Abandu bangyi bakalengekanaya bati omundu oyukahanga-hangaya y’omundu oyukwire obuba bunene, a omundu oyo kikakalako erilua omo ngyingo omo tututu, kutse omundu oyukakanaya mughulu wosi oko myatsi eyikamubahisaya.

 Ni kwenene, abandu balebe ko bakakola batya omughulu bakahanga-hangaya. Aliwe abakakwesa-kwesa emyatsi bati abandi bandu—kutsibu-tsibu abalume—bakanabya nga bamayiwata ghundi muhanda. Eripoti nguma yikakanganaya ngoko abalume “banganayikoberya omo bwabu n’erikolesya esyodawa esikatamiraya omughulu bakahanga-hangaya. Neryo mwanganalengekania muti obwabu lo lubanza kwesi erihangya-hangya iryolikaleka inyabya akanywa bunene. Kandi kangyi-kangyi abalume abakakwa ekinigha n’erihitana luba-luba, kikabya ini busana n’erihangya-hangya.”

 Eribugha ekwenene, abalume bosi sibaliyiwata batya. Aliwe nomo mundu angayiwata ati, abalume erihangya-hangya ni lubanza olunemukanyirira omo “migulu ikalire” eno. (2 Timoteo 3:1) Wamabya ighunemulwa n’erihangya-hangya, eBiblia yanganakuwatikya kwe?

 EBiblia yiri mw’amahano mangyi w’eriyiketerwa awangatuwatikya omughulu tukahanga-hangaya. Tulebaye awasatu wa kugho.

1.  1. “Simuyiluhaye n’amaganiryo busana n’omo ngyakya; kusangwa engyakya yasyabya n’amaganiryo wayo. Obuli kiro kiwite obulige bungaho.”—Matayo 6:34.

    Ekyo ni bughambu: Situtolore erihangya-hangya kutsibu busana emyatsi eyangahika kutse eyiteyangayahika omo biro ebikasa. Kangyi-kangyi, emyatsi siyiribya ngoko tukasagha tuti yasyabya. Oko ndambi silebe, nibya emyatsi yanganuwana ngoko tutalue tulengekenie.

    Terikola kino: Uteryibuka omughulu mulebe omo biro ebyabirilaba owo wabya ulighire uti hakendibya omwatsi mubi mulebe—aliwe mwatabya. Nikwa ulengekanaye oko ebikakuhanga-hangaya lino n’eriyibulya kwenene-kwenene nga byasyabya mbanza esikalire.

2.  2. “Ekyuma kikagusungula ekindi kyuma; N’omundu kw’akagusungula atya obusu b’omwira wuwe.”—Emisyo 27:17.

    Ekyo ni bughambu: Abandi banganatuwatikya erilwa n’erihangya-hangya lyetu twamalighirabo. Banganatuha amahano malebe awanganatuwatikya erikwamana n’ebyo babirilabamo. Banganatuwatikya hake eritendibya n’amalengekania awatuwene oko mibere eyo tulimo n’erituha amaha.

    Terikola kino: Uterilengekania oko mundu mulebe oyo wangakuha erihano eryuwene, ng’omunywani waghu oyo wabirilaba omo mwatsi owakalire owali ng’ogho ukalabamo. Umubulaye ebyamutikaya n’ebitamuwatikaya.

3.  3. ‘Muhire erihangyahangya lyenyu oko Mungu, kusangwa akabategaya.’—1 Petero 5:7.

    Ekyo ni bughambu: OMungu atsomene kutsibu abakaghalawa. Akatubwira ati tumusabe busana n’ebyosi ebikatulitohera omo bwenge.

    Terikola kino: Ukondoghole emyatsi eyikaleka iwahangya-hangya. Neryo usabe oMungu busana n’emyatsi eyo. Omu musabe utondoghole emyatsi eyo mo mughuma-mughuma n’erimusaba oMungu y’obuwatikya obwerikindayo.

 Oko mwatsi w’erilwa n’erihangya-hangya, eBiblia siyiritwirira okwituhana lisa, yikatulagha yiti omo biro bikasa ebiri hakuhi, erihangya-hangya eryo tulinalyo munabwire lyasyahwa kera na kera. Ekyo kyasyahika kiti?

 OBwami bw’oMungu wbwasyabughaho ebikaletera erihangya-hangya. (Eribisulirwa 21:4) Kwenene, omo butabali bw’oBwami obo, emyatsi eyikaletera erihangya-hangya n’eriluha omo bwenge siyendisyasyibukwa nibya.—Isaya 65:17.

 Ebyo by’ebiro ebikasa ebyo “oMungu w’obuholo” akakusunzira. (Abanya Roma 16:20, NTN62) Akatulagha ati: “Nyinasi amalengekania ago ngalengekanaya busana nenyu, amalengekania w’obuholo, si w’ekibi, eribaha amaha oko biro byenyu ebikasa.”—Yeremia 29:11.