ESOMO 19
Abimiri ba Yehova bo Bakristo b’ekwenene?
Itwe Bimiri ba Yehova twikirirye ngoko tuli Bakristo b’ekwenene. Busanaki? Ulebaye obwikirya bwetu nga bwimanire okuki, erina lyetu erikaleka itutabya ng’ebindi bisomo ebikayahula mo by’eKikristo, n’olwanzo olo tuli nalo oghundi oko ghundi.
1. Obwikirirya bw’Abimiri ba Yehova bwimanire okuki?
Yesu mwabugha ati: “Ekinywa [ky’oMungu] ni kwenene.” (Yoane 17:17) Nga Yesu, Abimiri ba Yehova bakayikasa oko mughulu wosi erilusya esyonyikirirya syabo sy’omo Biblia. Eky’erileberyako, ulebaye ngoko twakola tutya erikwamana n’ehistoriya yetu. Omo myaka ye 1870, akakumula k’abandu b’emitima myolo mobatsuka eriyiteghererya eBiblia yo ndeke haghuma batoke erilangira ekyo eBiblia ikakangiriraya kwenene-kwene. Mobalusya amakangirirya wabo w’omo ebyo eBiblia ikakangiriraya, nibya n’omughulu amakangirirya wabo abya asighene na w’ebindi bisomo. Neryo mobatsuka erikangirirya abandi b’emyatsi eyo babya bakigha omo Biblia. a
2. Busanaki tukahulawamo Bimiri ba Yehova?
Yehova akahula abakamuramaya mo bimiri biwe kundi bakabwira abandi b’ekwenene okwiye. (Abaebrania 11:4–12:1) Eky’erileberyako, omo mughulu wa kera, oMungu mwabwira abandu biwe ati: “Muli bimiri baghe.” (Soma Isaya 43:10.) Yesu akahulawamo “Omutuli w’omwatsi [kutse oMwimiri Oyuteleghula.]” (Eribisulirwa 1:5) Busana n’ekyo, erilua oko mwaka 1931 motwimya erina ‘Abimiri ba Yehova.’ Tukatsema eryahulwa omo rina eryo.
3. Abimiri ba Yehova bakigha olwanzo lwa Yesu lo bati?
Yesu abya anzire abigha biwe bo kutsibu erihika oko kika ky’eribya nga kihanda kiwe. (Soma Mariko 3:35.) Kutya, Abimiri ba Yehova ni kihanda ky’omo kihugho kyosi ekiri omo bughuma. Busana n’ekyo tukahulana mo baghala n’abali. (Filemono 1, 2) Kandi tukasikaya ekyalayiro “eky’eryanza abalikyetu bakristo.” (1 Petero 2:17) Abimiri ba Yehova bakakanganaya olwanzo olo omo syonzira nyingyi; ng’eriwatikya abalikyetu bakristo omo kihugho kyosi abalaghire oko buwatikya.
WIGHE BINGYI
Wighe bingyi oko historia y’Abimiri ba Yehova, kandi ulebaye eyindi myatsi eyikakanganaya ngoko tuli Bakristo b’ekwenene.
Obwikirirya bw’Abakristo b’ekwenene buseghemere eBiblia kandi bakakaniraya abandi bo kubo
4. Esyonyikirirya syetu sikalua omo Biblia
Yehova mwabugha embere ngoko hakendisyabya omughulu owo abandu biwe bakendisyowa eBiblia yo ndeke. Musome Danieli 12:4, neryo musubiraye oko ribulyo rino:
-
Niki kyo “kyasyakanyirira” abandu b’oMungu bakayitsinga eriyiteghererya emyatsi eyiri omo Biblia?
Ulebaye ngoko akakumula k’abigha b’eBiblia, erihirako Charles Russell, babya bakigha eBiblia. Mulebaye EVIDEO, neryo musubiraye oko ribulyo erikwamire.
-
Omo video, mughala wetu Charles Russell n’abandi bigha b’eBiblia babya bakigha eBiblia yo bati?
Unalwe wasi?
Hakanabya omughulu itwaleka erikirirya amakangirirya wetu malebe. Busanaki? Ngoko omughulu eryuba likasonda erihuluka likaghenda likaleta ekyakakala n’eribisula bolo-bolo ebiri oko bulambo bulebe. OMungu naye akatuha obutoki bw’eryowa eKinywa kiwe bo bolo-bolo. (Soma Emisyo 4:18.) EBiblia siyiribinduka, aliwe omughulu tukowayo ndeke, tukaleka erikirirya amakangirirya wetu malebe awatahulikirirene nayo.
