Naghu uli mughuma w’oko mamiliyoni w’abandu abakaghalawa busana n’obutuku eribinduka? Obutuku eribinduka kikaluiramo myatsi mingyi ng’erighunga ly’amaghetse n’ebihunga ebinene-binene ebikatsandaya. Embula nene yanganaleka esyongwangwa isyatwika, ebihunga eryasa oko syongetse byanganabya mwamatuku eripalya neryo inyatsukisya oluhindi ulukatimaya emisitu. Eryuba eryaka kutsibu, ekihuhania kinene n’ekihunga ky’esyonzururu byanganatsandya.

 Omo biharo binene, ebitsinduli ebikaletawa n’eribinduka ly’obutuku binemulola embere erikala n’erikanyirira. Ekitunga ekikahulawamo Fédération internationale des Sociétés de la Croix-Rouge et du Croissant-Rouge kikabugha kiti: “Emighanzo y’abandu abakahikirawa n’ebitsinduli yinemukanyirira. Obuli mwaka, abandu bangyi banemuhola n’amamiliyoni w’abandi bandu banemuhuma omo biharo byabo busana n’erikanyirira ly’ebihunga binene-binene, amaghetse eribwagha n’omwisi erikola kutsibu.”

 Emyatsi eyiri ng’eyo yikabya yabahikira, abandu banene bakaluha omo bwenge n’erighalwa kinya-mubiri. Bakaghalawa omo mutima busana n’eriherya ebindu byabo, amanyumba wabo kutse abandu abo banzire.

 Naghu wamabya ighunemughalwa busana n’ebikaluira omwibinduka ly’obutuku, eBiblia yanganakuwatikya. Yikakiranaya, iyakuha amaha n’amahano awatolere aw’abiriwatikya abandu banene abahikirawa n’ebitsinduli. (Abanya Roma 15:4) Kandi eBiblia ikasubiraya n’oko wandi mabulyo mangyi awakakenderaya abandu ng’ano: Busanaki oMungu mwakalighira omwatsi oyo anihikire? Alwe akasonda erinisuyira kwehi?

 EBiblia ikabugha yiti oMungu yuteleta amaligho awakahikira abandu. Yikakanganaya ndeke-ndeke ngoko “oMungu sialitoka erirengwako nʼekibi, kandi sialirenga oko mundu.” (Yakobo 1:13) Ekyo nibughambu yuteleka obutuku ibwabinduka kutsibu n’erileka abandu ibaghalwa munabwire.

 Ni kwenene eBiblia ikanakanaya oko mighulu eyo oMungu mwakolesya akaghala k’obuhangwa akasuyira abandu babi. Aliwe emyatsi eyo yiri mbaghane n’ebitsinduli bya munabwire kundi ibyo bikasa kitsumbukirania n’erita abandu abuwene n’ababi kutya. Kandi emyatsi eyiri omo Biblia yikakanganaya ngoko, oMungu iye abya akateya abandu abuwene, inyakatsuka erilaghira abandu n’eribwirabo ekikendileka inyatsandyabo. Eky’erileberyako, oMungu mwabugha ekikendileka inyatsandya ekihugho Omwighunga ly’amaghetse oko mughulu wa Noa, mwalagha abandu embere sy’eritoghotyabo kandi mwateya Noa n’ekihanda kiwe.—Enzuko 6:13; 2 Petero 2:5.

 Wamasonda eriminya ebikaleka itwabugha tuti oMungu yuteleta ebitsinduli ebikahika oko biro bino, usome omwatsi “EBiblia ikabugha yitiki oko bitsinduli?”

 EBiblia ikabugha yiti Yehova a ni Mungu oyututsomene kandi oyukayihira omo mwanya wetu. Langira amasako malebe aw’akakiranaya.

•   Isaya 63:9: “Omo malige wabo gosi naye [oMungu] mwagalwa.”

   Nibughambu: Yehova akaghalawa omo mutima omughulu akalangira abandu bakaghalwa.

•   1 Petero 5:7: “Akabategaya.”

   Nibughambu: Yehova atutsomene kutsibu. Anzire itwabya itune ndeke.

 Olwanzo n’eritsomana lya Yehova bikamukuna erikola. Akatukiranaya erilabira eBiblia eyikabanikamo amahano aw’atolere n’amaha ngoko omo biro ebikasa obutuku sibwendisyasyabinduka n’ahake.—2 Abanya Korinto 1:3, 4.

