Mukandibya mwabitsuka amaisha wo haghuma iwe n’iba waghu kutse mukali waghu, esyombanza nyinji syanganabahulukira. Esyombanza esyo syanganahuluka kusangwa obuli mughuma w’okwinywe awite amalengekania, eriyowa, n’erilangira amaisha omo nzira yiwe. Kandi esyombanza esyo syanganasira ehihya, n’oko ebyo mutalwe muteghekanirye.

Omundu anganalengekania ati kyuwene erilibira esyombanza sy’ameso. Nikwa amahano w’eBiblia akatuwatikaya erisohasyo. (Matayo 5:23, 24) Mwamakwama esyokanuni sy’eBiblia, imukandibana enzira eyuwene y’erisoha esyombanza syenyu.

EKYO EBIBLIA IKABUGHA: “Hali . . . omughulu w’eribuga.” (Omughambuli 3:1, 7) Musondaye akatambi k’erisoha olubanza. Leka iba waghu kutse omukali waghu aminye ndeke ngoko ukayowa, kandi ngoko ukalengekanaya oko lubanza olu. Obuli kiro ‘lwabugha ekwenene’ n’iba waghu kutse omukali waghu (Abanya Efeso 4:25) N’omo wangahitana kutsibu, isiwalwa. Erisubirio lyolo lyanga subulya omubughe-bughe owanga bere malwa.—Emisyo 15:4; 26:20.

N’omo utewanga hulikirirana n’iba waghu kutse omukali waghu, sighumupone, utulere, isiwibirirawa erimukangania olwanzo n’erimusikya. (Abanya Kolosai 4:6) Muyikase erisoha olubanza lo luba, kandi isimwahunana.—Abanya Efeso 4:26.

EKYO WANGAKOLA:

• Murondekanaye akatambi akatolere erisoha esyombanza

• Omughulu oghundi anemukania, sighumutwe kalimi. Umuhulikirire, ukandikania akatambi kaghu k’abihika

EKYO EBIBLIA IKABUGHA: “Mwanzane kutsibu ng’abasubeneko. Mukengane n’eribya n’omutima w’erisikya abandi.” (Abanya Roma 12:10) Erihulikirira lyaghu ni lya mughaso kundu. Terihulikirira amalengekania w’iba waghu kutse omukali waghu “ng’abasubeneko . . . kandi muyikehaye.” (1 Petero 3:8; Yakobo 1:19) Isiwabya nga unahulikirire, aliwe iko bite bitya. Kyamatokekana, leka omubiri waghu. Usunge akatambi k’erikania na iba waghu kutse mukali waghu, kutse mubulaye nga mwanganakania oko kandi katambi. Wamalangira owo mwaghu m’omunywani waghu butsira nzighu yaghu, ‘isiwendi anguha erihitana.’—Omughambuli 7:9.

EKYO WANGAKOLA:

• N’omo mwira waghu angabugha emyatsi eyite kutsemesaya, hulikirira n’omutima mughuma

• Hulikirira ng’akasonda eribughaki. Samalira ndeke ngoko akayiwata, ng’akakanaya n’omulenge ow’asosire ati

EKYO EBIBLIA IKABUGHA: “Omw’ikola lyosi muli endundi; Nikwa erikania ly’eminywa likaleta eritalya.” (Emisyo 14:23) Kyuwene erilighirana oko buhamuli obuwene, aliwe litolere imwakwama ebyo mwabiri lighiranako inywe babiri. Oyo ni mubiri mulito, atolere kaghala kanji, nikwa mwanganatoka (Emisyo 10:4) Mwamakola haghuma, imukendibana ‘oluhembo oluwene’ busana n’emibiri yenyu milito.—Omugambuli 4:9.

EKYO WANGAKOLA:

• Mulengekanaye oko nzira eyuwene kulenga esyosi eyomukandikolesya erisoha esyombanza syenyu

• Oko buli ndambi, mulebaye nga munemubasula ndeke