ESOMO 49
Obunyumba bwaghu bwangabya m’obutseme buti?—Ekitswe 1
Abalunga bahya-bahya bakalengekanaya bati obutseme obo balyabya nabo omo kiro ky’endwa bo bakendisyabyamo mughulu wosi. Kwenene kyanganatokekana. Abakristo abamabibugha omo ndwa mo biro bingyi kandi ababiriyikasa erikolesya amahano awali omo Biblia banasi ngoko kyanganatokekana eribya n’obutseme omo bunyumba.
1. EBiblia ikaha abalume bo rihano lyahi?
Yehova abiriha omulume y’omubírí w’eribya mutwe w’ekihanda. (Soma Abanya Efeso 5:23.) Yehova anzire ati kundi omulume yuli n’ekinywa ky’omwiso omw’isoha emyatsi, litolere iniabya akasoha ebikendiletera ekihanda kyosi ky’endundi. EBiblia ikahana abalume yiti: “Mwanze abakali benyu.” (Abanya Efeso 5:25) Ekyo ni bughambuki? Omulume w’olwanzo akakolera mukali wiwe y’omo lukogho, omughulu bali eka nibya n’omughulu bali ahali abandi bandu. Akamuteghaya n’eriyikasa erimutsemesya n’erimuha ebyo ayitaghire. (1 Timoteo 5:8) Eky’omughaso munene, omulume akawatikaya mukali wiwe eriwatya obwira bwiwe haghuma na Yehova. (Matayo 4:4) Eky’erileberyako, akasoma eBiblia n’erisaba haghuma na mukali wiwe. Omughulu omulume akatsomana mukali wiwe y’omo lwanzo, akabya n’obwira obuwene na Yehova—Soma 1 Petero 3:7.
2. Ni rihano lyahi eryo eBiblia ikaha abakali?
Ekinywa ky’oMungu kikabugha kiti omukali “atolere iniakenga kutsibu iba wiwe.” (Abanya Efeso 5:33) Angatoka erikola atya ati? Anganalengekania oko mibere mibuya ya mwira wiwe kandi ngoko akayikasa erimutsomana haghuma n’abana babo. Kandi anganakangya erisikya omwiwatikya mwira wiwe omughulu akayisogha erikola omwatsi mulebe n’omwikania okwiye ko ndeke nomo angabya isyaliramaya Yehova.
3. Omulume n’omukali bangawatya obwira bwabo bo bati?
Omughulu eBiblia ikakanaya oko abatahenie, ikabugha yiti: “Ababiri basyabya mubiri mughuma.” (Matayo 19:5) Ekyo ni bughambu batolere ibayikasa kutsibu eritendilighira ekindu kyo-kyosi kibaghabule kutse eriolobya olwanzo lwabo. Bakakola batya omwibya bakalabya endambi yo haghuma n’eritendibisana ebyo owundi akalengenaya kutse ngoko akayowa. Bakalangira Yehova musa mo w’omughaso kutsibu kulenge obuli kindu kyosi. Obuli mundu akayiteghaya kutsibu eritendiyira owundi mundu mo mwira wiwe kutsibu kwilaba mukali kutse mwira wiwe.
WIGHE BINGYI
Ulebaye esyokanuni sy’eBiblia esyangawatya endwa yawu.
4. Balume—mwanze abakali benyu n’eribasugha
EBiblia ikabugha yiti “abalume banze abakali babo ko bakanza emibiri yabo.” (Abanya Efeso 5:28, 29) Eryo ni bughambuki? Mulebaye EVIDEO, neryo musubiraye oko ribulyo erikwamire.
-
Omulume angakangania ngoko anzire mukali wiwe n’erimutsomana omo nzira syahi?
Musome Abanya Kolosai 3:12, neryo musubiraye oko ribulyo rino:
-
Omulume angakangania ati emibere eyo y’omo bunyumba?
