Ebaruha erilua oko Kyaghanda Ekikasondola
‘Mubye bakangirirya.’ (Ebr. 5:12) Terilengekania okweki! Yehova—oMukangirirya Mukuku omo kihugho n’ekyanya kyosi—akatukokaya ati tukangiriraye abandi okwiye! Eritukokya ati tukangiriraye ekwenene okwiye omo kihanda, omo ndeko, n’omo mubírí w’eritulira ni lukengerwa lunene kandi ni mubírí munene. Twangatoka erikolawo tuti?
Ekisubiryo kikabanika omo binywa ebyo mukwenda Paulo ahandikira Timoteo ati: “Uyihe oko mubiri w’erisomera abandu ekitabu ky’oMungu, kandi uyihe okwihana n’erikangirirya.” Kandi Paulo mwabugha ati: “Wamakola utya wasyayilamya haghuma n’abakakuhulikirira.” (1 Tim. 4:13, 16) Engulu eyo ukatulira ikalamaya engebe. Busana n’ekyo, ni ky’omughaso munene obuli mughuma w’okwitwe inyayikasa eryuwania enzira yiwe y’erisoma n’erikangirirya. Akatabu kano kakokotibwe erikuwatikya omo nzira eyo. Tulebaye ebighuma-bighuma by’oko biri muko.
Erisako erikanganibwe oko buli kayani likabya ini kanuni k’eBiblia akahambene n’esomo y’erikolesya kutse ini ky’erileberyako ekikakanganaya ngoko twangakolesya esomo eyo
Yehova yo “Mukangirirya” Mukulu. (Isa. 30:20) Nomo akatabu kano kakendikuwatikya eryuwania esyonzira syaghu sy’erikangirirya n’erisoma, isiwibirirawa ngoko Yehova yo nzuko y’emyatsi eyo tukakangiriraya kandi ngoko yukaleta abandu b’okwiye. (Yoa. 6:44) Busana n’ekyo, mughulu wosi umusabe ekirimu kiwe kibuyirire. Mughulu wosi, ukolesaye Ekinywa kiwe. Leka abandu balangire ngoko ukakangiriraya Ekinywa kya Yehova butsira amalengekania waghu. Uyikase eriwatikya abahulikiriri eryanza Yehova yo kutsibu.
Wabirikokibwa erikangirirya omwatsi mukulu kutsibu owate atahabwa abandu. Tuli n’amaha ngoko ukendilola embere eriyiketera “akaghala ako oMungu” akatuha utoke erikola omubírí oyu wo ndeke.—1 Pet. 4:11.
Abakangirirya balikyenyu,
Ekyaghanda Ekikasondola eky’Abimiri ba Yehova
