ESOMO 44
Ebiro bikulu byosi bikanatsemesaya oMungu?
Yehova anzire itwatsemera engebe n’erikola ebisendebele oko sindi ndambi. Nikwa, ebisendebele n’ebiro bikulu byosi bikanatsemesaya oMungu? Twangakangania tuti ngoko twanzire Yehova omo myatsi eyi?
1. Busanaki ebiro bikulu bingyi sibiritsemesaya Yehova?
Wanganasweka eriminya ngoko ebiro bikulu bingyi sibihulikirirene n’amakangirirya w’eBiblia kandi ngoko biwite enzuko y’ekipakani. Kandi byanganabya ibinahambene n’amakangirirya w’ebisomo by’amabehi. N’ebindi bya kubyo byanganabya ibihambene n’emyatsi y’esyombinga kutse n’amakangirirya awakabugha ati enafsi siyirihola. Ebiro bikulu bilebe bitsukire omo myatsi y’obukumu kutse ey’erikirirya ehangi. (Isaya 65:11) Yehova akakunga abaramya biwe ati: “Mulwe omo kati kati kabo . . . kandi simutule oko kindu ekitisirire.”—2 Abanya Korinto 6:17. a
2. Yehova akalangira ebiro bikulu ebikaha abandu b’olukengerwa olo batatolere by’ati?
Yehova akahana ati situtoghere omo kitegho ky’erihira omo ‘bandu mw’eriyiketera [lyetu].’ (Soma Yeremia 17:5.) Ebiro bikulu bilebe bikaha abatabali kutse abasuda b’olukengerwa. Ebindi bikahalamba ebisosekanio by’ekihugho kutse bikibukaya ekiro ekihugho kyabana obwiranda. (1 Yoane 5:21) Ebindi biro bikulu biriho busana n’erisenzemetya abandu n’ebyama by’ekipolitike kutse emyatsi y’ebitunga. Yehova akayowa ati twamaha omundu mulebe kutse ekitongole kilebe ky’olukengerwa olo kitatolere erihabwa, kutsibu-tsibu abandu kutse ekitongole kyamabya ikikasenzemetaya amalengekania awatahambene n’erisonda liwe?
3. Ni myatsi yahi eyangaleka ebiro bikulu ibituwana omo meso w’oMungu?
EBiblia ikaghanaya “erikunda, eriyalumba ebisendebele ebilabukirenie, n’eritamira.” (1 Petero 4:3, NWT) Omo biro bikulu bilebe abandu bakakola emyatsi mingyi y’eritendiyiteya n’obusingiri. Eribya mwira wa Yehova, tutolere itwayihighula oko mibere mibi eyitisirire eyo.
WIGHE BINGYI
Wighe ngoko wangatsemesya Yehova omw’ikolesya amenge omo mighulu y’ebiro bikulu n’ebindi bisendebele.
4. Ughane ebiro bikulu ebitesikaya erina lya Yehova
Musome Abanya Efeso 5:10, neryo musubiraye oko mabulyo ano:
-
Niki kyo tutolere eriminya omughulu tukayisogha nga tukendyibuka ekiro kikulu kilebe kutse iyehe?
-
Ni biro bikulu byahi byo bikibukawa kutsibu omo kiharo ekyo w’ikeremo?
-
Ukalengekanaya uti ebiro bikulu ebyo bikanatsemesaya Yehova?
Eky’erileberyako, une watayibulya oMungu ng’ali n’amalengekania wahi okwibuka ebiro by’eributwa? EBiblia siyirikanaya oko muramya wa Yehova n’omughuma oyo wibuka ekiro ky’eributwa liwe, aliwe ikakanaya oko bandu babiri ababya isi baramya b’oMungu abibuka ebiro byabo by’eributwa. Musome Enzuko 40:20-22 na Matayo 14:6-10. Neryo, musubiraye oko mabulyo ano:
-
Ni mwatsi wahi owakoleka omwibuka ebiro bibiri by’eributwa ebyo?
-
Erikwamana n’emyatsi eyiri omo Biblia eyi, ukalengekanaya uti Yehova ali n’amalengekania wahi okwibuka ebiro by’eributwa?
Nikwa, wanganatasyayibulya uti, ‘Yehova kwenene anatsomene namasangira okwibuka ekiro ky’eributwa kutse ekindi kiro kikulu ekitahambene n’amasako?’ Musome Eriluayo 32:1-8. N’enyuma syaho, mulebaye EVIDEO n’erisubirya oko mabulyo awakwamire.
-
Busanaki ni ky’omughaso erisonda eriminya emyatsi eyikatsemesaya Yehova?
-
Twangaminya yo tuti?
Ngoko twangaminya ekiro kikulu ekitetsemesaya Yehova
-
Ekiro ekyo kihambene n’amakangirirya awate omo masako? Eribana ekisubiryo, usonde eriminya nga kyatsuka kiti.
