ESOMO 41
EBiblia yikabugha yitiki oko myatsi y’engyingo?
Abandu bangyi sibalyanza erikania oko myatsi y’engyingo. Naho, omughulu eBiblia ikakanaya oko myatsi y’engyingo, ikakanaya kuyo butsiribisa, aliwe omo nzira y’erisikya. Ebyo ikabugha bikatuletera endundi. Ekyo kyowikire kusangwa Yehova y’Omuhangyiki wetu. Asi emyatsi eyangatuletera endundi. Akatubwira ebyo twangakola tutoke erimutsemesya, n’emyatsi eyangatuwatikya eritsemera engebe kera na kera.
1. Yehova ali n’amalengekania wahi oko myatsi y’obusingiri?
Eritegheko ly’omwatsi w’engyingo ni kihembo erilua oko Yehova. Anzire abalungire basa ibo batsemera erikola eritegheko ly’omwatsi w’engyingo. Ekihembo ekyo kikawatikaya abalungire eribya n’abana n’erikangania olwanzo oghundi oko ghundi omo nzira eyikatsemesaya, n’eriwatya obwira omo kati kabo. Kyo kikaleka eBiblia iyabuhga yiti: “Utsemere omukali w’obusuko bwawe.” (Emisyo 5:18, 19) Yehova anzire aBakristo abalungire ibabya bataleghula omughuma oko ghundi, neryo isibangakola obusingiri.—Usome Abaebrania 13:4.
2. Obusingiri niki?
EBiblia ikatubwira yiti “Ab’amaraghane . . . sibendisyasangira oko Bwami bw’oMungu.” (1 Abanya Korinto 6:9, 10) Abahandiki b’eBiblia abahandika omo Kigiriki, mobakolesya ekinywa por·neiʹa bakakania oko busingiri. Ekinywa ekyo kikakanaya oko (1) abandu babiri abatalungire a erikola eritegheko ly’endwa, (2) omulume erighotsera n’oghundi mulume kutse omukali n’oghundi mukali, na (3) omundu erighotsera n’enyama. Tukatsemesaya Yehova n’eriyiletera endundi itwibenebene omughulu ‘tukayihighula oko busingiri.’—1 Abanya Tesalonike 4:3.
WIGHE BINGYI
Ulangire nga wangayihighula oko busingiri ko wuti kandi nga wangabana endundi yahi omwibya iwunerire omo meso w’oMungu.
3. Usaghe obusingiri
Omulume mughuma w’obwikirirya oyukahulawamo Yozefu mwalwa amalwa awakalire eritoka eribya inianerire omo meso w’oMungu. Musome Enzuko 39:1-12, neryo musubiraye oko mabulyo ano:
-
Ekyakuna Yozefu eritibita niki?—Ulangire omulondo 9.
-
Ukalengekanaya uti Yosefu mwayisogha ndeke? Busanaki?
HMunabwire abalwana bangakwama emibere ya Yozefu yo bati n’erisagha obusingiri? Mulebaye EVIDEO.
Yehova anzire itwe bosi itwayighighula oko busingiri. Musome 1 Abanya Korinto 6:18, neryo musubiraye oko mabulyo ano:
-
Ni myatsi yahi eyangaleka omundu iniakola obusingiri?
-
Wangasagha obusingiri bo wuti?
4. Wanganatoka erikinda erilengwako
Ekyangaleka erilwa n’erilengwako ly’erikola obusingiri iryakala niki? Mulebaye EVIDEO, neryo musubiraye oko mabulyo awakwamire.
-
Omughulu mughala wetu w’omo video aminya ngoko ebinywa biwe n’ebyakakola byanganalekire inialeghula oko mukali wiwe, mwakolaki?
Nibya n’Abakristo bataleghula banganataluka eribya ibane n’amalengekania aw’erire. Wangayihighula wuti oko malengekania aw’emyatsi y’obusingiri? Musome Abanya Filipi 4:8, neryo musubiraye oko mabulyo ano:
-
Ni myatsi y’omuhanda wahi yo nyitolere eribya ngalengekania ko?
-
Erisoma eBiblia n’eribya n’ebingyi by’erikola omo mubírí wa Yehova byangatuwatikya biti erilwa n’erilengwako ly’erikola erilolo?