 EBiblia yiti Yehova akalagha ‘erituha amaha oko biro byetu ebikasa.’ (Yeremia 29:11) Anzire abandu ibabya oko kihugho ko kera na kera ibanatsemire omo paradiso isihakiri erisagha obutuku eribinduka kutsibu.—Enzuko 1:28; 2:15; Isaya 32:18.

 OMungu akendisyakola ekyo erilabira oBwami bwiwe, obutabali obukasondolawa na Yesu inyane omo lubula. (Matayo 6:10) Yesu anawite amenge obutoki obw’erikakirya akaghala ak’omo buhangwa. Omughulu abya oko kihugho, Yesu mwakangania ngoko anawite obutoki bw’erikakirya obutuku. (Mariko 4:37-41) Akendisyatabala n’amenge kandi asy’abya nʼeriminya. Akendisyakangirirya abandu ngoko bangasugha ndeke ekihugho n’erikala kukyo butsira eritsandyakyo. (Isaya 11:2) Omo butabali bwiwe abandu sibendisyasyaghalwa busana n’obutuku eribinduka kutsibu.

 Wanganayibulya uti, ‘Yesu asyakolesya akaghala kiwe mughulu wahi erikakirya obutuku eribinduka kutsibu?’ Eribana ekisubiryo oko ribulyo eryo, usome omwatsi “Obwami bw’oMungu bukendisyatabala oko kihugho ko mughulu wahi?”

 Amahano w’eBiblia anganakuwatikya embere obutuku bubinduke, omughulu bwamabinduka n’enyuma waho.

•   Embere obutuku bubinduke: Uyiteghekanaye erikola bula.

   Erihano ry’eBiblia: “Omundu mugerekania amalangira ebibi akayibisa;

  Nikwa abakiru bakatwangana ibahutala busana nabyo.”—Emisyo 22:3.

   Nibughambu: Ulengekanaye oko kibi ekyanganahika n’oko ekyo wangakola eriteya ekihanda kyaghu kyo luba.

   Ekyalolawako: “Omughulu babugha ambu tutibite busana n’oluhindi olwasira omo musitu, twabya itwabiriyiteghekania. Twabya itune n’akasagho akalimo ehindu ehyo twangakolesya luba-luba, n’esyodawa, n’esyongyimba. Abandu babya ibabirihandabuka kutsibu bakabula nga bayire bati. Aliwe itwe itune n’ebyosi ebyo tulaghireko. Ngasima Yehova busana n’ekyo!”—Tamara owe Californie, États-Unis.

•   Omughulu obutuku bwamabinduka: Uminye eky’omughaso munene.

   Erihano ry’eBiblia: “Kusangwa engebe yʼomundu si busana nʼobungi bwʼebindu biwe.”—Luka 12:15.

   Nibughambu: Engebe yaghu ni y’omughaso munene kulenga ebindu.

   Ekyalolawako: “Omughulu ekihunga kinene ekyahulawamo Typhon Lawin b kyatsandaya enyumba yetu, munabula nga niyire niti. Ekyo nakola ry’erisaba Yehova Mungu erilua oko mutima. Mwaniwatikya erilangira ngoko ebyo tukaheraya by’ebindu by’ekinya-mubiri butsira esyongebe syetu.”—Leslie owe Philippines.

•   Enyuma w’obutuku eribinduka: ubye ukalengekania oko bya munabwire, uleke erihangya-hangya busana n’engyakya.

   Erihano ry’eBiblia: “Neryo simuyiluhaye nʼamaganiryo busana nʼomo ngyakya; kusangwa engyakya yasyabya nʼamaganiryo wayo.”—Matayo 6:34.

   Nibughambu: Isiwahangahangaya kutsibu busana n’emyatsi eyangahika omo biro ebikasa.

   Ekyalolawako: “Ekihunga kinene ekyahulawa mo Irma kyabere kyatsandya enyumba yaghe, mukyanisaba eriyisogha omo nzira nyingyi esyo nabya isindinatayisoghamo. Nabya inabirihangya-hangya kutsibu. Munayikasa erikolesya erihano ry’eBiblia ery’erilengekenia oko munabwire kulenga kw’erihangya-hangya busana n’engyakya. Yehova mwaniwatikya kutsibu. Munatoka erisogha ndeke esyombanza nyingyi kulenga ngoko nabya ngalengekania.”—Sally, owe Florida, États-Unis.

 Eribana awandi mahano awatolere, wanganasoma omwatsi “Ebyangakuwatikya eriteya engebe yaghu omughulu hamabya ekitsinduli.”