-
Kikaha abandu balebe, ebitunga kutse ebisosekanio by’ekihugho by’olukengerwa olo bitatolere? Tukaha Yehova y’olukengerwa kulenga obuli mundu kandi niye yo tuyiketere erisyabughaho amaghali wosi w’omo kihugho.
-
Emitsye n’amategheko ebikakolekamo sibihulikirirene n’esyokanuni sy’eBiblia? Tutolere itwabya itunerire omo mighendere.
5. Uwatikaye abandi batoke erisikya ebyo wikirirye
Kyanganakala erighana omughulu abandi bamakukuna erisangira okwisikya ekiro kikulu ekitetsemesaya Yehova. Omo menge n’omutima w’erilindirira, ubakaniraye ebyo uyisoghire erikola. Eribana eky’erileberyako ekyangakuwatikya, mulebaye EVIDEO.
Musome Matayo 7:12, neryo musubiraye oko mabulyo ano:
-
Erikwamana n’erisako eri, linatolere iwabwira abomo kihanda kyaghu abate Bimiri ba Yehova uti baleke eryibuka ebiro bikulu?
-
Ni kyahi kyo wangakola erikangania abomo kihanda kyaghu ngoko nomo utendisangira nabo omwibuka ebiro bikulu, ubanzire kandi ni b’omughaso okwiwe?
6. Yehova anzire itwabya n’obutseme
Yehova anzire itwatsemera erilabya endambi yo haghuma n’abomo kihanda kyetu n’abira betu. Musome Omugambuli 8:15, neryo musubiraye oko ribulyo rino:
-
Erisako lino lyamakangania liti ngoko Yehova anzire itwabya n’obutseme?
Yehova anzire abandu biwe ibatsanga haghuma n’abandi n’erilabya endambi yo haghuma nabo. Mulebaye EVIDEO mutoke erilangira ngoko emibere eyo moyalangirika oko muhindano wetu munene w’ekimataifa.
Musome Abanya Galatia 6:10, neryo musubiraye oko mabulyo ano:
-
Linatolere itwalindirira eryibuka ebiro bikulu busana n’“erikolera abandi ebyuwene”?
-
N’ihitya ly’omuhanda wahi lyo lyangakuletera obutseme—ely’erikutandirirya busana n’ekiro kikulu kutse erikalua oko mutima?
-
Hakanayira emighulu Abimiri ba Yehova ibayitsemesya omwiteghekania omwatsi w’embaghane busana n’abana babo nibya n’erihabo ebihembo ebyo batayilindirireko. Wamabya n’abana, ni myatsi yahi y’embaghane eyo wangabakolera eribatsemesya?
ABANDU BALEBE BAKABUGHA BATI: “Eriminya enzuko y’ekiro kikulu siriri n’omughaso. Ebiro bikulu bikatuha akanya k’eritsemera erilabya endambi haghuma n’abomo kihanda kyetu n’abira betu.”
-
Wangasubirya utiki?
MUKIGHA MYATSI YAHI?
Yehova anzire itwatsema erilabya endambi haghuma n’abomo kihanda kyetu n’abira betu. Aliwe kandi anzire itwayighighula okwibuka ebiro bikulu ebitemutsemesaya.
Eriyibukya
-
Ni mabulyo wahi awo twangayibulya awangatuwatikya eriminya akaramu kalebe nga kanatsemesirye Yehova kutse iyehe?
-
Twangawatikya tuti ab’omo kihanda kyetu n’abira betu eriminya emyatsi eyo twikirirye oko biro bikulu?
-
Tukaminya tuti ngoko Yehova anzire itwatsema n’erianza erilabya endambi haghuma n’abandi?
EBINDI EBY’ERIMINYA
Ulangire ebiro bikulu bilebe ebyo Abakristo batesangirako.
“Busanaki Abimiri ba Yehova sibalyibuka ebiro bikulu bilebe?” (Omwatsi w’oko jw.org)
Ulangire emyatsi ini eyikaleka itwikirirya tuti ekiro ky’eributwa sikiritsemesaya Yehova.
“Busanaki Abimiri ba Yehova sibalyibuka ekiro ky’eributwa?” (Omwatsi w’oko jw.org)
Ulangire ngoko abana balere abanzire Yehova banganamutsemesya omughulu wʼesyokonze.
Abakristo bangyi babirisombola eritendisyibuka ekiro kye Nwili. Bakayowa bati busana n’obusomboli obo babirikola?
“Mobasunga ekindu ekyuwene kutsibu” (Munara wa Mulinzi, Tarehe 1 Mwezi wa 12, 2012)
a Ulebaye Endomeko 5 eriminya ekyo wangakola omughulu abandi bakibuka ekiro kikulu kilebe.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
