ESOMO 30
Abandu abo wanzire ababirihola banganatasyabyaho!
Oluholo lukaletera obulighe bunene kutsibu. Kyo kikaleka eBiblia iyabugha yiti oluholo ni nzighu. (1 Abanya Korinto 15:26) Omo somo 27, mowigha ngoko Yehova akasyakinda enzighu eyo. Nikwa bikasyabya biti oko bandu ababirihola? Omo mwatsi ono, ukendigha bingyi oko yindi ndaghane ya Yehova eyikatsemesaya. Akasyalubukaya abandu bangyi kutsibu ababirihola batoke eritsemera engebe yo kera na kera. Akasyalubukyabo! Ekyo kyanganatokekana? Bakasyalubukibawa erikala elubula kutse oko kihugho?
1. Niki kyo Yehova anzire erikolera abanze betu ababirihola?
Yehova anzire erilubukya abandu ababirihola. Yobu, omulume oyo wabya n’obwikirirya, abya n’eriyiketera ngoko omughulu akendisyahola, oMungu syangamwibirirwa. Mwabwira oMungu ati: ‘Wasyabirikira, naghe inakwitaba [erilwa omwisinda].’—Soma Yobu 14:13-15.
2. Tukaminya tuti ngoko ababirihola banganalubuka?
Omughulu Yesu abya oko kihugho, oMungu mwamuha obutoki bw’erilubukya abaholi. Yesu mwalubukya omumbesa oyo wabya n’emyaka 12 n’omughala w’omukwirwa mughuma. (Mariko 5:41, 42; Luka 7:12-15) Enyuma syaho, Lazaro oyo wabya mwira wa Yesu naye mwahola. Nomo Lazaro anabya iniabirihola kandi iniabiribugha ebiro bini by’omwisinda, Yesu mwamulubukya. Abere abisaba oMungu, Yesu mwabugha ati: “Lazaro, huluka!” Neryo “Oyo wabya aholire mwahuluka.” Omundu oyo abya Lazaro! (Yoane 11:43, 44) Terilengekania aboko kihanda kya Lazaro n’abira nga mobabya n’obutseme bungahi!
3. Hali eriyiketera lyahi oko banze baghu ababirihola?
EBiblia ikalagha yiti: “Hasyabya erilubuka.” (Emibiri 24:15) Abandu abo Yesu alubukaya kera mobataya elubula. (Yoane 3:13) Mobatsemera eritasyabya hano h’oko kihugho. Kandi, hakisiya hake Yesu anialubukya abandu bangyi kutsibu ababirihola batoke eritsemera engebe omo Paradiso oko kihugho. Mwabugha ati “abosi abali omo masinda [w’eryibuka]”—nibya n’abakabya nga babiribiriranwa, aliwe ibane omo bwenge bw’oMungu—nabo bakendisyalubuka.—Yoane 5:28, 29.
WIGHE BINGYI
Wighe omo Biblia mw’emyatsi eyikaleka itwikirirya ngoko kwenene Yesu ane n’obutoki bw’erilubukya abaholi kandi ngoko akasyalubukayabo. Wighe ngoko erilubuka ly’abaholi lyanganakukirania n’erikuha amaha.
4. Yesu mwakangania ndeke-ndeke ngoko anganalubukya abandu ababirihola
Wighe bingyi oko ebyo Yesu akolera omwira wiwe Lazaro. Musome Yoane 11:14, 38-44, neryo musubiraye oko mabulyo ano:
-
Tukaminya tuti ngoko kwenene Lazaro mwahola?—Ulebaye omulondo 39.
-
Lazaro amabya imwaghenda elubula abihola, ukalengekanaya uti Yesu anganasirisya mulubukya ati asube oko kihugho?
5. Abandu bangyi bakasyalubukibwa!
Musome Esyonyimbo 37:29, neryo musubiraye oko ribulyo rino:
-
Abandu bangyi abakasyalubuka, bakasyikala hayi?
Yesu akasyalubukaya abandu bangyi, nibya n’ababya isibaliramaya Yehova. Musome Emibiri 24:15, neryo musubiraye oko ribulyo rino:
-
Wanzire erisyalola okundi abilubuka?
Ulengekanaye oko kino: Ngoko kyolobire oko tata eribukya omwana wiwe y’omo tughotseri, kutya kyolobire oko Yesu erilubukya abandu ababirihola
6. Erilubuka ly’abaholi lyanganakukirania n’erikuha amaha
Omwatsi wa mwali wa Yairo owakanibweko omo Biblia mwakirania n’erisikya emitima y’abandu ababya omo bulighe. Musome omwatsi w’ekwenene oyo w’omo Luka 8:40-42, 49-56.
Embere Yesu alubukaye mwali wa Yairo, mwabwira tata w’omwana ati: ‘Sighubahe, ubye n’obwikirirya busa.’ (Ulebaye omulondo 50.) Eriyiketera ery’erisyalubuka ly’abaholi lyanganakuwatikya liti . . .
-
omughulu wamaholerwa n’omundu oyo wanzire?
-
omughulu engebe yaghu yamabya omo bwiko?
Mulebaye EVIDEO, neryo musubiraye oko ribulyo erikwamire.
-
Eriyiketera erisyalubuka ly’abaholi molyakirania n’erisikya omutima w’ababuti ba Phelicity liti?
ABANDU BALEBE BAKABUGHA BATI: “Kikalire erikirirya kwenene ngoko abaholi bakasyalubuka.”
-
Naghu ukalengekanayaki?
-
Ni risako lyahi eryo wangakolesya erikangania ngoko hakasyabya erilubuka?
MUKIGHA MYATSI YAHI?
EBiblia ikatulagha yiti abandu bangyi ababirihola bakasyalubuka. Yehova anzire ibasuba oko ngebe, kandi abiriha Yesu y’obutoki bw’erilubukyabo.
Eriyibukya
-
Yehova na Yesu bakayowa bati oko mwatsi w’erilubukya abandu ababirihola?
-
Abandu ababirihola bakesyalubukira oko kihugho kutse elubula? Ukabugha utya busanaki?
-
Niki kyo kikaleka iwikirirya ngoko abandu abo wanzire ababirihola banganatasyabyaho?
EBINDI EBY’ERIMINYA
Wighe emyatsi eyo wangakola eritoka erilwa n’obulighe bw’eriholerwa.
Kwenene esyokanuni sy’eBiblia syanganawatikya omundu oyukwire obulighe busana n’eriholerwa?
Abana bangalwa bati n’obulighe omughulu omundu oyo banzire amahola?
Hane abakasyalubuka n’eriya elubula? Ni bahi abatendisyalubukibwa?
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
