ESOMO 46
Busanaki litolere iwayiherera oko Yehova?
Ukayiherera oko Yehova omw’imulagha omo musabe uti iye musa yukendibya ukaramya n’erihira erisonda liwe ly’embere omo ngebe yaghu. (Esyonyimbo 40:8) N’enyuma syaho iwabatisibwa. Omughulu ukabatisibawa, ukakanganaya abandi ko wabiriyeherera oko Mungu. Eriyiherera oko Yehova ni mwatsi w’omughaso munene owo tutolere erikola omo ngebe. Ni yisogha ly’omughaso erikendibindula engebe yaghu. Ekyangakuhira m’omuhwa ow’erikola utya niki?
1. Niki kyo kikakuna omundu eriyiherera oko Mungu?
Olwanzo lukatuhira m’omuhwa w’eriyiherera oko Yehova. (1 Yoane 4:10, 19) EBiblia ikatuhana yiti: “Wanze Yehova oMungu wawu n’omutima wawu wosi n’ekirimu kyawu kyosi n’obulengekania bwawu bosi n’amaka wawu wosi.” (Mariko 12:30) Situlikanganaya ko twanzire oMungu omo ebyo tukabugha bisa aliwe n’omo ebyo tukakola. Ngoko omulume n’omukali abanzene bakatahanaya, kutya olwanzo lwetu oko Yehova lukaleka itwayiherera okwiye n’eribatisibwa.
2. Yehova akatsumula ati Abimiri biwe ababatisibwe?
Omughulu ukendisyabatisibwa, ukasyabya iwamingira omo kihanda eky’abandu ba Yehova ekiri m’obutseme. Neryo ukendisyayilangirira olwanzo lw’oMungu omo syonzira nyingyi, kandi ukasyayitunda hakuhi naye kwilaba lino. (Soma Malaki 3:16-18.) Kandi Yehova akasyabya Tata waghu, ukendisyayira abaghala n’abali benyu omo kihugho kyosi abakwanzire kandi abanzire Yehova. (Soma Mariko 10:29, 30.) Nikwa, hane ebyo utolere iwakola embere sy’eribatisibwa. Utolere iwigha eriminya Yehova, erimwanza, n’eribya n’obwikirirya omo Mughala wiwe. N’oko nduli, iwayiherera oko Yehova. Wamabikola emyatsi eyo n’eribatisibwa, ikyanganatokekana okwiwe erisyabana engebe ya kera na kera. Ekinywa ky’oMungu kikabugha kiti: “Eribatisibwa . . . kutya likabalamaya lino.”—1 Petero 3:21.
WIGHE BINGYI
Ulebaye nga utolere iwayiherera oko Yehova n’eribatisibwa busanaki.
3. Itwe bosi tutolere itwasombola nga nindi yo tukendikolera
Omo Israeli ya kera, abandu balebe mobalengekania bati banganakolera Yehova haghuma n’omungu wa mabehi, yo Baali. Yehova mwatuma omuminyereri wiwe Eliya eriyahabula amalengekania wabo ayo. Musome 1 Abami 18:21, neryo musubiraye oko ribulyo rino:
-
Mobasaba Abaisraeli erikola obusomboli bwahi?
Ng’Abaisraeli, tutolere itwasombola nga nindi yo tukendikolera. Musome Luka 16:13, neryo musubiraye oko mabulyo ano:
-
Busanaki sitwangaramya Yehova itunemuramya n’omundu mulebe kutse ekindi kindu?
-
Tukakanganaya Yehova yo tuti ngoko niye yo twamasombola eriramya?
4. Ulengekanaye buli oko lwanzo lwa Yehova okwiwe
Yehova abirituha ebihembo bingyi ebyuwene. Netu niki kyo twangamuha? Mulebaye EVIDEO.
