Amalwa awakalaba e Ukraine mwakakanganaya ngoko abakulu bangyi b’ebisomo ebikayahula mo by’Ekikristo b’akimira amalwa. Tulangire ngoko bakimira esyombande ibiri esikalwa:

•   “Abasuda betu bosi abakalwira oko kihugho ekye Ukraine batolere erisikibwa kutsibu n’erisimwa . . . Tune haghuma nenyu omo mitima kandi tunemubasabira.”​—Ebyo ni binywa by’omukulu w’ekisomo eky’Abaortodoxe oyukahulawamo Métropolite Épiphane I owe Kiev ebya sakawa omo syongulu esy’ekiro 16 Omwisi 3, 2022, omo gazeti eye Jerusalem Post.

•   “E Moscou yikalola embere n’amalwa omo Ukraine, Omukulu w’ekisomo eky’Abaortodoxe owe Burusi mwakola ekisomo omo Yenga busana n’Abasuda b’eBurusi. Mwakola ekisomo ekyo busana n’eribahira m’omuhwa w’erilola embere erilwira oko kihugho kyabo ati kundi ‘abanya-Burusi basa bo bangalwira ndeke oko kihugho kyabo.’”​—Esyongulu esye gazeti Reuters, esy’ekiro 3 Omwisi 4, 2022.

 Abakristo banganakola oko malwa? EBiblia ikabugha yitiki?

 EBiblia ikakanganaya ngoko abakakwama Yesu Kristo omo kwenene sibaliyingiraya omo myatsi y’amalwa.

•   “Subaya omuyali gʼomo lubo lwago; kusangwa abosi abakawata oko muyali, basyahera omo muyali.”​—Matayo 26:52.

   Neryo omundu oyukimira amalwa kutse oyukakola oko malwa, kwenene kwenene anemukwama ebinywa bya Yesu ebyo?

•   “Ngabaha ekihano kihyakihya nyiti, mwanzane. Ngoko nabiribanza, nenyu mwanzane mutya. Neryo mwamabya nʼolwanzo, omuguma busana nʼogundi, abandu bosi basyaminya ko muli biga bage.”​—Yoane 13:34, 35.

   Neryo omundu oyukimira amalwa, kwenene kwenene anemukangania Olwanzo olo Yesu abugha ati lwangaminyikerye abigha biwe, nibughambu abakamukwama?

 Eriminya bingyi, soma omwatsi “Abakristo bakanimira amalwa?”

 Nina kyamenge Abakristo ba munabwire eritendiyingirya omo myatsi y’amalwa? Ingaa. EBiblia muyabugha embere yiti omo biro byetu, ebikahulawa mo “ebiro by’enyuma,” hangabere abandu erilua omo bihanda byosi abatendi ‘syaswagesibwa amalwa,’ ngoko Yesu naye anakangiriraya.​—Isaya 2:2, 4.

•   Eriminya bingyi, soma emyatsi eyikabya ikasa omo Akaleberyo eyiwite omutwe, “OMungu akalangira ati amalwa?”

 Hakisiya hake Yehova, a ‘OMungu omwinye buholo,’ akendikolesya obutabali bwiwe obuli omo lubula erilamya abandu “okw’inubya n’obwaga.”​—Abanya Filipi 4:9; Esyonyimbo 72:14.

•   Erilangira ngakendisyakola ekyo ky’ati, lebaya evideo Obwami b’oMungu niki?