Eributwa ly’omwana lyangana tsemesya omukali n’omulume kutse eribita engitsi. Kyanganaswekya ababuti bahya bahya erilangira akatambi na kaghala kabo kakahwera omwilembera olumekeke lwabo. Eribula obughotseri n’eribinduka lyamalengekania byanganasonda erihimbula obunyumba bwenyu. Kwesi litolere iwe n’iba kutse omukali waghu imwabindula emyatsi mirebe omo maisha wenyu mutoke erilembera omwana wenyu n’erihimba obunyumba bwenyu. Amahano w’eBiblia angabawatikya ati omo myatsi eyo?

EKYO EBIBLIA IKABUGHA: “Olwanzo lukayibombeka kandi ni [lubuya, NWT].” Kandi “siluliyirondera endundi ilolwene lwene, siluhitana litya litya.” (1 Abanya Korinto 13:4, 5) Ngoko uli mubire muhya-muhya, ukatsomana kutsibu omwana wawe. Aliwe, ekyo kyanganaleka omulume iniatsuka erilengekania ati sighumutsomene. Kwesi, siwibirirawe ngoko iba wawe akinalaghire oko lwanzo lwawe. Bolobolo n’omo mutima owuwene, wanganamukangania ngoko ukinamutsomene, kandi ngoko anganakuwatikya erilembera omwana.

‘Nenyu bira babo . . . mwikale n’abakali benyu omo menge.’ (1 Petero 3:7) Uminye ngoko omukali wawe akendibya akabughira akaghala kiwe kosi oko mwana wenyu. Oyo ni mubiri muhya muhya, anganaluha, anganabya n’engitsi kutse obwenge bwiwe bwanganaluha. Oko sindi ndambi, anganahitana busana naghu, aliwe teriyibombeka kusangwa “oyukayibombeka okw’ihitana owene kwilaba ab’obutoki.” (Emisyo 16:32) Ubye n’obwenge, kandi umuhe ebyo alaghireko.​—Emisyo 14:29.

EKYO WANGAKOLA:

• Iwe tata: Watikaya omukali wawu eritsunga omwana, n’omo kiro. Labaya endambi nge omo yindi mibiri utoke eribana endambi y’eritsanga n’omukali wawu n’omwana wenyu

• Iwe koyo: Omughulu omulume wawu akasondaya erikuwatikya erilembera omwana, siwughane. Atitalembera ndeke-ndeke, sighumutsumange, aliwe umukanganaye bolobolo ngoko litolere iniakola

EKYO EBIBLIA IKABUGHA: “Basyabya [mubiri, NWT] muguma.” (Enzuko 2:24) N’omo mwanamabisunga omundu muhya-muhya omo kihanda kyenyu, mwibuke ngoko iwe n’iba kutse omukali waghu mukine mubiri “muguma.” Mukole ekyo mwangatoka eriwatya obughuma bwenyu.

Iwe mukali, usime omughulu omulume waghu akakuwatikaya. Ebinywa byaghu by’erisima byanganamulamya. (Emisyo 12:18) Iwe mulume, bwira omukali waghu ngoko umwanzire kundu kandi ngoko ni w’omughaso. Umupipe oko ebyo akakolera ekihanda.​—Emisyo 31:10, 28.

“Omundu syasondaye endundi yiwe iyowene-wene, nikwa asondaye endundi busana n’omulikyabo.” (1 Abanya Korinto 10:24) Ubye ukakolera iba waghu kutse omukali waghu ebyuwene obuli kiro. Mubye mukasondya endambi y’erikania inywe babiri, y’erisima, n’erihulikirira oghundi. Isiwabya mukuku oko mwatsi w’enjingo. Uhe omwira waghu kutse omukali waghu ekyo akasondaya. EBiblia ikabugha yiti: ‘isiwima owundi mutalyalaghana oko myatsi y’enjingo.’ (1 Abamya Korinto 7:3-5) Kwesi inywe babiri mubwirane ekwenene oko mwatsi oyo. Erilindirira lyaghu n’erihulikirira lyaghu rikendiwatya obughuma bwenyu.

EKYO WANGAKOLA:

• Sighubirirawe erisondya endambi y’eribya haghuma inywe babiri

• Ubye ukakola ehindu hike hike ehyangaleka iba waghu kutse omukali waghu inyayowa ngoko unamwanzire, wangana muhandikira akabaruha kutse erimuha akandu kake

EKYO EBIBLIA IKABUGHA: “Eritsuka omo bwana bwawe wabiriminya Amasako Abuyirire, awakatoka erikuha amenge w’erikutwala okw’ilamibwa.” (2 Timoteo 3:15) Mupange ekyo mukesyakola erikangirirya omwana wenyu. Ilukine omo nda, olumekeke lunawite amaka w’eriminya omulenge waghu n’eriyowa ngoko ukayowa. Musomere inyakine mwana. N’omwangabya isyowire ebyo ukasoma, kyangana muwatikya erianza erisoma ebitabu abikula.

Isiwalengekanaya uti omwana waghu akine mulere kutsibu okwimukanirya emyatsi y’oMungu. Saba Yehova omwana waghu inianowire. (Eryibuka ebihano 11:19) Omughulu mukatsanga haghuma, kanaya oko bindu eby’oMungu abumba. (Esyonyimbo 78:3, 4) Omwana waghu akendikula inianemulangira ngoko wanzire Yehova neryo iye naye akenditsuka erimwanza.

EKYO WANGAKOLA:

• Musabe Yehova amenge awangabawatikya erikangirirya omwana wenyu

• Subirira omo binywa n’esyo nzumwa esyomughaso neryo omwana akenditsuka erigha emyatsi yo luba