ESOMO 55
Uwatikaye endeko yenyu
Omo kihugho kyosi amamiliyoni w’abandu banemuramya Yehova n’obutseme omo syondeko nyingyi. Bakasima kutsibu busana n’erighisibwa haghuma n’obusondoli obo bakahabawa, kandi bakawatikaya n’omuhwa endeko omo nzira nyingyi. Nawu unemukola utya omo ndeko yenyu?
1. Wangakolesya endambi n’akaghala kaghu eriwatikya endeko y’omo nzira nyilebe syahi?
Itwe bosi twanganayira omo ndeko mw’ebyo twanganawatikyamo. Omo ndeko yenyu mune abandu abakekeluhire n’abalema? Wanganawatikyabo erighenda oko mihindano? Kutse wanganawatikyabo oko yindi mibírí ng’eriyabaghulira ebindu kutse oko yindi mibírí y’eka? (Soma Yakobo 1:27.) Twanganawatikya oko mubírí w’eryerya n’ow’erikokotya eKisenge kyetu ky’oBwami. Sihali oyukatukasa erikola emyatsi eyo. Olwanzo lwetu oko Mungu n’oko baghala betu lo lukatukuna “eriyiherera omwanza lyetu.”—Esyonyimbo 110:3.
Abaghala n’abali betu ababatisibwe banganawatikya endeko y’omo sindi nzira. Abaghala betu ababirikulya emibere eyisabirwe n’eBiblia banganawatikya endeko omw’ikola omubírí w’abaghombe bawatikya kutse ow’abasyakulu b’endeko. Abaghala n’abali betu banganawatikya n’omuhwa omo mubírí w’eritulira omw’ikola omubírí w’obupainia. Abaghala n’abali betu balebe banganawatikya oko mubírí w’erihimba ebisenge by’eriramiryamo kutse ibahumira eyiri endeko eyilaghire oko buwatikya omo sindi nzira.
2. Twangakolesya tuti esyofranga syetu n’ebindu ebyo tuwiteko eriwatikya endeko?
Twanganasikya Yehova “omo bindu byetu by’obughuli, NWT.” (Emisyo 3:9) Tukatsema eriteka oko syofranga syetu n’oko bindu byetu eriwatikya endeko yetu n’omubírí w’eritulira w’omo kihugho kyosi. (Soma 2 Abanya Korinto 9:7.) Ebihembo byetu bikanakolesibawa eriwatikya abalyahikirawa n’obuhanya. Abandu bangyi babeghere ‘eribika ekihande ky’endundi [ekyo bakabana]’ batoke eritekakyo mo bihembo. (Soma 1 Abanya Korinto 16:2.) Twanganateka ebihembo byetu by’omo hisanduku ehy’eritekamo ebihembo ehikabanika eyo tukaramiraya, kutse oko enternete oko donate.pr418.com. Yehova akatuha akanya k’erimukangania ko tumwanzire omo nzira eyo tukakolesaya mw’ebindu ebyo tuwiteko.
WIGHE BINGYI
Ulangire esyonzira mbiriri-mbiriri esyo twangawatikiryamo endeko.
3. Twanganakolesya ebindu ebyo tuwiteko
Yehova na Yesu banzire abakahitaya n’obutseme. Eky’erileberyako, Yesu mwasima omukwakali oyo wabya n’olufranga luke neryo amayikasa eritekalo mo kihembo. Musome Luka 21:1-4, neryo musubiraye oko mabulyo ano:
-
Litolere itwateka esyofranga nene imo twatsemesya Yehova?
-
Yehova na Yesu bakayowa bati omughulu tukahitaya erilua oko mutima?
Eriminya ngoko ebihembo byetu bikakolesibawa, mulebaye EVIDEO. Neryo musubiraye oko ribulyo rino.
-
Ebihembo ebyo tukateka bikakolesibawa biti eriwatikya esyondeko omo kihugho kyosi?