5. Bakali—mwanze abira benyu n’eribasikya
EBiblia ikabugha yiti omukali atolere inianza mwira wiwe nomo angabya isyaliramaya Yehova. Musome 1 Petero 3:1, 2, neryo musubiraye oko mabulyo ano:
-
Omwira wawu amabya isi Mwimiri wa Yehova, ahate eritika-tika wanzire iniatsuka eriramya Yehova. Wangakolaki erimuwatikya? Ukalengekanaya uti ry’eribya ukamuhubirya, kutse eribya n’emibere mibuya n’erimusikya? Busanaki?
Abatahenie bakakola obusomboli kutse erisoha emyatsi yo kughuma. Aliwe, hanganayira endambi omukali iniatalighirana n’obusomboli bwa mwira wiwe. Neryo aho anganabwira mwira wiwe y’amalengekania wiwe omo bolo n’omwimusikya, aliwe inianasi ngoko Yehova ahere omulume y’ehamuli y’erisombola ekyangaletera ekihanda ky’endundi. Atolere iniayikasa erihamba mwira wiwe yo buke bwa kuboko. Omwikola atya, akawatikaya obunyumba eribyamo obutseme. Musome 1 Petero 3:3-5, neryo musubiraye oko ribulyo erikwamire:
-
Yehova akayowa ati omughulu omukali akakanganaya kw’asikirye mwira wiwe?
6. Mwanganasinga eritendihulikirirana omo ndwa yenyu
Sihali endwa eyihika-hikene. Busana n’ekyo, omulume n’omukali batolere ibakola kughuma eribughaho eritendihulikirirana lyabo. Mulebaye EVIDEO, neryo musubiraye oko mabulyo awakwamire.
-
Omo video, niki kyo kikakanganaya ngoko omulume n’omukali wiwe babya isibakiri n’obwira obuwene?
-
Mobakolaki eritasyawatya endwa yabo?
Musome 1 Abanya Korinto 10:24 na Abanya Kolosai 3:13. Mwabisoma obuli risako, neryo imwasubirya oko ribulyo rino:
-
Erikolesya erisako lino lyanganawatya liti endwa?
EBiblia yikabugha yiti tutolere itwasikania. Omwisikya mo mune n’erikolera abandi bw’omo nzira eyuwene. Musome Abanya Roma 12:10, neryo musubiraye oko mabulyo ano:
-
Omukali yutolere iniatsuka erikangania erisikya mwira wiwe kutse omulume yutolere iniatsuka erikangya mukali wiwe y’erisikya? Busanaki?
ABANDU BALEBE BAKABUGHA BATI: “Ingye now’omwaghe situkiri bira ngoko twabya”
-
Wangabwirabo utiki batoke eriminya ngoko eBiblia yanganabawatikya?
MUKIGHA MYATSI YAHI?
Omulume n’omukali bamabianzana, erisikania, n’erikolesya esyokanuni sy’eBiblia ibanganabya n’obutseme.
Eriyibukya
-
Omulume angawatikya ati endwa ibye m’obutseme?
-
Omukali angawatikya ati endwa ibye m’obutseme?
-
Wamabya iwune omo bunyumba, ni kanuni yahi y’eBiblia yo yangawatikya endwa yitoke eriwata?
EBINDI EBY’ERIMINYA
Wighe ebyo wangakola utoke eribya n’obunyumba obulimo obutseme.
Ulebaye evideo y’omuziki eyikakanganaya emiyisa eyikasira omw’ikolesya esyokanuni sy’eBiblia sy’omo ndwa.
Ulangire nga kiri n’amaanaki erisikya mwira waghu kusangwa yuli n’omuheke w’erisondola obunyumba.
“Bakali, busanaki mutolere imwasikya ehamuli?” (Mnara wa Mlinzi, Mei 15, 2010)
Ulangire ngoko amahano w’eBiblia anganawatikya endwa yaghu.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
