ESOMO 09
Uyitunde hakuhi na Yehova omo nzira y’omusabe
Kikanakuhikira eriyowa ngoko ulaghire oko busondoli omo ngebe yaghu? Unawite amabulyo malebe awo wanzire iwabana kw’ebisubiryo? Unalaghire okwisubibwa mutima omo nda? Unanzire iwayowa hakuhi na Yehova? Omusabe anganakuwatikya omo byosi ebyo. Nikwa enzira eyuwene y’erisaba ni yahi? OMungu akanahulikirira emisabe yosi? Ekyo wangakola niki oMungu imwatoka erisubirya oko misabe yaghu? Leka tusondaye ebisubiryo oko mabulyo ayo.
1. Nindi yo tutolere itwasaba kandi twangasaba busana n’emyatsi yahi?
Yesu mwakangirirya ati litolere itwasaba Tata wetu w’elubula iye musa. Yesu iyuwene-wene abya akasaba Yehova. Mwabugha ati: “Neryo musabe mutya: ‘Tata wetu iwe uli elubula . . .’” (Matayo 6:9) Omughulu tukasaba Yehova tukawataya obwira bwetu haghuma naye.
Twanganasaba busana n’obuli mwatsi. Aliwe twamanza tuti oMungu asubiraye oko misabe yetu, litolere iyahulikirirana n’erisonda riwe. “Twamabulya kindu omwisonda liwe [ery’oMungu] akatowa.” (1 Yoane 5:14) Yesu mwatubwira emyatsi milebe eyo twangahira omo misabe yetu. (Soma Matayo 6:9-13.) Eritomeka okwisaba emyatsi eyitulebirye itwibene-bene, isitwibirirawa erimusima busana n’emyatsi eyo abiritukolera, n’erimusaba eriwatikya abandi.
2. Twangasaba tuti?
EBiblia ikatubwira yiti “tukingulire [oMungu] y’emitima yetu.” (Esyonyimbo 62:8) Omo misabe yetu litolere itwabwira Yehova y’ebiri omo mitima yetu. Twanganasaba omo mulenge kutse bukutu-kutu kandi omo mibere eyikanganaya ngoko tumusikirye. Twanganasaba oko buli mughulu kandi n’ahosi aho twangabya.
3. OMungu akasubiraya oko misabe yetu kw’ati?
Akasubiraya kuyo omo syonzira mbiriri-mbiriri. Yehova abirituha eKinywa kiwe, eBiblia, eyo tukabanamo ngendo nyingyi ebisubiryo oko mabulyo wetu. Erisoma eKinywa ky’oMungu ‘lyanganaha amenge oyukabulagho.’ (Esyonyimbo 19:7; soma Yakobo 1:5.) Anganatuwatikya eritekana omo bulengekania omughulu tukalola oko myatsi eyikalire. Kandi anganakuna abaghombe biwe batuwatikaye omughulu tulaghire oko buwatikya.
WIGHE BINGYI
Wighe ngoko wangatsemesya oMungu omwimusaba ebikalua oko mutima, kandi wighe erisaba oMungu ngoko lyangakuwatikya.
4. Ngoko oMungu anzire itwasaba
Ni myatsi yahi eyikaleka oMungu inialigha emisabe yetu kutse iniatalighayo? Mulebaye EVIDEO.
Yehova anzire itwamusaba. Musome Esyonyimbo 65:2, neryo musubiraye oko mabulyo ano:
-
Ukalengekanaya uti ‘oyukasubiraya oko misabe’ anzire iwamusaba? Ukabugha utya busanaki?
Twamanza tuti oMungu ahulikirire emisabe yetu, litolere engebe yetu iyahulikirirana n’esyokanuni siwe. Musome Mika 3:4 na 1 Petero 3:12, neryo musubiraye oko ribulyo rino:
-
Ekyangatuwatikya erikirirya ngoko Yehova akendihulikirira emisabe yetu niki?
Omughulu w’amalwa, esyonzighu sy’oko luhande lulebe n’esyoko lundi luhande syanganasaba oMungu siti asiwatikaye erisinga amalwa ayo. Nikwa kyanganatokekana oMungu erisubirya oko misabe yosi eyo?
5. Omo misabe yetu litolere itwabwira Yehova ebikalua oko mutima
Abandu balebe babirikangiriribwa eribya bakasubirira omo misabe mighumerera. Nikwa, eyo y’enzira eyo oMungu anzire itwamusabamo? Musome Matayo 6:7, neryo musubiraye oko ribulyo rino:
-
Twangayihighula tuti okwibya ‘tukasubira ebinywa bighumerera’ by’omo misabe yetu?
Obuli kiro, lengekanaya oko muyisa mulebe owo Yehova abirikuha omo ngebe yaghu, neryo umusime busana nawo. Ukole utya obuli kiro eyenga yosi, neryo ukendibya iwamabisaba oko myatsi 7 mbiriri-mbiriri butsira erisubirira omo binywa bighumerera.
Tata w’olwanzo akanza omwana wiwe iniamubwira ebiri oko mutima wiwe. Yehova naye anzire itwamubwira ebikalua oko mutima omughulu tukamusaba
6. Omusabe ni kihembo ky’oMungu
Omusabe angatuwatikya ati, kutsibu-tsibu omughulu tuli omo mughulu owakalire omo ngebe yetu? Mulebaye EVIDEO.
EBiblia ikatulagha yiti omusabe anganatuwatikya eritekana omo bulengekania. Musome Abanya Filipi 4:6, 7, neryo musubiraye oko mabulyo ano:
-
Nomo omusabe syalilua akabughaho amaligho wetu, akatuwatikaya ati?
-
Iwe wanzire erisaba busana n’emyatsi yahi?
Unalwe wasi?
Ekinywa “amina” ni bughambu “bibye bitya” kutse “ni kwenene.” Erilua kera abandu ibakabugha bati, “amina” oko mwiso w’omusabe.—1 Emyatsi y’Emigulu 16:36.
7. Isiwibirirawa erisaba
Oko kandi katambi twanganabya n’emyatsi mingyi y’erikola neryo itwahika n’okwibirirwa erisaba. Yesu abya akalangira omusabe mo w’omughaso oko lulengo lwahi? Musome Matayo 14:23 na Mariko 1:35, neryo musubiraye oko mabulyo ano:
-
Yesu abya akayira ati atoke eribana endambi y’erisaba?
-
Wanganasaba mughulu wahi?
ABANDU BALEBE BAKABUGHA BATI: “Erisaba ni herya endambi yo busa kundi sihali oyukakuhulikirira.”
-
Iwe ukalengekanayaki?
MUKIGHA MYATSI YAHI?
Erisaba tukakolesya ebinywa ebikalua oko mutima likaleka itwayitunda hakuhi n’oMungu, itwatekana omo bulengekania, n’eribya n’amaka awo tulaghireko tutoke eritsemesya Yehova.
Eriyibukya
-
Nindi yo tutolere erisaba?
-
Litolere itwasaba tuti?
-
Omusabe akatuwatikaya ati?
EBINDI EBY’ERIMINYA
Ubane ebisubiryo oko mabulyo awo abandu bangyi bakabulaya oko musabe.
“Emyatsi 7 eyo utolere eriminya oko musabe” (Mnara wa Mulinzi, Octoba 1, 2010)
Wighe busanaki litolere iwasaba kandi ngoko wanguwania emisabe yaghu.
Lebaya ebyo eBiblia ikatukangiriraya oko oyo litolere itwasaba.
Omo video y’omuziki eno, lebaya aherisabira n’omughulu w’erisaba nga bine by’omughaso.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
