ESOMO 11
Ngoko obusomi bwaghu bw’eBiblia bwangakuwatikya kutsibu
Wanabirisonda erikola omwatsi mulebe, aliwe enyuma syaho iwalangira ng’alue akalire erikola? Wamanza uti kikwolobere erikola omwatsi oyo, ukakolawo mo hitsweka-hitsweka. Ko bine bitya n’omughulu omundu akatsuka erisoma eBiblia. Wanganayibulya uti, ‘ngenditsukira hayi?’ Omo somo eno tukendilangira emyatsi milebe eyo wangakola eyangakuwatikya eritsemera erisoma n’erigha eBiblia.
1. Busanaki litolere itwasoma eBiblia yo butumbya?
Omundu oyukasoma eBiblia yo butumbya, kutse “emighambo ya Yehova,” akabya n’obutseme kandi akatsumulawa omo ebyo akakola. (Soma Esyonyimbo 1:1-3.) Eritsuka, wanganabya ukasoma oko katambi kake obuli kiro. Ukenditsemera obusomi bwaghu bw’eBiblia ukasomayo kangyi-kangyi.
2. Ni kyahi ekyangakuwatikya eribana endundi ukasoma eBiblia?
Wamanza uti eBiblia ikuwatikaye, omughulu ukasomayo ni ky’omughaso eriluhuka hake n’erilengekania buli oko ebyo ukasoma. Utolere iwasomayo “n’erighaniryayo.” (Yosua 1:8) Ukasomayo, yibulaye amabulyo ng’ano: ‘Omwatsi ono amanighisyaki oko Yehova Mungu? Nangakolesya niti ebyo ngigha omo ngebe yaghe? Nangakolesya emilondo eyi yo niti nitoke eriwatikya abandi?’
3. Wangasoma eBiblia oko katambi kahi?
Ukanabula akatambi ak’erisoma eBiblia? Ekyo kikanahikira abangyi b’okwitwe. Uyikase “eritendilabya endambi yo buyira.” (Abanya Efeso 5:16, NWT) Wanganakola ekyo omwiteghekania akatambi ako wangasoma kw’eBiblia obuli kiro. Abandu balebe bakasoma eBiblia omo tututu. Abandi bakasomayo omwitungyi babirya akalyo k’eritungyi. N’abandi bakasomayo omwigholo embere sy’erighotsera. Naghu, akatambi kahi ko katolere okwiwe?
WIGHE BINGYI
Minya ekyo wangakola obusomi bwaghu bw’eBiblia bubye bw’eritsemesya kutsibu. Lebaya ngoko wangayiteghekania utoke eribana endundi erilabira obusomi bwaghu bw’eBiblia.
Ngoko ukatsemera akalyo ako ute watalyako, wanganatsemera erisoma eBiblia ngoko ukatsemera akalyo ako.
4. Wighe ngoko wangatsemera erisoma eBiblia
Kyanganakala eritsuka erisoma eBiblia. Aliwe, wanganatsemera erisoma eBiblia ngoko omundu akatsemera akalyo ako ate atalyako. Musome 1 Petero 2:2, neryo musubiraye oko ribulyo rino:
-
Ukalengekanaya uti erisoma eBiblia obuli kiro kyanganakutsemesya n’erikuha engumbu y’erilola embere erisomayo?
Mulebaye EVIDEO erilangira ngoko abandu balebe batsuka eritsemera erisoma eBiblia. Neryo musubiraye oko mabulyo awakwamire.
-
Omo video, abalwana n’abambesa mubakinda ebikakiryo byahi?
-
Ni kyahi kyo kyabawatikaya erilola embere erisoma eBiblia?
-
Mubakolaki obusomi bwabo bw’eBiblia bubye bw’eritsemesya kutsibu?
