Uyiteghekanaye ndeke n’erisaba. Usabe Yehova akuwatikaye eritendihira amalengekania okw’iwe musa, aliwe uhire amalengekania w’oko mwatsi owo ukendikaniako. Uyikase eriminya ndeke esyonzumwa ngulu-ngulu esyo wanzire erikaniryako. Ubughe esyonzumwa esyo omo binywa byaghu; isiwasubirira omo binywa ngoko bihandikire omo kitsapo.

Ubughe ebikalua oko mutima. Lengekanaya oko ebikaleka iwanza uti abahulikiriri baghu bowe omwatsi oyo. Uhirebo omo malengekania waghu. Neryo, ngoko uk’imana kutse erikala, ebiminyikalo by’omubiri n’eby’omo busu, ibikendikangania ko ukabakaniraya erilua oko mutima kandi ko utsanga-tsangire.

Usamalire abahulikiriri baghu. Samalira abahulikiriri baghu kyamabya isi kibi erikola utya eyo w’ikere. Omughulu ukalabaya omukania, uhire ameso w’oko mundu mughuma, n’enyuma syaho lebaya owundi, omo mwanya w’erisamalira abandu bosi b’oko ngendo nguma.