Yesu mwakangirirya ati Abakristo batolere eribatisibwa. (Usome Matayo 28:19, 20.) Nikwa, olubatiso niki? Kandi omundu angakolaki atoke eribatisibwa?

1. Olubatiso lutolere ilwakoleka luti?

Ekinywa “olubatiso” kilwire omo kinywa kye Kigiriki ekikamaanisaya “erilubikwa” omo maghetse. Omughulu Yesu abatisibawa mwalubikwa omo lusi lwe Yorodani, neryo enyuma syaho ‘Mwalua omo magetsi.’ (Mariko 1:9, 10) Kutya, n’Abakristo b’ekwenene batolere ibabatisibwa omwilubikwa omo maghetse.

2. Olubatiso lukakanganayaki?

Omundu eribatisibwa, akakanganaya ngoko abiriyiherera iyuwene-wene oko Yehova Mungu. Omundu akayiherera oko Mungu kw’ati? Embere sy’eribatisibwa, omundu akasaba Yehova iyuwene n’erimubwira ngoko anzire erimukolera kera na kera. Akalagha ati akendiramya Yehova iye musa, kandi ati akendihira erisonda ly’oMungu ly’embere omo ngebe yiwe. Akasombola “Eriyighana . . . n’erikwama amakangirirya” n’eky’erileberyako kya Yesu. (Matayo 16:24) Eriyiherera liwe n’eribatisibwa bikaleka inyabya n’obwira ubuwene haghuma na Yehova n’eribya n’obwira obuwene n’abandi abakaramaya Yehova ng’iye.

3. Omundu atolere iniakola myatsi yahi embere sy’eribatisibwa?

Embere sy’eribatisibwa, utolere iwaminya Yehova yo ndeke n’eriwatya obwikirirya bwaghu haghuma naye. (Usome Abaebrania 11:6.) Eriminya lyaghu n’obwikirirya bwaghu bikakula, n’olwanzo lwaghu oko Yehova nalo ko lunemwendikula lutya. Neryo ukendibya n’omuhwa w’eribwira abandi b’okwiye n’erisikya esyo kanuni siwe. (2 Timoteo 4:2; 1 Yoane 5:3) Omughulu omundu akalendera “ngoko Yehova anzire, nʼerikola ebiro byosi ebikamutsemesaya,” anganayisogha eriherera oMungu y’engebe yiwe n’eribatisibwa.​—Abanya Kolosayi 1:9, 10. a

 WIGHE BINGYI

4. Olubatiso lwa Yesu lwanganatukangirirya bingyi

Musome Matayo 3:13-17 eriminya bingyi oko lubatiso lwa Yesu. Neryo musubiraye oko mabulyo ano:

• Yesu anabya mwana omughulu abatisibawa?

• Mwabatisibwa ati? Mwanatsatsangwa kw’amaghetse lisa?

Yesu mwatsuka erikola omubírí w’embaghane owo Mungu amuha oko kihugho ko hano omughulu abatisibawa. Musome Luka 3:21-23 na Yoane 6:38, kandi musubiraye oko ribulyo rino:

• Enyuma sy’eribatisibwa liwe, Yesu mwahira omubírí wahi w’embere omo ngebe yiwe?

5. Olubatiso ni kika ekyo naghu wanganahikako

Oko mwanzo, eriyisogha eriyiherera n’eribatisibwa anganabya mwatsi mulito. Aliwe, wanganalola embere n’erikula omo bwikirirya n’eryo iwayowa ngoko wamabitolera erikola omwatsi mulito ng’oyo. Erilangira abandu balebe abakola batya, mulebaye EVIDEO.

Musome Yoane 17:3 na Yakobo 1:5, neryo musubiraye oko ribulyo rino:

• Ekyangawatikya omundu atoke eritolera eribatisibwa niki?

1. Omughulu omundu akayiherera oko Yehova, akamubwira ati anzire erimukolera kera na kera

2. Omughulu omundu akabatisibawa akayikanganaya embere sy’abandi ngoko abiriyiherera oko Mungu

 6. Omughulu omundu akabatisibawa akabya mughuma w’omo kihanda kya Yehova

Omughulu omundu akabatisibawa, akabya iniamabibya w’oko kihanda kya Yehova ekiri omo bughuma omo kihugho kyosi. Nomo tuli bandu b’omo biharo mbiriri-mbiriri kandi nomo twakulira omo mibere eyisighene, itwe bosi twikirirye myatsi mighumerera, kandi tukakwama esyokanuni sighumerera sy’emighendere. Musome Esyonyimbo 25:14 na 1 Petero 2:17, neryo musubiraye oko ribulyo rino:

• Olubatiso lukawataya luti obwira b’omundu haghuma na Yehova kandi lukawataya luti obwira b’omundu n’abandi abakakolera Yehova?

 MUKIGHA MYATSI YAHI?

Yesu mwakangirirya ati Abakristo bosi batolere ibabatisibwa. Embere sy’omundu eribatisibwa, atolere iniabya n’obwikirirya obuwatire oko Yehova, erighendera oko syo kanuni sya Yehova omo ngebe yiwe n’eriyiherera Okwiye.

Eriyibukya

• Olubatiso niki, kandi busanaki eribatisibwa ni ry’omughaso?

• Olubatiso lukakanganayaki?

• Omundu atolere iniakolaki embere sy’eriyiherera oko Mungu n’eribatisibwa?