4. Twanganayiherera eriwatikya
Omo mughulu wa kera, abaramya ba Yehova ibakayiherera n’omuhwa eriwatikya oko mubírí w’erikokotya emyanya y’eriramiryamo. Aliwe omubírí w’erikokotya oyo isyalisaba eriteka esyofranga lisa. Musome 2 Emyatsi y’Emigulu 34: 9-11, neryo musubiraye oko ribulyo rino:
-
Obuli Mwisraeli iniakawatikaya ati erisugha enyumba ya Yehova kutse aho bakaramiraya?
Erilangira ngoko Abimiri ba Yehova lino banemukwama eky’erileberyako ky’abandu ba kera ekyo, mulebaye EVIDEO. Neryo musubiraye oko mabulyo awakwamire.
-
Busanaki ni ky’omughaso eribya tukerya n’eryuwania eKisenge kyetu ky’oBwami?
-
Twanganawatikya omo syonzira syahi?
5. Abaghala betu banganakulya emibere eyisabirwe erikola bingyi omo ndeko
Amasako akasaba Abakristo b’obulume erikola ngoko bangatoka batoke eriwatikya endeko. Erilangira eky’erileberyako kighuma, mulebaye EVIDEO. Neryo musubiraye oko ribulyo erikwamire.
-
Omo video, mughala wetu Ryan mwayikasa ati erikulya emibere eyisabirwe atoke eriwatikya endeko yo ndeke?
EBiblia ikakanganaya emibere eyo baghala betu batolere ibakulya imobatoka erikola omubírí mo baghombe bawatikya kutse basyakulu b’endeko. Musome 1 Timoteo 3:1-13, neryo musubiraye oko mabulyo ano:
-
Litolere baghala betu ibakulya emibere yahi imobatolera eribya baghombe bawatikya kutse basyakulu b’endeko?
-
Ni mibere yahi eyisabirwe ab’omo bihanda byabo?—Ulebaye emilondo 4 ne 11.
-
Omughulu abaghala betu bakayikasa erikulya emibere eyo, obuli mundu omo ndeko akabana ndundi yahi?
OMUNDU ANGANABULYA ATI: “Abimiri ba Yehova bakabana esyofranga esy’erikolamo omubírí wabo syo hayi?”
-
Iwe wangasubirya utiki?
MUKIGHA MYATSI YAHI?
Yehova akatsema kutsibu omughulu tukaherera endambi yetu, akaghala ketu, n’ebindu byetu eriwatikya endeko.
Eriyibukya
-
Twangakolesya tuti akaghala ketu n’endambi yetu eriwatikya endeko?
-
Twangakolesya tuti ebindu byetu eriwatikya endeko?
-
Iwe wanganawatikya endeko y’omo nzira syahi?
EBINDI EBY’ERIMINYA
Ulangire oMungu ng’aleka eribya akasaba abaramya biwe eriteka ekighuma ky’okwikumi busanaki.
“EBiblia ikabugha yitiki okwiliha ekighuma ky’okwikumi?” (Omwatsi w’oko jw.org)
Ebiblia ikaha abalume ababatisibwe bʼemibiri milebe. Nikwa byangabya biti omukali oyubatisibwe amanza erikola emibiiri eyo?
‘Ehamuli yʼabasyakulu omo ndeko’ (Akaleberyo kʼOmuteya, omwisi 2, 2021)
Ulebaye abaghala betu balebe ab’omuhwa abakayiherera kutsibu eritwalira abaramya balikyabo b’ebitabu.
Ngoko ebitsapo bikatwalawa omo biharo mbiriri-mbiriri omo R. D. Congo (4:25)
Ulangire ngoko enzira y’erisungamo esyofanga esikawatikaya erighendesya omubírí wetu yisighene n’ey’ebindi bisomo.
Langira na bino
EBYO BANDU BABEGHERE ERIBULYA
Erigha eBiblia n’Abimiri ba Yehova likakolawa liti?
Wanganakolesya eBiblia eyo wanzire ukigha haghuma n’Abimiri ba Yehova omo nzira y’erikanirania. Mukigha, wanganakokya ekihanda kyaghu kyosi kutse omwira waghu.
