Yesu yo mutwe w’endeko y’eKikristo. (Abanya Efeso 5:23) Munabwire, Yesu anemusondola abigha biwe erilabira “omughombe oyuteleghula n’owamenge,” inyane elubula. (Soma Matayo 24:45.) Enyuma sy’erisombolwa na Yesu Kristo iyuwene-wene, “omughombe” oyo endibya n’ehamuli nyilebe aliwe atolere iniakwama obusondoli bwa Kristo n’erikolera abaghala babo Kristo. Omughombe oyo nindi? Omughombe akatukolera ati?

1. “Omughombe oyuteleghula n’owamenge” nindi?

Eritsuka kera, Yehova abeghere erikolesya omundu kutse akakumula kake k’abandu eriha abandu biwe b’obusondoli. (Malaki 2:7; Abaebrania 1:1) Yesu abere abihola, abakwenda biwe haghuma n’abasyakulu b’endeko abe Yerusalema mobatsuka erisondola. (Emibiri 15:2) Lino kutya, ekikuto kike ky’abasyakulu kyo kikasondola. Ekikuto ekyo, kikahulawamo, Kyaghanda Ekikasondola eky’Abimiri ba Yehova, kandi kyo kikatuha akalyo k’obunya-kirimu n’erisondola omubírí w’eritulira. Ekikuto ekyo yo ‘mughombe oyuteleghula n’owamenge oyo [Yesu] asombola.’ (Matayo 24:45a) Abasyakulu bosi abali omo Kyaghanda Ekikasondola ni Bakristo abahirirweko amaghuta abawite amaha w’erisyatabala na Kristo omo Bwami bw’elubula babibugha engebe yabo y’oko kihugho.

2. Ni kalyo ki ak’obunya-kirimu ako omughombe oyuteleghula akatuha?

Yesu mwabugha ati omughombe oyuteleghula “asyaha [Abakristo balikyabo] akalyo kabo oko ndambi eyitolere.” (Matayo 24:45b) Ngoko akalyo ako tukalya kakatuwatikaya eribya n’omubiri owakalire, akalyo ak’obunya-kirimu kutse ak’omutima nako, ni bughambu emyatsi eyikalua omo Kinywa ky’oMungu, kakatuwatikaya eribya n’akaghala ako tulaghireko eribya bataleghula oko Yehova n’erikola omubírí owo Yesu abugha ati tukole. (1 Timoteo 4:6) Tukabana akalyo k’obunya-kirimu ako k’omo nzira y’emihindano y’endeko, emihindano minene-minene, kandi n’omo nzira y’ebitsapo ebihulikirirene n’eBiblia n’esyovideo, ebikatuwatikaya eriminya ndeke erisonda ly’oMungu n’erituwatikya eribya n’obwira obuwene haghuma naye.

 WIGHE BINGYI

3. Litolere Abandu ba Yehova ibabya bandu abayitondekire

Ekyaghanda Ekikasondola kikateghekanaya omubírí w’Abimiri ba Yehova, omwikwama obusondoli bwa Yesu. Yesu kw’anasondola Abakristo b’erimbere b’atya. Mulebaye EVIDEO.

Musome 1 Abanya Korinto 14:33, 40, neryo musubiraye oko ribulyo rino:

• Emilondo eyi yamakangania yiti ngoko Yehova anzire Abimiri biwe ibabya bandu abayitondekire?

4. Omughombe oyuteleghula akasondola omubírí wetu w’eritulira

Eritulira wo wabya mubírí w’omughaso munene owo Bakristo ab’erimbere babya bakakola. Musome Emibiri 8:14, 25, neryo musubiraye oko mabulyo ano:

• Omo Bakristo ab’erimbere, oyo wabya akasondola omubírí w’eritulira nindi?

• Petero na Yoane mob’angirira bati obusondoli bw’abakwenda balikyabo?

Eritulira w’omubírí munene owo Ekyaghanda Ekikasondola kikimanira. Mulebaye EVIDEO.

 Yesu mwakangania ngoko eritulira ni mubírí w’omughaso munene. Musome Mariko 13:10, neryo musubiraye oko mabulyo ano:

• Busanaki omubírí w’eritulira ni w’omughaso munene oko Kyaghanda Ekikasondola?

• Busanaki tulaghire oko bwimaniri bw’“omughombe oyuteleghula n’owamenge” omo mubírí owakakolawa omo kihugho kyosi oyu?

5. Omughombe oyuteleghula akatuha obusondoli

Ekyaghanda Ekikasondola kikaha Abakristo ab’omo kihugho kyosi b’obusondoli. Ekyaghanda Ekikasondola ekyo kikayira kiti eribana obusondoli obw’erituha? Tulebaye ngoko ekyaghanda ekikasondola eky’oko mughulu w’abakristo b’erimbere kyabya kikakola. Musome Emibiri 15:1, 2, neryo musubiraye oko mabulyo ano:

• Abakristo ab’erimbere mobatahulikirirana oko mwatsi wahi?

• Paulo, Barnaba n’abandi mobasondya obusondoli obw’erisoha olubanza olo bo hayi?

Musome Emibiri 15:12-18, 23-29, neryo musubiraye oko ribulyo rino:

• Embere sy’eriyisogha, ekyaghanda ekikasondola eky’oko mughulu w’Abakristo ab’erimbere, mokyayira kiti kitoke eribana obusondoli bw’oMungu oko mwatsi oyo?​—Ulebaye emilondo 12, 15, na 28.

Musome Emibiri 15:30, 31 na 16:4, 5, neryo musubiraye oko mabulyo ano:

• Abakristo ab’erimbere mob’angirira bati obusondoli obwalua oko kyaghanda ekikasondola?

• Yehova mwatsumulabo ati busana n’erikwama obusondoli obo?

Musome 2 Timoteo 3:16 ne Yakobo 1:5, neryo musubiraye oko ribulyo rino:

• Munabwire Ekyaghanda Ekikasondola kikabana obusondoli bo hayi omughulu kikasonda eriyisogha oko mwatsi mulebe?

 MUKIGHA MYATSI YAHI?

Ekyaghanda Ekikasondola “y’omughombe oyuteleghula n’owamenge” oyo Yesu ahiraho. Ekyaghanda ekyo kikaha Abakristo b’omo kihugho kyosi obusondoli n’akalyo k’obunya-kirimu.

Eriyibukya

• Oyo wahiraho “omughombe oyuteleghula n’owamenge” nindi?

• Ekyaghanda Ekikasondola kikatuwatikaya kiti?

• Unikirirye ngoko Ekyaghanda Ekikasondola “y’omughombe oyuteleghula n’owamenge”?