Erikwa obuba bo kutsibu kyanganakuhutalya kinyamubiri n’omo mutima. Kyanganakolya n’oko myatsi mingyi eyikalire kutsibu kulenga n’omwatsi owakaleka iwakwa obuba.

•  Isiwahulikirira kutsibu esyongulu esituwene. Hali emyatsi milebe misa eyo litolere iwaminya oko buhanya bulebe. Erihulikirira kutsibu esyongulu sy’obuhanya likakanyaya omw’iwe mw’amalengekania w’eryubaha n’aw’eriherya amaha.

   Akanuni k’eBiblia: “Ekirimu ekibunikire kikumaya amakuha.”​—Emisyo 17:22.

   “Kyolobire omundu eribya mukobe w’erironda oko Enternete kw’esyongulu nyihya-nyihya kandi esikasisiraya, aliwe oyo ni mubere owang’itisya. Obuba bwaghe bukakeha kutsibu omughulu ngakehaya oko syongulu esyo ngakwama.”​—John.

   Eky’erilengekaniako: Wanzire kungahi eribya oko lughale oko bilebirye esyongulu sihya?

•  Isuwabindula eprograme yaghu. Wubye ukabuka, erilya akalyo, erikola emibírí y’obuli kiro, n’eriyato oko syondambi ngumerera esyo wabiriyihiriraho. Eribya n’eprograme kikendikuwatikya eritsemera engebe yaghu n’ekyo kikakehaya obuba bwaghu.

   Akanuni k’eBiblia: “Amalengekania w’ab’omuhwa akaleta bingi.”​—Emisyo 21:5.

   “Omughulu ekihunzo kye CORONA kyatsuka, munitasyatsomana eprograme yaghe yo n’ahake, neryo munahika okw’ibya ngalabya endambi nene omw’iyitsemesya. Munanza eritasyakutsa erikolesya endambi yaghe yo ndeke, neryo munayihiriraho eprograme y’emyatsi eyo nitolere erikola obuli kiro.”​—Joseph.

   Eky’erilengekaniako: Unawite eprograme eyikakuwatikaya erikola ebyo ukapanga erikola obuli kiro?

•  Uhire amalengekania oko myatsi eyuwene. Erilengekania buli oko ebituwene kandi ebyo utawite obutoki kubyo sikyuwene kandi kikakanyaya obuba bwaghu. Omo mwanya w’ekyo, iwaterilengekania oko myatsi ibiri kutse isatu eyo wangasimira.

   Akanuni k’eBiblia: “Mubye bandu b’ewasingya.”​—Abanya Kolosai 3:15.

   “Erisoma eBiblia kikaniwatikaya eritendihwererya amalengekania oko syongulu esituwene kandi kikaniwatikaya erilengekania oko myatsi eyuwene. Ekyo kyanganabya nga mwatsi mutya-mutya, aliwe kwenene kikawatikaya!”​—Lisa.

   Eky’erilengekaniako: Ukanalengekanaya kutsibu oko myatsi eyituwene eyikakuhikira omo ngebe n’eribirirwa ebyuwene ebikakuhikira?

•  Ulengekanaye oko bandi. Wamakwa obuba bunene, wanganasonda eriyihighula oko bandi n’eribya ighuwene. Omo mwanya w’erikola ekyo, ulengekanaye nga wangawatikya ghuti abali omo bwagha.

   Akanuni k’eBiblia: “Mutegaye ebindu by’abandi butsira erilwira ebyawe bisa.”​—Abanya Filipi 2:4.

   “Eriwatikya abandi kikanyiletera obutseme. Ngayikasa eribakolera omwatsi owakendibatsemesya, n’eryo naghe obuba bwaghe bukakeha ngakola ekyo. Eribugha ekwenene, sindikiyira n’endambi ey’erilengekania oko myatsi eyikaniletera obuba.”​—Maria.

   Eky’erilengekaniako: Oko bandu abo wasi, ni bahi bo bali omo bwagha bunene, kandi wangakolaki eribawatikya?

•  Ubye ighunakalire kinyamubiri. Ubye ukakalyakalya omubiri n’eriluhuka eritosire. Ubye ukalya akalyo akuwene. Eriyilandako kinyamubiri lyanganakuwatikya eribya n’amalengekania awuwene oko maisa n’erikuteya oko buba.

   Akanuni k’eBiblia: “Eriyikalya-kalya ly’omubiri liwite omugaso.”​—1 Timoteo 4:8.

   “Ingye na mughala waghe sitwangakalyakalya emibiri yetu ngoko twanzire twamayakalakalirya y’ehihya. Busana n’ekyo, twabiriyihiriraho eprograme y’erikalyakalirya emibiri yetu y’eka. Ekyo kikaleka itwayowa ndeke n’erikolerana n’olukogho.”​—Catherine.

   Eky’erilengekaniako: Wanganatasyuwania akalyo kaghu n’eprograme yaghu y’erikalyakalya omubiri utoke eribya ighunakalire?

 Nomo erikolesya emyatsi eyi lyabiriwatikya abandi erikehya obuba bwabo, abandu bangyi babiribana endundi omw’igha esyondaghane sy’eBiblia esy’eriyiketerwa esilebirye ebiro ebikasa. Lebaya omwatsi “Obwami b’oMungu bukendisyatukoleraki?”