ESOMO 16
Yesu mwakola myatsi yahi omughulu abya oko kihugho?
Abandu bangyi bakalengekanaya oko Yesu nga ni lumekeke, omuminyereri w’amenge, kutse omundu oyukasonda erihola. Nikwa, omwiyiteghererya engebe yiwe y’oko kihugho twanganigha bingyi okwiye? Omo somo eno tukendigha emyatsi milebe y’omughaso eyo Yesu akola kandi ngoko yangakuwatikya.
1. Omubírí wa Yesu w’omughaso munene abya mubírí ki?
Omubírí w’omughaso munene wa Yesu lyabya ‘eritulaghania engulu mbuya y’oBwami bw’oMungu.’ (Soma Luka 4:43.) Mwahubirya engulu mbuya ati oMungu akasyahiraho oBwami kutse eguvernema, eyikasyabughaho emyatsi eyikaghalaya abandu. a Omo myaka isatu n’enusu, Yesu mwabwira abandu b’omwatsi oyo owakasubaya omo abandu m’omutima.—Matayo 9:35.
2. Yesu mwakola ebitiko-tiko busanaki?
EBiblia ikakanaya oko ‘bitiko-tiko bingyi n’emyatsi y’eriswekya n’ebiminyisyo ebyo Mungu akola omo byala bya [Yesu].” (Emibiri 2:22) OMungu mwaha Yesu y’obutoki bw’eritulerya ekihunga kinene, erilisya abandu bangyi, erilamya abakoni, nibya n’erilubukya abaholi. (Matayo 8:23-27; 14:15-21; Mariko 6:56; Luka 7:11-17) Ebitiko-tiko bya Yesu mobyakangania kwenene ngoko atumawa n’oMungu. Kandi mobyakangania ngoko Yehova awite obutoki bw’eribughaho ebikatwaghalaya.
3. Amaisa wa Yesu akatwighisayaki?
Yesu mwasikya Yehova oko buli mwatsi. (Soma Yoane 8:29.) Nomo abandu bangyi banasonda erimukakirya, Yesu mwakola butaleghula ekyosi-kyosi ekyo Tata wiwe amusaba erikola omo ngebe yiwe yosi. Mwakangania ngoko abandu banganakolera oMungu nibya n’omughulu emyatsi eyikalire yikabahikira. Neryo Yesu mwatusighira ‘olughobe olo twangakwama.’—1 Petero 2:21.
WIGHE BINGYI
Ulangire ngoko Yesu mwabwira abandu b’engulu mbuya kandi ngoko mwakola ebitiko-tiko.
4. Yesu mwabwira abandu b’engulu mbuya
Yesu mwaghenda amaghana w’ebilometere omo syonzira esirimo olututu lunene, eribwira abandu bangyi b’engulu mbuya. Musome Luka 8:1, neryo musubiraye oko mabulyo ano:
-
Yesu anabya akakangirirya abandu abahindene haghuma basa busana n’erimuhulikirira?
-
Yesu mwabya akayikasa ati atoke erisunga abandu?
OMungu mwabugha embere ati Masiya akasyabwira abandu b’engulu mbuya. Musome Isaya 61:1, 2, neryo musubiraye oko mabulyo ano:
-
Yesu mwaberererya ati obuminyereri obu?
-
Ukalengekanaya uti abandu banalaghire oko ngulu eyi ko munabwire?
5. Yesu mwakangirirya emyatsi y’ekwenene y’omughaso
Eritomeka okwitula engulu mbuya y’oBwami bw’oMungu, Yesu mwakangirirya emyatsi y’omughaso. Tulebaye eby’erileberyako bilebe ebyo akanayako omo Mahubiri wiwe w’oko Kitwa. Musome Matayo 6:14, 34 na 7:12, neryo musubiraye oko mabulyo ano:
-
Omo milondo eyi, Yesu mwatuha amahano awuwene wahi?
-
Ukalengekanaya uti amahano ayo anganawatikya abandu na munabwire?
6. Yesu mwakola ebitiko-tiko
Yehova mwaha Yesu y’obutoki bw’erikola ebitiko-tiko bingyi. Eriminya eky’erileberyako kilebe, musome Mariko 5:25-34 kutse mulebaye EVIDEO. Neryo musubiraye oko mabulyo awakwamire.
-
Omo video, omukali oyulwere abya ikiriryeki?
-
Niki kyo kyamakutsemesya omo kitiko-tiko ekyo?
Musome Yoane 5:36, neryo musubiraye oko ribulyo rino:
-
Ebitiko-tiko bya Yesu “mobyatula omwatsi” kutse mubyakanganiaki okwiye?
Unalwe wasi?
Emyatsi mingyi eyo twasi oko Yesu, ikalua omo bitabu bini by’eBiblia ebikahulawamo Enjili—Matayo, Mariko, Luka, na Yoane. Obuli muhandiki we Enjili mwanahandika oko Yesu kw’emyatsi milebe eyo abandi batahandika. Omughulu tukasoma ebitabu bini byosi bye Enjili, tukaminya amaisa wa Yesu wo ndeke.
-
MATAYO
yo watsuka erihandika e Enjili yiwe. Ikatubwira bingyi oko makangirirya wa Yesu, kutsibu-tsibu ebyo Yesu akangiriraya oko Bwami bw’oMungu.
-
MARIKO
mwahandika ekitabu kye Enjili kikuhi oko byosi. Ikakanaya oko myatsi mingyi eyikatsemesaya.
-
LUKA
akatubwira ngoko Yesu abya akalangira omusabe mo w’omughaso kandi ngoko abya akakolera abakali b’omo nzira eyuwene.
-
YOANE
akatubwira emyatsi mingyi eyo Yesu akanayako n’abira biwe n’abandi bandu. Akaleka itwaminya Yesu ng’abya mundu oyuli ati.
ABANDU BALEBE BAKABUGHA BATI: “Yesu abya mundu oyuwene, aliwe syabya Masiya.”
-
Iwe ukalengekanayaki?
MUKIGHA MYATSI YAHI?
Yesu mwatulaghania oBwami bw’oMungu, mwakola ebitiko-tiko, kandi mwasikya Yehova omo buli mwatsi.
Eriyibukya
-
Owabya mubírí wa Yesu w’omughaso munene oko kihugho niki?
-
Ebitiko-tiko bya Yesu bikakanganayaki?
-
Yesu mwatukangirirya emyatsi yahi y’omughaso?
EBINDI EBY’ERIMINYA
Ni myatsi yahi eyo Yesu akanaya ko kutsibu?
“Ngoko Yesu abya akalangira oBwami bw’oMungu” (Munara wa Mulinzi, Tarehe 1 Mwezi wa 10, 2014)
Ulebaye ekyangaleka itwikirirya tuti kwenene Yesu mwakola ebitiko-tiko.
“Ebitiko-tiko bya Yesu—byangakwighisyaki?” (Mnara wa Mlinzi, Tarehe 15 Mwezi wa 7, 2004)
Ulebaye ngoko omulume mughuma mwabindula engebe yiwe omughulu igha ngoko Yesu abya akayiherera n’eriwatikya abandi.
“Nabya inyiyitsomene kundu omo ngebe yaghe” (Mnara wa Mlinzi, Tarehe 1 Mwezi wa 10, 2014)
Ulebaye emyatsi y’omughaso eyo Yesu akola kandi ngoko yabya yikwamene.
“Emyatsi y’omughaso eyo Yesu akola” (Embindula y’ekihugho kihya-kihya, Nyongeza A7)
a Omwatsi w’oBwami bw’oMungu akendisyakanibwako buli omo somo 31-33.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
