Langira ebyo bakabugha oko bakulu b’ebisomo abakumayire kutsibu ebilebirye amalwa we Ukraine:

•   “Umukulu w’ekisomo kye Orthodoxe omo Burusi, oyukahulawamo Patriarche Cyrille, mwatitabugha kinywa ky’erihayira Oburusi omughulu bwingira kinya-maka omo Ukraine. . . . Ekisomo kiwe kinemulola embere eribugha amabehi oko Ukraine neryo Putin anemuyihambulisania omo mabehi ayo erilolya amalwa wiwe w’embere omo Ukraine.”—Esyongulu sy’ekiro 7 Omwisi 3, 2022, esy’abakasosotaya emyatsi ab’omo Bughuma bw’Ebuyala.

•   “Patriarche Cyrille . . . mwimira Oburusi eribambira kinya-maka e Ukraine. Mwabugha ati amalwa ayo atolere kundi akawatikaya erikyinda ekibi.”—, Esyongulu sy’ekiro 8 Omwisi 3, 2022, erilua oko Associated Press.

•   “Omo kiro kye Kwanza, omukulu w’ekisomo kye Orthodoxe kye Ukraine oyukahulawamo Métropolite Épiphane I owe Kiev, mwabugha ati abandu biwe batsumulawe kundi ‘banemulwa n’abasuda babandi ab’eBurusi’ . . . Kandi mwatomekako ati erita abasuda b’eBurusi silolo.”—Esyongulu esy’ekiro 16 Omwisi 3, 2022, erilua omo gazeti eye Jerusalem Post.

•   “Itwe [UCCRO (Obughuma bw’ebisomo bye Ukraine)] tukimira Abasuda abe Ukraine n’abosi abakatulwirako. Tukabasabira oko Mungu tuti abatsumule kabayikasa eritulwirako oko nzighu eyikasonda erinyegha ekihugho kye Ukraine.”—Ebinywa ebye UCCRO a, Ekiro 24 Omwisi 2, 2022.

 Ukalengekanayaki oko mwatsi oyo? Ebisomo ebikabugha biti bikakwama olughobe lwa Yesu Kristo binatolere erikuna abandu babyo eriya omo malwa? EBiblia ikabughaki oko mwatsi oyo?

Eritsuka kera ebisomo bikayingiraya omo malwa

 Eritsuka kera ebisomo bikimira amalwa biti sikibi eriya mugho, kandi biti nibya ni ky’omughaso erikola amalwa kandi ibinemuyihalamba biti bikawatikaya okwileta obuholo. Omo myaka mingyi, Abimiri ba Yehova babiriwatikya abandu erilangira ngoko ebisomo ni bitebya. Langira emyatsi milebe eyikabanika omo bitabu byetu.

•   Omwatsi “Abandu mubatebibwa erikola amalwa w’ekwazade” mwakangania ngoko Ekisomo ky’Ekikatoliki kye Roma mukyakola amalwa aw’ita abandu banene kutsibu omo rina ly’oMungu na Yesu.

•   Omwatsi “Ekisomo ky’Ekikatoliki omo Afrika” akakanganaya ngoko ebisomo byabiritaluka eribugha amalwa w’ebihanda.

•   Emyatsi ““Ebisomo bine k’olubanza kwehi?,” “Emyatsi eyo ebisomo bikakola omo malwa,” “Ebisomo mubimira amalwa” yikakanganaya ngoko abakulu b’ekisomo kye Kikatoliki, ekye Orthodoxe, n’eky’Abahorobe, mubimira esyombande syosi omo malwa mangyi.

Ebisomo by’Ekikristo binatolere erimira amalwa?

 Ebyo Yesu akangiriraya: “Wanze mulikyenyu ngoko uyanzire.” (Matayo 22:39) “Mwanze esyonzigu syenyu.”—Matayo 5:44-47.

 Ebyo Yesu akangiriraya: “Obwami bwage si bwʼekihugo kino. Kumbe obwami bwage bulwe bwʼekihugo kino, kumbe abagombe bage bangalwa isinangahoterwa.” (Yoane 18:36) “Abosi abakawata oko muyali, basyahera omo muyali.”—Matayo 26:47-52.

 Terilengekania: Abakristo bamabya isibabya n’ehamuli y’erilwa nibya busana n’eriteya Yesu, neryo ukalengekanaya uti lino banganalwa busana n’oghundi mwatsi kwehi? Usome omwatsi “Ubukristo bukanimira amalwa?” erilangira ngoko Abakristo b’erimbere mubakwama butaleghula eky’erileberyako kya Yesu n’amakangirirya wiwe.

Ekyasyahikira ebisomo ebikimira amalwa

 EBiblia ikabugha yiti oMungu aponire ebisomo ebikayihalamba biti bikakwama olughobe lwa Yesu, aliwe isibirikolesaya amakangirirya wiwe.—Matayo 7:21-23; Tito 1:16.

•   Ekitabu ky’Eribisulirwa kikabugha kiti oMungu ati ebisomo ebyo biri n’olubanza l’omusasi “wʼabosi abitawa omo kihugo.” (Eribisulirwa 18:21, 24) Eriminya ekikaleka eBiblia iyabugha yitya, usome omwatsi “Babeli Mukulu nindi?”

•   Yesu mwakangania ngoko ebisomo byosi ebyo Mungu aponire by’asyatoghotibwa busana b’emibírí yabyo mibi, ngoko omuti owakahetaya ebighuma ebituwene “akakondawa nʼeriguswa omo muliro.” (Matayo 7:15-20) Usome omwatsi “Ebisomo by’amabehi bili oko nduli!” eriminya omwatsi oyo ngoko akendisyabya.

Abyalyatulebeka esyopitsa, erilwa oko luhande lw’amalembe eriya oko lw’amale: Sefa Karacan/Anadolu Agency/Getty Images; Maxym Marusenko/NurPhoto via Getty Images