omo nzira, n’oko mugulu ukagotsera, n’omugulu ukabuka.” (Eryibuka Ebihano 6:6, 7) Kola nga Yoshua oyo wabugha ati: “Nikwa ingye n’ekitunga kyage, twasyakolera [Yehova, NWT].”—Yosua 24:15.
EKYO WANGAKOLA
-
Uyire eprograme eyerikola eriramya ly’obunyumba kandi uhiremo ebyo obuli mundu ayitaghire