Ebyangakuwatikya embere syeritsuka:
-
Usombole eBiblia eyitemo makosa kandi eyowikire. Wanganasombola eBiblia Tafsiri ya Ulimwengu Mupya yamabya iyine omo mubughe owo ukabugha, kutse wanganasombolayo omo mubughe owo wasi.
-
Wanganatsuka erisoma ebitsweka ebikakutsemesaya. Lebaya akasanduku “Eritsuka erisoma eBiblia.”
-
Ubye ukibuka emyatsi eyo ulyasoma. Kolesaya akasanduku “Ubye ukibuka emyatsi eyo ulyasoma” akali omo kitabu kino.
-
Ukolesaye e programe ye JW Library®. Wanganakolesyayo erisoma n’erihulikirira eBiblia ahosi-hosi aho uli ne telefone kutse ekindi kyombo ky’ekielektronike.
-
Ukolesaye e nyongeza eyiri omo Biblia Tafsiri ya Ulimwengu Mupya. Bikahiramo amakarte, emichoro, amaana w’ebinywa by’eBiblia, ebyangakuwatikya eriyira obusomi bwaghu bw’eBiblia bubye obw’eritsemesya.
5. Uyiteghekanaye ndeke embere sy’erigha eBiblia
Musome Esyonyimbo 119:34, neryo musubiraye oko ribulyo rino:
-
Busanaki kyuwene erisaba embere sy’erisoma eBiblia kutse eriyiteghekania erigha eBiblia?
Wangabana wuti endundi omughulu ukigha eBiblia? Ukateghekania obuli somo, kwama esyonzira esikwamire hano:
-
Usome esyo nungu sy’embere-mbere esye somo eyo mukendigha.
-
Ulebaye n’erisoma Amasako, kandi usonde eriminya ngoko ahambene n’emyatsi eyo mukendigha.
-
Ukorosaye oko binywa ebyo wamalangira mo kisubiryo oko ribulyo; ekyo ikikendikuwatikya erigha omo nzira y’erikanirania n’omughalima waghu.
Unalwe wasi?
Abimiri ba Yehova babirikolesya esyo Tafsiri mbiriri-mbiriri esye Biblia. Aliwe bakatsemera erikolesya e Biblia Takatifu Tafsiri ya Ulimwengu Mupya kundi siyirimo makosa, yowikire ndeke kandi ikakolesaya erina ry’oMungu.—Lebaya omwatsi owali oko Enternete “Abimiri ba Yehova bawite eBiblia yabo-yabo?”
ABANDU BALEBE BAKABUGHA BATI: “Kikalire erisoma eBiblia. Siniwite endambi kandi niri mughata ow’erisoma.”
-
Ukalengekanayaki oko mwatsi oyo?
MUKIGHA MYATSI YAHI?
Eribana endundi erilabira eBiblia, usondaye akatambi k’erisomayo, usabe oMungu akuwatikaye eryowa ebyo ukasoma, na kandi uyiteghekanaye embere sy’erigha nʼomughalima waghu.
Eriyibukya
-
Ni kyahi kyo kikendikuwatikya eribana endundi erilabira eBiblia?
-
Ni katambi kahi ko katolere okwiwe erisoma n’erigha eBiblia?
-
Busanaki kyuwene eriteghekania efunzo embere sy’erigha n’omughalima waghu?
EBINDI EBY’ERIMINYA
Yibukaye emyatsi eyangakuwatikya eribana endundi erilabira obusomi bwaghu bw’eBiblia.
“Ngoko wangabana endundi ukasoma eBiblia” (Munara wa Mulinzi Na. 1 2017)
Wighe esyonzira isatu esyangakuwatikya erisoma eBiblia.
“EBiblia yanganiwatikya yiti?—Ekitsweka 1: Eriminya ebiri omo Biblia” (Omwatsi wʼoko jw.org)
Langire ngoko wangatsemera erisoma eBiblia.
Usabe obuwatikya erilua oko bandu ababirisoma eBiblia y’oko myaka mingyi.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
