ESOMO 56
Uwatikaye erihira obughuma bw’omo ndeko
Omughulu tuli haghuma n’abaghala n’abali betu, tukayowa ng’omwami Dawidi oyo wabugha ati: “Ni ky’eriswekya kandi ni kibuya abandu b’oMungu bakikala haghuma ng’abana abasubeneko!” (Esyonyimbo 133:1) Obughuma bwetu sibuliyasira ibwibene-bene. Obuli mughuma w’okwitwe akawatikaya eriteya obughuma bwetu.
1. Niki kyo kikatsemesaya omo kati-kati k’abandu b’oMungu?
Wamaya oko mihindano y’endeko k’omo kindi kihugho, kwa muhwa wanganataluka eriowa ebyo bakabugha, aliwe omo nzira nyingyi iwukendiyowa nga une eka. Busanaki? Kusangwa tukigha eBiblia omwikolesya ebitsapo bighumerera omo kihugho kyosi. Kandi tukayikasa eryanzana. Nomo twangabya itwikere hayi, itwe bosi “tukalakira erina lya Yehova, erimuramya omo bughuma.”—Zefania 3:9.
2. Wangayira wuti utoke eriwatikya okwilolya obughuma bwetu bw’embere?
“Litolere imwanzana n’emitima yenyu yosi n’omuhwa.” (1 Petero 1:22) Wangakolesya wuti erihano eryo? Omo mwanya w’eribya ukalangira emibere y’abandi eyituwene, uyikase erilangira emibere yabo eyuwene. Isiwabya ukalabya endambi n’abandu abakusosire kutse abakatsemera emyatsi eyo ukatsemera basa, aliwe uyikase eriminya abaghala n’abali betu abate ng’iwe. Kandi litolere itwayikasa kutsibu erileka emibere mibi y’eribya tukasolola abandi.—Soma 1 Petero 2:17. a
3. Wangakolaki omughulu hamabya eritendihulikirirana omo kati-kati kaghu n’owundi Mukristo mulikyenyu?
Nomo tune omo bughuma, situhika-hikene. Hakanabya akatambi itwakoserana kutse itwaghalya abandi. Ekinywa ky’oMungu kikatubwira kiti ‘tuganyirane . . . tubuyirane omugulu omundu awite omwatsi oko gundi,’ kikatasyatomekako kiti: “Ngoko Yehova ababuyira, nenyu ko mwangabuyira abandi bo mutya.” (Soma Abanya Kolosai 3:13) Twabirihitania Yehova yo ngendo nyingyi kutsibu, aliwe mwatughanyira. Busana nekyo naye akatusaba erighanyira abandi. Twamabilangira tuti twabirikosera owundi, tuyikase erikokotya emyatsi.—Soma Matayo 5:23, 24. b
WIGHE BINGYI
Ulengekanaye oko myatsi eyo wangakola utoke erisangira oko bughuma n’obuholo omo ndeko.
Ukendikola wuti erirondya obuholo?
4. Uyihighule oko mibere mibi y’erisolola abandi
Litolere itwanza abaghala n’abali betu bosi. Aliwe kyanganatukalako eryanza omundu oyuli n’emikulire n’emitsye eyitasosene n’eyetu. Ekyangatuwatikya erikinda emibere mibi oyo niki? Musome Emibiri 10:34, 35, neryo musubiraye oko mabulyo ano:
-
Yehova akaligha abandu abakalua omo bihanda byosi babye Bimiri biwe. Ekyo kikaleka itwalangira abandu abatakulira omo mibere eyisosire eyetu bo tuti?
-
Ni mihanda yahi eya kasololo eyiswire ewenyu eyo wanzire eriyihighulako?
Musome 2 Abanya Korinto 6:11-13, neryo musubiraye oko ribulyo rino:
-
Wangayira wuti erikulya olwanzo lwaghu oko baghala n’abali betu bosi?