Ni nzira syahi esyo Yehova abirikukanganiamo olwanzo? Musome Esyonyimbo 104:14, 15 na 1 Yoane 4:9, 10, neryo musubiraye oko mabulyo ano:
-
Ni bihembo byahi ebyo Yehova abirikuha ebikaleka iwabya n’erisima?
-
Ebihembo ebyo bikaleka iwalangira Yehova yo wuti?
Omughulu omundu akatuha ekindu ekyo twamatsemera, tukanza erimusima. Musome Eryibuka Ebihano 16:17, neryo musubiraye oko mabulyo ano:
-
Omughulu ukalengekania oko bindu byosi ebyo Yehova abirikukolera, kikakukuna erimuhaki?
5. Eriyiherera oko Yehova likaletera emiyisa mingyi
Abandu bangyi b’ikirirye bati eriminyikala, eriyira omubírí owuwene kutse esyofranga byo bikendibaletera obutseme. Ekyo nina kwenene? Mulebaye EVIDEO, neryo musubiraye oko mabulyo awakwamire.
-
Nomo anabya anzire kutsibu erisata omupira, busanaki mughala wetu mwaleka omubírí wiwe oyo?
-
Mwayisogha eriyiherera, butsira oko eby’omupira, aliwe oko Yehova. Ukalengekanaya uti mwanayisogha ndeke? Busanaki?
Embere abye Mukristo, Omukwenda Paulo abya akakwamirira eriyira omubírí owuwene. Abya iniabirikangiriribwa emighambo y’Abayahudi n’omughalima oyuminyikere kutsibu. Aliwe mwaleka ebyosi ebyo atoke eribya Mukristo. Paulo mwanayikubya bwomo kweki? Musome Abanya Filipi 3:8, neryo musubiraye oko mabulyo ano:
-
Busanaki Paulo mwabugha ati ebyo abya akakola embere sy’eribya Mukristo byabya “bibaya” kutse ekyabu?
-
Omo mwanya wabyo mwabana ndundi yahi?
-
Wangalingirirania wuti erikolera Yehova n’eyindi nzira eyo wangakolesyamo engebe yaghu?
Omughulu Paulo abya Mukristo, mwabana bingyi kwilaba ebyo asighanaya
ABANDU BALEBE BAKABUGHA BATI: “Ni bukiru eriherera engebe yetu y’oko Mungu”
-
Busanaki iwe ukalangira uti ni mwatsi w’amenge eriyiherera oko Yehova?
MUKIGHA MYATSI YAHI?
Olwanzo lo lukatukuna eriyiherera oko Yehova n’eribatisibwa.
Eriyibukya
-
Busanaki tutolere itwanza Yehova n’omutima wetu wosi n’erimuramya?
-
Yehova akatsumula ati Abimiri biwe ababiribatisibwa?
-
Naghu unanzire eriyiherera oko Yehova?
EBINDI EBY’ERIMINYA
Ulangire ekyaleka mwali wetu (oyo wabya mwimbi oyowasibwe) na mughala wetu (oyo wabya musati w’omupira oyuminyikere) ibayiherera oko Yehova.
Vijana Huuliza—Nitayatumiaje Maisha Yangu?—Kukumbuka Yaliyopita (6:54)
Ulengekanaye oko sindi nzumwa esyangaleka omundu iniayiherera oko Yehova.
“Busanaki utolere iwayiherera oko Yehova?” (Mnara wa Mlinzi, Januari 15, 2010)
Omo video y’omuzike eno, langira obutseme obo abakayiherera oko Yehova bakabana.
Omughulu ukendisoma omwatsi: “Omo myaka mingyi ingayibulaya: ‘busanaki tuli oko kihugho,’” ulangire ekyahira omo mukali oyo m’omuhwa ow’eritasyatsungusya ebyo akahira embere omo ngebe yiwe.
“EBiblia ikabindula esyongebe sy’abandu” (Munara wa Mulinzi, Tarehe 1 Mwezi wa 11, 2012)
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