5. Tukakola erikwamana n’erina lyetu
Busanaki motwimya erina ‘Abimiri ba Yehova’? Mulebaye EVIDEO, neryo musubiraye oko ribulyo erikwamire.
-
Busanaki erina ‘Abimiri ba Yehova’ ritolere?
Busanaki Yehova mwasombola abandu ati babye Bimiri biwe? Kundi abandu babiribugha oko Mungu ko mabehi mangyi, neryo Abimiri biwe bakabugha ekwenene okw’iye. Tukanaye oko mabehi abiri awo abandu bakakangiriraya oko Mungu.
Ebisomo bilebe bikakangiriraya biti oMungu anzire ibakolesya esyo sanamu omwiramya lyabo. Eyo ni na kwenene? Musome Abalawi 26:1, neryo musubiraye oko mabulyo ano:
-
Erisako eri rikatuha ekwenene yahi? OMungu akayowa ati busana n’esyosanamu?
Abasondoli balebe b’ebisomo bakakangiriraya bati Yesu yo Mungu. Eyo ni na kwenene? Musome Yoane 20:17, neryo musubiraye oko mabulyo ano:
-
Erisako eri rikatuha ekwenene yahi? OMungu na Yesu nina mundu mughuma?
-
Ukayowa wuti eriminya ngoko Yehova mwatuma Abimiri biwe erikangirirya ekwenene okwiye n’oko Mughala wiwe?
6. Twanzene
EBiblia ikabugha yiti Abakristo batolere ibabya omo bughuma ngoko ebitsuko by’omubiri w’omundu bikakola omo bughuma. Musome 1 Abanya Korinto 12:25, 26, neryo musubiraye oko mabulyo ano:
-
Abakristo b’ekwenene batolere ibakolaki omughulu aBakristo balikyabo bakaghalawa?
-
Wanabirilangira olwanzo oluli omo kati k’Abimiri ba Yehova?
Omughulu Abimiri ba Yehova b’omo kihugho kilebe bakaghalawa, Abakristo balikyabo b’omo kihugho kyosi bakayikasa eriwatikya Abakristo balikyabo butsirilindirira. Erilangira eky’erileberyako, Mulebaye EVIDEO. Neryo musubiraye oko ribulyo erikwamire.
-
Abimiri ba Yehova eriwatikya abalikyabo, likakanganaya liti ngoko bawite olwanzo?
Abakristo b’ekwenene bakakanganaya olwanzo omwiwatikya abalikyabo abali omo bwagha
ABANDU BALEBE BAKABUGHA BATI: “Abimiri ba Yehova ni kisomo kya lino-lino.”
-
Yehova atsuka eryahula abaramya biwe mo bimiri biwe erilua mughulu wahi?
MUKIGHA MYATSI YAHI?
Abimiri ba Yehova bo Bakristo b’ekwenene. Tuli kihanda ky’abaramya b’omo kihugho kyosi n’obwikirirya bwetu buseghemere eBiblia, kandi tukaminyisaya abandu b’ekwenene oko Yehova.
Eriyibukya
-
Busanaki motwimya erina ‘Abimiri ba Yehova’?
-
Tukakanganaya tuti ngoko twanzene?
-
Ukalengekanaya uti Abimiri ba Yehova bo Bakristo b’ekwenene?
EBINDI EBY’ERIMINYA
Wighe bingyi oko historia yetu.
Mashahidi wa Yehova—Imani Yenye Matendo, Sehemu ya 1: Kutoka Gizani (1:00:53)
Ulebaye eky’erileberyako ekikakanganaya ngoko Abimiri ba Yehova babiribisula amakangirirya w’amabehi w’ebisomo.
Ubane ebisubiryo by’oko mabulyo awo wangabya nagho oko Bimiri ba Yehova.
“Amabulyo awakabulibawa ngendo nyingyi oko Bimiri ba Yehova” (Omwatsi w’oko jw.org)
Stephen abya aponire abandu b’eyindi rangyi erihika oko kika ky’erilwa nabo. Ulebaye ekyo alangira oko Bimiri ba Yehova, neryo kyamamukuna eribinduka.
“Engebe yaghe yabya iyinemughenda ikatsanda kutsibu” (Munara wa Mulinzi, Tarehe 1 Mwezi wa 7, 2015)
a Egazeti yetu ngulu, Akaleberyo k’Omuteya, ikakanaya oko kwenene y’eBiblia eritsuka oko mwaka 1879.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
