Niki kyo kikasa omo malengekania waghu omughulu ukowa ekinywa “apocalypse?” Wanganalengekania uti ni bitsinduli, kutse omwiso w’engebe oko kihugho. N’abandi bakaligha ebyo omughulu bakowa emyatsi mingyi ng’eno:

•   Kinatokekene ihasyabya “amalwa w’enucleere (w’esyo bombe nene-nene). Alinga akasyatsuka omwiyiririra kutse alinga butsira eriyiririra kutse kandi alinga busana n’esyongulu sy’amabehi.​—Bulletin of the Atomic Scientists.

•   “Omo myaka ikumi eyamabilaba mohalabire embula eyiri mwekihunga kinene, omuliro erihisya emisitu (oluhindi), omwisi munene, ekihuhania, n’esyonyusi eriturira omo biharo.”​—National Geographic.

•   “Ebikonga kutse ebituta (criquets) ni bingyi omo afrika, kandi lino bikatsandaya kutsibu kulenga emyaka mingyi eyabirilaba.”​—The Associated Press.

 Ekihugho kinemwendisyahwaho erilabira ebitsinduli? EBiblia ikabugha yitiki oko mwatsi oyo?

 Iyehe. Ekinywa ky’oMungu eBiblia kiti ekihugho kyasyabyaho kera na kera. (Omugambuli 1:4) Omo mwanya w’eribughaho ekihugho, oMungu akendisyatoghotya abakatsandaya ekihugho. (Eribisulirwa 11:18)

 Ebiblia ikabugha yiti ekihugho ekikendisyatoghotibwa b’abandu abatakengire Yehova, abatekola erisonda liwe. Ngoko anakola oko mughulu wa Noa, kandi kw’anemwendisyakola atya eribughaho abosi abatamusikirye n’erimukenga.​—2 Petero 2:5; 3:7

 Omo 1 Yoane 2:17 eBiblia ikabugha yiti, “Ekihugho kikalaba n’esyongumbu syakyo.” Erisako lino likakanganaya ngoko Yehova akendisyabughaho ekihugho butsira ekitaka, nibughambu abandu abatanzire erikola erisonda ly’oMungu.

 EBiblia siyiribugha omwiso ng’akendisyahika mughulu wahi. (Matayo 24:36) Aliwe, ikabugha yiti omwiso ali hakuhi. EBiblia yabiribugha embere ngoko hane emyatsi eyikasyabya embere omwiso ahike. Emyatsi eyo yeno:

•   Hakendisyabya amalwa, enzala, esyondwala kutse ebihunzo, n’emisiki ehandi n’ehandi. Matayo 24:3, 7, 14, Luka 21:10, 11; Eribisulirwa 6:1-8.

•   Abandu bangyi bakasyabya n’eriyanza kutsibu. Eky’erileberyako, bakasyabya bandu abanzire esyofranga syo kutsibu, abate nʼewasingya, kandi abatetsomana.”​—2 Timoteo 3:1-5.

 Abandu bangyi banalighire ngoko eritsuka oko mwaka we 1914 emyatsi eyikalaba omo kihugho mo lino ihambene n’ebyo eBiblia yabugha embere, neryo ebyo bikakanganaya ngoko omwiso ali hakuhi-kuhi. Wamasonda eriminya bingyi oko mwatsi oyo lebaya omwatsi “Ekronolojia eyiri omo Biblia yihambene yiti n’omwaka 1914? Kandi ni biminyisyo byahi ebikakanganaya ngoko tuli omo biro by’enduli, kutse omughulu w’omwiso?”

 Ekinywa ky’ekigiriki ekikabindulawamo “apocalypse” kikasonda eribugha kiti “erisukula,” kutse “eribisulirwa mwatsi mulebe.” Kangyi-kangyi kikakolesibawa oko myatsi eyabya iyibiseme. EBiblia ikakanaya okw’ibisulwa ly’oMwami Yesu ngoko yuwite obutoki bw’eribughaho obubi oko kihugho n’erihemba abosi abakaramaya Yehova​—2 Tesalonika 1:6, 7; 1 Petero 1:7, 13.

 Ekitabu ky’omwiso ekiri omo Biblia kikahulawamo A·po·kaʹly·psis, kutse Eribisulirwa, kundi kikabisula emyatsi eyikasyabya omo biro ebikasa. (Eribisulirwa 1:1) Ekitabu ekyo kirimo engulu mbuya n’omulaghe w’amaha. (Eribisulirwa 1:3) Kikakanganaya ngoko oMungu akasyabughaho obubi bosi n’eriyira ekihugho kyosi mo paradiso. Oko mughulu oyo abandu sibendisyasyaghalwa, sibendisyasyowa obulumi kandi sibendisyasyahola.​—Eribisulirwa 21:3, 4.

 Unanzire eriminya bingyi oko syondaghane nyibuya esyo eBiblia yabirilagha? Abimiri ba Yehova banganakuwatikya erigha eBiblia butsira eriliha. Kyanganuwana erisungana nabo.