Yehova ni Mungu oyutondekenie emyatsi yiwe. (1 Abanya Korinto 14:33) Neryo abandu biwe nabo batolere ibabya abatondekenie emyatsi yabo yosi. Endeko y’eKikristo yitondekire yiti? Twangakolaki tutoke eriwatikya endeko eribya iyinayitondekire?

1. Omukulu kutse omutwe w’endeko nindi?

“Kristo yo musondoli [mutwe] w’endeko.” (Abanya Efeso 5:23) Akasondola emibírí y’abandu ba Yehova b’omo kihugho kyosi iniane elubula. Yesu mwahiraho “omugombe oyuteregula n’ow’amenge”​—ni bughambu akakumula k’abasyakulu abakulire omo bwikirirya, abakahulawamo Ekyaghanda Ekikasondola. (Soma Matayo 24:45-47.) Ekyaghanda Ekikasondola kikasondola esyondeko sy’omo kihugho kyosi ng’abakwenda b’oko karne k’erimbere n’abasyakulu be Yerusalemu. (Emibiri 15:2) Aliwe, abalume abo sibo bakulu b’endondeka yetu. Bakayiketera Yehova n’obusondoli bw’eKinywa kiwe, n’erikwama butaleghula obusondoli bwa Kristo.

2. Abasyakulu b’endeko bawite mubírí wahi?

Abasyakulu b’endeko ni Bakristo abakulire omo bwikirirya abakakangiriraya Amasako kandi abakateghaya abandu b’oMungu omwibawatikya n’eribasikya mutima. Sibalilihawa busana n’omubírí owo bakakola. Aliwe bakakola “butsira erihatikanwa, butsira erihembwa; nikwa omo muhwa w’erikola.” (1 Petero 5:1, 2) Abasyakulu bakawatikibawa n’abaghombe bawatikya. Omughulu abilaba abaghombe bawatikya banganakulya emibere ey’eritolera eribya basyakulu b’endeko.

Ekyaghanda Ekikasondola kikasombola abasyakulu balebe eribya balebya b’omutimbo. Bakalenderera esyondeko mbiriri-mbiriri eriha abaghala n’abali betu b’obusondoli n’eribasikya mutima. Abalebya b’omutimbo bakakolesaya ebisabirwe omo Masako eriminya nga banganasombola mughala wetu mulebe eribya mughombe muwatikya kutse musyakulu.​—1 Timoteo 3:1-10, 12; Tito 1:5-9.

3. Obuli mwimiri wa Yehova awite mubírí wahi?

Obuli mundu omo ndeko “akapipa erina lya Yehova” omwisangira oko bikakoleka oko muhindano w’endeko n’erisangira oko mubírí w’eritulira ngoko angatoka.​—Soma Esyonyimbo 148:12, 13.

 WIGHE BINGYI

4. Yesu ni musondoli w’olukogho

Yesu akatukokaya n’obutseme. Musome Matayo 11:28-30, neryo musubiraye oko ribulyo rino:

• Yesu ni musondoli oyuli ati, kandi anzire itwalangira obusondoli bwiwe bo tuti?

5. Abasyakulu bakakangiriraya erilabira eky’erileberyako kyabo

1. Abasyakulu b’endeko bakayitsinga eribya n’obwira obuwene n’oMungu n’eriwatikya ebihanda byabo erikulya obwikirirya

2. Abasyakulu bakateghaya abosi abali omo ndeko

3.   Abasyakulu bakatulira butumbya

4. Abasyakulu ni bakangirirya. Nabo bakawatikaya oko mubírí w’eryerya eKisenge ky’oBwami n’eyindi mibírí

6. Twanganakola omo bughuma n’abasyakulu b’endeko

EBiblia ikatubwira ekikaleka ikyabya ky’omughaso erikola omo bughuma n’abasyakulu b’endeko. Musome Abaebrania 13:17, neryo musubiraye oko mabulyo ano:

• Busanaki eBiblia ikabugha yiti ritolere erisikya abakatusondola? Ukayowa wuti oko mwatsi oyo?

Musome Luka 16:10, neryo musubiraye oko ribulyo rino:

• Busanaki ni ky’omughaso erikola omo bughuma n’abasyakulu nibya n’omo myatsi mike-mike?

 MUKIGHA MYATSI YAHI?

Yesu yo mutwe w’endeko. Tukatsema erikola omo bughuma n’abasyakulu abakakwama obusondoli bwiwe kundi bakatuhumulikanaya n’eritukangirirya omo nzira y’eky’erileberyako kyabo.

Eriyibukya

• Omutwe w’endeko nindi?

• Abasyakulu bakawatikaya endeko yo bati?

• Obuli Mwimiri wa Yehova akakola omubírí wahi?