ESOMO 07
Yehova ni mundu oyuli ati?
Iwe ukalengekanaya uti Yehova ali ati? Ukalengekanaya uti ni mundu oyukubahisaya oyuli hali okwiwe, ng’esyongununu esiri omo galaksi eyiri hali-hali? Kutse ukalengekanaya uti ni w’obutoki bunene aliwe si mundu, kandi ali ng’obutuku obukapalaya? Kwenene, Yehova ali ati? Erilabira eKinywa kiwe eBiblia, Yehova akatubwira emibere yiwe, kandi ngoko atutsomene.
1. Busanaki sitwangalangira oMungu y’omo meso wetu?
“OMungu ni mulimu.” (Yoane 4:24) Yehova syawite omubiri owali ng’owetu. Iye ni Mundu oyutelangirika, ikere elubula, obwikalo obo tutetwangalangira.
2. Emibere milebe ya Yehova ni yahi?
Nomo tutetwangalangira Yehova, iye ni mundu oyuliho kwenene-kwenene kandi ali n’emibere eyuwene, neryo omughulu tukaminya emibere yiwe tukamwanza kundu. EBiblia ikabugha yiti: “Yehova anzire eritswera eritunganene, syendisyasighania ababuyirire [abataleghula, NWT] buwe.” (Esyonyimbo 37:28) Kandi iye ni “w’erighanyira n’owo lukogho,” kutsibu-tsibu oko bandu abakaghalawa. (Yakobo 5:11) “Yehova ali hakuhi n’ab’emitima eyibunangikire; akalamaya abatawite amaha.” (Esyonyimbo 34:18) Kandi unalue wasi ngoko twanganatsemesya Yehova kutse ngoko twanganamuhitania? Omundu oyukakola emyatsi eyituwene akamuhitanaya. (Esyonyimbo 78:40, 41) Aliwe oyukakola emyatsi eyuwene akamutsemesaya.—Soma Emisyo 27:11.
3. Yehova akatukanganaya ati ngoko atwanzire?
Omubere mukulu wa Yehova l’olwanzo. Kwenene, “oMungu ni lwanzo.” (1 Yoane 4:8) Akatukanganaya ngoko awite olwanzo erilabira eBiblia n’erilabira ebindu ebyo ahangyika. (Soma Emibiri 14:17.) Eky’erileberyako, uterilengekania oko nzira eyo atuhangyikamo. Mwatuha obutoki bw’erilangira esyorangi esighambire, erihulikirira omuziki owuwene, n’erirya akalyo akasihire. Anzire itwatsemera engebe.
WIGHE BINGYI
Wighe ngoko Yehova akakola emyatsi eyikaswekaya. Kandi ulebaye ngoko Yehova akatubisulira n’eritukangania emibere yiwe eyuwene.
4. Ekirimu kibuyirire k’akaghala k’oMungu akakakola
Tukakolesaya ebyala byetu omughulu tukakola omubírí, Yehova naye akakolesaya ekirimu kiwe kibuyirire. EBiblia ikatubwira yiti ekirimu kibuyirire si mundu, aliwe k’akaghala ako oMungu akakolesaya omughulu akakola. Musome Luka 11:13, neryo musubiraye oko mabulyo ano:
-
Twanganasaba oMungu tuti atuhe akaghala kabuyirire, naye iniakendituhako. Nikwa, ukalengekana uti kirimu kibuyirire ni mundu, kutse ni kaghala k’oMungu akakakola? Ukubugha utya busanaki?
Yehova akakolesaya ekirimu kibuyirire erikola emyatsi eyikaswekaya. Musome Esyonyimbo 33:6 na 2 Petero 1:20, 21, neryo musubiraye oko ribulyo rino:
-
Yehova abirikolesya ekirimu kibuyirire omo nzira syahi?
5. Yehova awite emibere eyuwene
Musa abya muramya mutaleghula w’oMungu, neryo mwasonda eriminya ndeke Omuhangyiki wiwe. Neryo Musa mwabugha ati: “Unyikanganaye esyonzira syaghu, inatoka erikuminya.” (Eriluayo 33:13) Erimusubirya, Yehova mwabwira Musa y’emibere Yiwe milebe. Musome Eriluayo 34:4-6, neryo musubiraye oko mabulyo ano:
-
Yehova mwabwira Musa y’emibere yiwe yahi?
-
Ni mibere yahi ya Yehova yo yikakutsemesaya?
6. Yehova atsomene abandu
Abandu b’oMungu, Abaebrania, babya bakobe eMisiri. Yehova mwayowa ati akalangira abandu biwe bakaghalwa? Muhulikirire OBUSOMI BW’EBIBLIA n’erikwamabo omo syo Biblia syenyu, kutse Musome Eriluayo 3:1-10. Neryo musubiraye oko mabulyo awakwamire.
-
Omwatsi oyu amakuwatikya ati eriminya ngoko Yehova akayowa akalangira abandu bakaghalwa?—Ulebaye omulondo 7, 8.
-
Ukalengekaya uti kwenene Yehova anzire eriwatikya abandu kandi anawite obutoki bw’erikola atya? Ukabugha utya busanaki?
7. Ebihangyikwa bikatubisulira emibere ya Yehova
Yehova akatubisulira emibere yiwe erilabira ebindu ebyo ahangyika. Mulebaye EVIDEO. Neryo Musome Abanya Roma 1:20, n’enyuma syaho musubiraye oko ribulyo erikwamire.
-
Ebihangyikwa bikakuwatikaya eriminya emibere yahi ya Yehova?
ABANDU BALEBE BAKABUGHA BATI: “OMungu si mundu, iye ni kaghala akali ahosi-hosi.”
-
Iwe ukalengekanayaki oko mwatsi oyo?
-
Ukabugha utya busanaki?
MUKIGHA MYATSI YAHI?
Yehova ni mundu oyo tutetwangalangira omo meso wetu. Awite emibere mingyi eyuwene, kutsibu-tsibu olwanzo.
Eriyibukya
-
Busanaki sitwangalangira Yehova y’omo meso wetu?
-
Ekirimu kibuyirire niki?
-
Emibere milebe ya Yehova ni yahi?
EBINDI EBY’ERIMINYA
Wighe bingyi oko Yehova omwiminya emibere mikulu-mikulu ini yiwe.
Ulebaye ebikakanganaya ngoko Yehova syalibanika omo buli kindu.
Ulebaye ekikaleka eBiblia iyahula ekirimu kibuyirire mo byala by’oMungu.
Kyabya kikalire oko ndimetime erikirirya ngoko oMungu amwanzire. Ulebaye ekyabindula amalengekania wiwe.
“Lino nanganawatikya abandi” (Munara wa Mulinzi, Tarehe 1 Mwezi wa 10, 2015)
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
