Tukakola amalolo, tukaghalawa, n’erihola kundi Adamu na Eva mobatasikya oMungu. a Aliwe, ekyo sibughambu situwite amaha. Yehova abiritukingulira enzira ey’erilama erilua omo rilolo n’oluholo omo nzira ya Mughala wiwe Yesu Kristo. EBiblia ikakangiriraya yiti Yesu mwaliha embanulo erilabira oluholo lwiwe. Embanulo y’endihi eyikalihawa eribohola omundu. Endihi eyo Yesu aliha bw’obughuli bw’engebe yiwe y’omundu oyuhika-hikene. (Soma Matayo 20:28.) Omughulu Yesu ayanzira erisighania erisingana liwe ery’eribya n’engebe ya kera na kera oko kihugho, mwatukingulira enzira y’eritasyabana ebyosi ebyo Adamu na Eva baheraya. Kandi Yesu mwakangania ngoko iye haghuma na Yehova batwanzire kutsibu. Omwatsi ono akendikuwatikya eriwatya erisima lyaghu oko Yesu kundi mwatuholera.

1. Oluholo lwa Yesu lukatuletera endundi yahi munabwire?

Kundi situhika-hikene, tukakola emyatsi mingyi eyitetsemesaya oMungu. Aliwe twamabiyikubya b’omo kwenene n’erisaba Yehova omo nzira ya Yesu Kristo tuti atughanyire busana n’amalolo wetu, kandi twamabiyikasa eritendisyasubira amalolo wetu itukendibya n’obwira obuwene haghuma n’oMungu. (1 Yoane 2:1) EBiblia ikabugha yiti: “Kusangwa Kristo mwahola busana nenyu engendo nguma nyisa busana n’ebibi, omundu oyutunganene mwahola busana n’abandu abatatunganene iniatoka erituleta oko Mungu.”​—1 Petero 3:18.

2. Oluholo lwa Yesu lukasyatuletera endundi yahi omo biro ebikasa?

Yehova mwatuma Yesu aherere engebe yiwe eyihika-hikene “neryo oyukamwikiriraya [Yesu] syahere nikwa abye n’engebe y’erikota.” (Yoane 3:16) Busana n’ekyo Yesu akola, hakisiya hake Yehova iniabuhaho emyatsi yosi mibi eyikabya busana n’erilolo lya Adamu. Ekyo ni bughambu twamahira obwikirirya bwetu omo mbanulo ya Yesu, itukendisyabana engebe y’erikota omo kihugho paradiso!​—Isaya 65:21-23.

 WIGHE BINGYI

3. Oluholo lwa Yesu lukatusabula erilua omo bukobe bw’erilolo n’oluholo

1. Adamu abya mundu oyuhika-hikene oyo waghana erisikya oMungu, busana n’ekyo abandu bakakola amalolo n’erihola

2. Yesu abya mundu oyuhikahikene oyo wasikaya oMungu, busana n’ekyo abandu banganabana akanya k’erihika-hikana n’eribana engebe y’erikota

4. Abandu bosi banganabana endundi busana n’oluholo lwa Yesu

 5. Embanulo ni kihembo ky’oMungu okwiwe

Abira ba Yehova bakalangira embanulo ng’ekihembo ky’oMungu okwibo ibibene-bene. Eky’erileberyako, musome Abanya Galatia 2:20, neryo musubiraye oko ribulyo rino:

• Omukwenda Paulo mwakangania ati ngoko akalangira embanulo mo kihembo ky’oMungu okwiye iyuwene-wene?

Omughulu Adamu akola erilolo, iye n’olubuto lwiwe babya ibatolere ibahola. Aliwe, Yehova mwatuma Mughala wiwe busana naghu utoke eribana engebe y’erikota.

Omughulu mukasoma amasako awakwamire, mulengekanaye Yehova nga mwayowa ati omughulu Mughala wiwe abya akaghalibwa. Musome Yoane 19:1-7, 16-18, neryo musubiraye oko ribulyo rino:

• Ukayowa wuti busana n’ebyo Yehova na Yesu bakukolera?

 MUKIGHA MYATSI YAHI?

Kundi Yesu mwahola, Yehova anganaghanyira amalolo wetu kandi twanganabana engebe y’erikota.

Eriyibukya

• Yesu mwahola busanaki?

• Engebe ya Yesu eyihika-hikene moyabya mbanulo eyitolere omo nzira yahi?

• Oluholo lwa Yesu lwangatuletera endundi omo nzira yahi?