Ekiro 19 Omwisi 5, 2022, abakuku-bakulu be ONU abalengire oko 75 mubabughire bati “akalyo kalwe ikabiritsuka eribula omo kihugho busana n’ekihunzo kye KORONA n’eribinduka ly’obutuku; nikwa rero enzala yikendibya omo kihugho kyosi busana n’amalwa we Ukraine.” Enyuma waho, Egazeti The Economist muyabugha yiti “Busana n’amalwa, ekihugho ekyabiribya n’amaligho mangyi, kandi kikendisyasyabyamo n’abandu bangyi abakwire enzala.” EBiblia muyabugha kera ngoko, oko mughulu wetu ono, eribula akalyo lyasyabya omo kihugho. Aliwe kandi yikatuha obuwatikya obo tulaghireko omo mughulu ngoyo.

•    Obuminyereri bwa Yesu: “Ekihanda kyasyalwa nʼekindi kihanda, nʼobwami bwasyalwa nʼobundi bwami, kandi hasyabya esyonzala.”​—Matayo 24:7.

•    Ekitabu eky’omo Biblia eky’Eribisulirwa kikakanaya oko bandu bani abakaghenda oko syosabayiri. Omughuma wa kubo akasosekanaya amalwa. Anakwamirwe n’oghundi oyukasosekanaya enzala, omughulu kikendisyakala eribana akalyo n’abandu basyabya bakateka esyofranga nene eribanako. “Monalangira . . . esabayĩrĩ eyĩkĩnĩre. Nʼoyo wĩkere kuyo iniawite olulengero omo byala biwe. Kandi monowa owali nga mulenge . . . ati, ‘Akalengĩ kaguma kʼengano busana nʼesyofranka ĩkũmĩ, nʼotũlengĩ tusatu twʼekisusu busana nʼesyofranka ĩkũmĩ.’”​—Eribisulirwa 6:5, 6.

 Amaminyereri w’eBiblia awakakanaya oko kalyo eribula anemubererera omo biro bino ebyo eBiblia yikahulamo “biro byʼenduli.” (2 Timoteo 3:1, nwt) Eriminya bingyi oko ‘biro byʼenduli’ n’oko balume bani abikere oko syosabayiri abakanibweko omo kitabu ky’Eribisulirwa, lebaya evideo Ulimwengu Umebadilika Tangu Mwaka wa 1914 n’erisoma omwatsi “Wale Wapanda-Farasi Ine​—Ni Nani?”

•    EBiblia ikabanikamo amahano awatolere awanganatuwatikya omughulu twamayeya omo mibere eyikalire, ng’eripanda ly’ebeyi y’akalyo kutse esyongala. Langira eby’erileberyako ebiri omo mwatsi “Wangakola ghuti wamabibya n’esyofranga nge?”

•    Kandi eBiblia ikatuha amaha ngoko emyatsi yikendyuwana. Ikatulagha ngoko hakasyabya omughulu “Engano [yasyabyaho] nene omo kihugo” n’abuli mundu akendisyabya n’akalyo akatosire. (Esyonyimbo 72:16) Eriminya bingyi oko maha w’ebiro ebikasa awakabanika omo Biblia kandi nga twangayiketeragho busanaki, soma omwatsi “Eriyiketera ly’ekwenene ly’ebiro ebikasa ebyuwene.”