5. Ughanyire erilua oko mutima n’erihiraho obuholo
Yehova akatughanyira n’omo ate angalagha okwighanyira lyetu ko n’ahake. Musome Esyonyimbo 86:5, neryo musubiraye oko mabulyo ano:
-
Yehova akaghanyira omo lulengo lwahi?
-
Busanaki ukatsemera erighanyira liwe?
-
Ni myatsi yahi eyangaleka ikyatukalako eribya omo bughuma n’obuholo n’abandi?
Twangakwama emibere ya Yehova yo tuti n’erisighala omo bughuma n’abaghala n’abali betu? Musome Emisyo 19:11, neryo musubiraye oko mabulyo ano:
-
Omundu amakukosera kutse erikuhitania, wangayira wuti erikokotya emyatsi?
Hakanabya akatambi itwakosera abandi. Ekyo kyamahika, twangayira tuti? Mulebaye EVIDEO, neryo musubiraye oko ribulyo erikwamire.
-
Omo video, mwali wetu mwakayira ati erihiraho obuholo?
6. Ubye ukalebya emibere mibuya y’abaghala n’abali betu
Omughulu tukaminya ndeke abaghala n’abali betu, tukafumbula emibere mibuya yabo n’obulema bwabo. Niki kyo kyangatuwatikya erilangira kutsibu emibere yabo eyuwene? Mulebaye EVIDEO, neryo musubiraye oko ribulyo rino.
-
Niki kyo kyangakuwatikya erilangira emibere eyuwene ey’abaghala n’abali betu?
Yehova akalebaya emibere yetu mibuya. Musome 2 Emyatsi y’Emigulu 16:9a, neryo musubiraye oko ribulyo rino:
-
Wamayowa wuti eriminya ngoko Yehova akalebaya emibere yaghu mibuya?
Nibya n’ediama eyuwene ikanabyako ehikosa, aliwe ekyo sikirileka iyaherya obughuli bwayo. Kutya, abaghala n’abali betu bosi sibahika-hikene, aliwe ni b’omughaso munene omo meso wa Yehova
ABANDU BALEBE BAKABUGHA BATI: “Ingye ngaghanyira oyutolere erighanyirwa.”
-
Busanaki litolere itwabya bangu erighanyira abandi?
MUKIGHA MYATSI YAHI?
Twanganasangira oko bughuma omo ndeko omw’ibya tukaghanyira n’erikangania abaghala n’abali betu bosi b’olwanzo.
Eriyibukya
-
Wangakinda wuti emibere mibi y’erisolola abandi?
-
Wangakolaki omughulu hamabya eritendihulikirirana omo kati-kati kaghu n’oghundi Mukristo mulikyenyu?
-
Busanaki wanzire erigha erikwama emibere ya Yehova y’erighanyira abandi?
EBINDI EBY’ERIMINYA
Ulebaye ngoko omusyo mughuma wa Yesu angatuwatikya eritendibya n’akasololo oko bandi.
Linatolere itwasaba obughanyiri twamalengekania tuti situtakola kibi kyosi-kyosi?
“Erisaba obughanyiri rikaleka ihabya obuholo” (Mnara wa Mlinzi, Novemba 1, 2002)
Ulebaye abalume babiri abakulira omo kihugho ekirimo erisolola abandu busana n’erangyi y’omubiri, ngoko bigha eryanzana.
Johny na Gideoni: Ababya nzighu kera, lino ni baghala (6:42)
Ulangire ngoko wangabugha olubanza olo uli nalo n’omundu mulebe omo ndeko embere lutsandaye obuholo omo ndeko.
“Ngoko twangabugha eritendihulikirirana omo lwanzo” (Munara wa Mulinzi, Mwezi wa 5, 2016)
a Endomeko 6 ikakanganaya ngoko olwanzo lukakuna Abakristo eritendisighalirania amakoni.
b Endomeko 7 ikakanganaya ngoko twangasoha emyatsi y’obuhulikirirane obulebirye esyofranga n’emighambo ye Leta.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