5. Esyokanuni sya Yehova sikatuwatikaya
Yehova asi ndeke eby’angatuletera endundi. Akatubwira ebyo twangakola tutoke eribya itunerire, n’endundi eyo twangabana omwikola tutya. Musome Emisyo 7:7-27 kutse mulebaye EVIDEO, neryo musubiraye oko mabulyo awakwamire.
-
Omulwana mughuma mwatoghera ati omo kitegho ky’erilengwako?—Ulebaye Emisyo 7:8, 9.
-
Erikwamana n’Emisyo 7:23, 26, obusingiri bwanganalwamo ebighuma ebituwene. Twamayikasa eribya n’emighendere eyerire, ekyo ikyanganatuteya oko myatsi yahi?
-
Eribya omundu oyo w’erire erikwamana n’esyokanuni sy’emighendere lyangatuwatikya liti eritsemera engebe kera na kera?
Abandu balebe bakalengekanaya bati ebyo eBiblia ikabugha oko mwatsi w’omulume erighotsera n’oghundi mulume n’omukali n’oghundi mukali, bikakanganaya ngoko oMungu syawite lwanzo. Aliwe Yehova, oMungu w’olwanzo, anzire obuli mundu iniatsemera engebe kera na kera. Tutolere itwakwama esyokanuni siwe sy’emighendere. Musome 1 Abanya Korinto 6:9-11, neryo musubiraye oko ribulyo rino:
-
Omulume erighotsera n’oghundi mulume n’omukali n’oghundi mukali ekyo kyona kindu kighuma kisa ekitisirire omo meso w’oMungu?
Twamanza eritsemesya oMungu, obuli mughuma w’okwitwe atolere iniakola esyombinduka omo ngebe yiwe. Ekyo nina ky’omughaso? Musome Esyonyimbo 19:8, 11, neryo musubiraye oko mabulyo ano:
-
Ukalengekanaya uti nina ky’amenge erikwama esyokanuni sya Yehova esy’emighendere? Busanaki ukabugha utya?
Yehova abiriwatikya abandu bangyi erikolesya esyokanuni sy’omo ngebe yabo. Naghu anganakuwatikya
ABANDU BALEBE BAKABUGHA BATI: “Emyatsi y’engyingo yanganakolwa omo kati k’abandu babiri bamabyanzana.”
-
Iwe wangabugha utiki?
MUKIGHA MYATSI YAHI?
Emyatsi y’engyingo ni kihembo ekyo Yehova akaha omukali n’omulume wiwe basa.
Eriyibukya
-
Obusingiri bulimo myatsi mina-mina yahi?
-
Niki kyo kikendituwatikya eriyihighula oko busingiri?
-
Tukabana ndundi yahi omughulu tukakwama esyokanuni sya Yehova sy’emighendere?
EBINDI EBY’ERIMINYA
Wighe busanaki oMungu anzire omulume n’omukali abanzire eribya haghuma ibatahania.
“EBiblia ikabughaki oko mulume n’omukali abakatsuka obuteke isibebalunga?” (Omwatsi w’oko jw.org)
Wighe ngoko esyokanuni sy’eBiblia esighanirye omulume erighotsera n’oghundi mulume kutse omukali n’oghundi mukali sisitubwira siti tupone abakakolabyo.
“Nina kibi omulume erighotsera n’oghundi mulume?” (Omwatsi w’oko jw.org)
Wighe ngoko oMungu atekaho emighambo eyilebirye emyatsi y’engyingo busana n’erituteya.
“Erikola obusingiri omo nzira y’obuno nalyo nina busingiri?” (Omwatsi w’oko jw.org)
Omo mwatsi “Mobanyikolera omo nzira y’erisikya,” ulangire ekyakuna omulume oyo wabya akaghotsera n’abandi balume eribinduka n’eritsuka eritsemesya oMungu.
“EBiblia ikabindula esyongebe sy’abandu” (Mnara wa Mlinzi, Aprili 1, 2011)
a Emibere mitya-mitya eyo yirimo amategheko mina-mina ng’erisingira, erisingira omo nzira y’obuno, omo nzira y’obunero kutse eritsanga-tsangira oko bitsuko by’obusoni by’oghundi mundu omo nzira y’eribukya esyongumbu nyibi.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
