Wanabiriholerwa n’omundu oyo wanzire? Omo mughulu w’obulighe ng’oyo, wanganayibulya uti: ‘Omundu akabya abihola akabya omo mibere eyiri yiti? Hane eriyiketera ly’erisyasyasungana n’abanze betu ababirihola?’ Omo mwatsi ono n’owakwamire, ukendibana ebisubiryo ebikakutuleraya.

1. Omundu akabya abihola akabya omo mibere eyiri yiti?

Yesu mwasosekania oluholo n’otughotseri tunene. Omundu oyughotsere kutsibu syaliminya emyatsi eyimutimbireko eyikalaba. Oluholo n’obughotseri bisosene biti? Omundu akabya abihola, syaliowa obulumi bosi-bosi. N’omo angabya inianabya anzire ab’oko kihanda kiwe n’abira biwe, syangatasyayowa omo mbwera. EBiblia ikabugha yiti: “Abaholi sibasiki.”​—Soma Omugambuli 9:5.

2. Eriminya ekwenene oko baholi likatuletera endundi yahi?

Abandu bangyi bakubaha oluholo​—nibya bakasagha n’abandu ababirihola! Ebyo eBiblia ikabugha oko baholi byanganakusubya m’omutima. Yesu mwabugha ati: “Omwatsi w’ekwenene asyabaha obwiranda.” (Yoane 8:32) Emyatsi eyo ebisomo bikakangiriraya isighene n’eyo eBiblia ikakangiriraya; eBiblia siyirikangiriraya yiti omundu anemo akandu akatehola. Ni bughambu sihali n’omundu n’omughuma oyukaghalawa abihola. Neryo kundi abaholi sibasi kindu kyosi-kyosi, sibangatwaghalya. Busana n’ekyo situlaghire okwitulerya kutse eriramya abaholi, kandi eribasabira siriri na mughaso.

Abandu balebe bakabugha bati banganakania n’abaholi. Aliwe sikyangatokekana. Ngoko twamabigha, “abaholi sibasiki.” Abakalengekanaya bati bakakanaya n’omwanze wabo oyo wabirihola, banganabya ibakakanaya n’emirimu mibi eyikayiyira m’omundu oyo wabirihola. Kwesi, eriminya ekwenene oko baholi likatuteghaya oko mirimu mibi. Yehova abiritughania erikania n’abaholi kusangwa anasi ngoko lyanganatuhutalya.​—Soma Eryibuka Ebihano 18:10-12.

3. Wighe ekwenene oko mibere eyo abaholi balimo

Omo kihugho, abandu bali n’amalengekania awasighene oko mibere eyo baholi bakabyamo. Oko kwenene, amalengekania wosi ayo syangabya w’ekwenene.

• Abandu b’omo kiharo ekyo w’ikeremo bikiriryeki oko baholi?

 4. Eriminya ekwenene oko baholi likatuletera endundi

Eriminya ekwenene oko baholi kikatuwatikaya eritendisagha abandu ababirihola. Musome Omugambuli 9:10, neryo musubiraye oko ribulyo rino:

• Abaholi banganatwaghalya?

Ekwenene y’eBiblia ikatuteghaya oko makangirirya awakabugha ati abaliho banganatulerya abaholi kutse nibya n’eribaramya. Musome Isaya 8:19 na Eribisulirwa 4:11, neryo musubiraye oko ribulyo rino:

• Ukalengekanaya uti Yehova akayowa ati akalangira omundu oyukaramaya kutse oyukarondaya obuwatikya bw’oko mundu oyw’abirihola?

5. Eriminya ekwenene oko baholi likatukiranaya

Abandu bangyi bakalengekanaya bati omughulu bakasyahola, bakasyaghalawa busana n’emyatsi eyo bakola kera. Aliwe, eriminya ngoko sihali n’omundu n’omughuma oyukaghalawa abihola, nibya n’oyo wakola emyatsi mibi, likatutuleraya.​—Musome Abanya Roma 6:7, neryo musubiraye oko ribulyo rino:

• Ngoko twamabisoma omo Biblia, oluholo lukabohola omundu y’oko malolo, ukalengekanaya uti omundu oyo wabirihola anganaghalwa busana n’emyatsi eyituwene eyakola kera?

Erilola embere omwiminya Yehova, likendituwatikya eriminya ngoko syangaligha ati abaholi baghalawe n’ahake. Musome Eryibuka Ebihano 32:4 ne 1 Yoane 4:8, neryo musubirya oko mabulyo ano:

• OMungu oyuli n’emibere eyikanibweko omo masako ayo angananza eryaghalya abandu ababirihola?

• Ekwenene eyiri omo Biblia eyikanirye oko baholi yanamakukirania? Busanaki?

 MUKIGHA MYATSI YAHI?

Omughulu omundu akahola, akabya isyakiriho. Omundu akabya abihola syalighalawa, kutse naye syangaghalya abaliho.

Eriyibukya

• Abaholi bakabya omo mibere eyiri yiti?

• Eriminya ekwenene oko baholi likatuletera endundi yahi?

• Eriminya ekwenene oko baholi likatukiranaya liti?