Omo kihugho kyosi, abandu bangyi abakabugha bati ni bigha ba Yesu Kristo babiriyingirya omo politike mo kutsibu. Abandu abo bakanimira omundu mulebe w’epolitike kutse ekitongole kilebe ky’ekipolitike bakasonda erikumaghirya ebyo bikirirye n’emighendere yabo. N’abandu b’epolitike nabo bakanabugha kangyi-kangyi oko myatsi eyilebirye emibere y’abandu n’erilagha abandu amaisa awuwene bakasonda abandu b’ebisomo babye oko luhande lwabo. Sikiriswekaya erilangira abakulu b’ebisomo bakasondekania ebitumbi by’ekipolitike. N’omo bihugho bilebe, ekisomo kilebe ekikayahulamo ky’eKikristo kyanganayirwa mo kisomo ky’Eleta.

 Uli n’amalengekania wahi oko mwatsi oyo? Abigha ba Yesu Kristo banatolere erikola oko myatsi y’epolitike? Wanganabana eky’erisubirya omwiyiteghererya eky’erileberyako kya Yesu. Mwabugha ati: “Nabiribaha ekiminyisyo, imwakola ngoko nabiribakolera.” (Yoane 13:15) Oko myatsi y’epolitike, Yesu mwatusighira eky’erileberyako kyahi?

 Iyehe. Yesu mwatakola oko myatsi y’epolitike y’ekihugho.

 Yesu mwatasondekania ekitumbi ky’ekipolitike. Mwaghana eribya musondoli w’amatabali w’abandu omughulu Sitani Diabolo abugha ati akendimuha “amami gosi w’ekihugo.” (Matayo 4:8-10) a Ekindi kiro, abandu mubalangira ngoko Yesu anganabya musondoli oyuwene, neryo mubasonda erimwingirya omo politike. EBiblia ikabugha yiti: “Yesu mwaminya kw’abandu babya bakasonda erihika n’erimuhamba n’amaka erimuyira mo mwami. Neryo mwaluaho mwaya oko kitwa iyowene.” (Yoane 6:15) Yesu mwatakola ekyo abandu babya banzire inyakola. Omo mwanya w’ekyo, mwaghana erikola oko myatsi y’epolitike.

 Yesu mwatabya oko luhande losi-losi omo myatsi y’epolitike. Eky’erileberyako, omo mughulu wa Yesu Abayahudi ibakayiponera eriliha ebitasi by’obutabali bw’eRoma kandi ibakabilangira ng’ikolerwa omo ritatunganene. Babere basonda eriminya Yesu ng’ali n’amalengekania wahi oko mwatsi oyo, mwatayingirya omo buhaka bw’erikangania ebitasi ebi nga bine omo nzira eyitunganene kutse iyehe. Mwababwira ati: “Mulihe Kaisari ebindu bya Kaisari, mulihe n’oMungu ebindu by’oMungu.” (Mariko 12:13-17) Mwatabya oko luhande lulebe omo myatsi y’epolitike aliwe kandi mwakangania ngoko ebitasi ebyo abakulu b’obutabali bw’eRoma bakasaba bitolere erilihwa. Oko ndambi ngumerera eyo, mwakangania ngoko erikenga obutabali bw’abandu linawite aho litwirirye. Omundu syangahere obutabali y’ebyo atolere eriha oMungu iye musa, ng’eriyiherera okw’iye n’eriramya.​—Matayo 4:10; 22:37, 38.

 Yesu mwimira obutabali bw’elubula ni bughambu oBwami bw’oMungu. (Luka 4:43) Mwatayingirya omo politike kundi abya inyanasi ngoko oBwami bw’oMungu bo bukendisyaberererya erisonda ly’oMungu oko kihugho butsira amatabali w’abandu. (Matayo 6:10) Mwaminya ngoko oBwami bw’oMungu sibwangakola erilabira amatabali w’abandu aliwe bukendisyalusya w’oho.​—Danieli 2:44.

 Iyehe. Abigha ba Yesu mubakwama ekyalayiro kiwe ky’eritendibya “b’ekihugo.” (Yoane 15:19) Mubakwama eky’erileberyako kiwe kandi mubayihighula oko myatsi y’epolitike y’ekihugho. (Yoane 17:16; 18:36) Omo mwanya w’erikola oko myatsi y’epolitike, mubakola omubírí ogho Yesu abasaba erikola, ni bughambu eritulira n’erikangirya abandi oko Bwami bw’oMungu.​—Matayo 28:18-20; Emíbírí 10:42.

 Oko Bakristo b’erimbere, ery’owa Yehova kyo kyabya kindu ky’omughaso munene omo ngebe yabo, aliwe kandi babya ibanasi ngoko litolere ibasikya abawite ehamuli. (Emíbírí 5:29; 1 Petero 2:13, 17) Ibakasikaya ebyalayiro n’eriliha ebitasi. (Abanya Roma 13:1, 7) Nomo mubatakola oko myatsi y’epolitike, aliwe mubabana endundi omo mibírí eyo amatabali abya akakola, kandi ibakanateghibawa n’emighambo eyo amatabali abya akahiraho.​—Emíbírí 25:10, 11; Abanya Filipi 1:7.

 EBiblia ikakanganaya ndeke-ndeke ngoko Yesu n’abigha biwe b’oko karne k’erimbere mubatayingirya omo myatsi y’epolitike. Busana n’ekyo, Abakristo Abimiri ba Yehova omo kihugho kyosi sibalibya n’ahake oko luhande losi-losi omo myatsi y’epolitike. Ng’Abakristo b’erimbere, bakakola omubírí ogho Yesu akabasaba erikola ni bughambu eritulaghania “Engulu Yowene y’obwami eyi.”​—Matayo 24:14.