Abandu bangyi, nibya n’abandu balebe abakayahulamo Bakristo, bakalengekanaya bati esyokanuni sy’emighendere esilebirye emyatsi y’engyingo n’endwa sisikiri oko butuku. Ebisomo bilebe byabiribindula amakangirirya wabyo awalebirye emighendere eyuwene n’eyituwene bikasonda eriyihira oko butuku. Esyokanuni sy’eBiblia esilebirye ekibi n’ekibuya sikinawite endundi kwehi? Ingaa. Omwatsi ono akakanganaya ekikaleka itwaminya ngoko sikinawite endundi.

 Abandu mubahangyikwa n’obwagha bw’eribya bakasondya obusondoli oko Muhangyiki wabo. EBiblia yibuyire yiti: “Siriri omwisi w’omundu oyukalendera erisondola olughendo luwe.” (Yeremia 10:23) Nomo Yehova a Mungu mwatuhangyika n’obutoki bw’eriyisogha, mwatatuha ehamuli kutse obutoki bw’eriyisombolera itw’ibenebene ekibi nga kyo kyahi n’ekibuya nga kyo kyahi. Busana n’ekyo, anzire itwayiketeriye.​—Emisyo 3:5.

 Tukabana obusondoli b’oMungu obulebirye emighendere omo Biblia. Tulebaye emyatsi ibiri eyikaleka esyokanuni esyo isyabya sy’omughaso munene.

•   OMungu yuwatuhangyika. (Esyonyimbo 100:3) Kundi yo Muhangyiki wetu, Yehova Mungu anasi ndeke ekyo tulaghireko tutoke eribya n’obutseme kandi itunakalire kinyamubiri, omo malengekania n’omo mutima. Kandi anasi ebyangatuhikira twamatendikwama obusondoli bwiwe obulebirye emighendere. (Abanya Galatia 6:7) N’akandi, Yehova akatusunzira ebibuya. Busana n’ekyo, eBiblia yikahula oMungu mo “oyukakukangiriraya ubane endundi, oyukakusondola omo nzira eyo wangalenderamo.”​—Isaya 48:17.

•   Esyongumbu syetu syanganatuherya. Abandu bangyi bakalengekanaya bati banganaminya ekibi n’ekibuya omw’ikwama omutima wabo​—esyongumbu syabo n’ebyo banzire kutsibu. Aliwe eBiblia yikabugha ngoko “omutima ni w’eriteba kwilaba emyatsi yosi, kandi alwere nabi.” (Yeremia 17:9) Omutima wetu amatendisondolwa n’amenge awakalua oko Mungu, inyakenditukuna erikola omo nzira eyikendisyaleka itwayikubya b’omo.​—Emisyo 28:26; Omugambuli 10:2.

 Iyehe! EBiblia yikakangiriraya ekwenene oko Mungu, ebikamutsemesaya n’ebitemutsemesaya. (1 Abanya Korinto 6:9-11; Abanya Galatia 5:19-23) OMungu anzire abandu bosi ibaminya ekwenene eyo. (1 Timoteo 2:3, 4) Abakulu b’ebisomo batolere ibakangirirya ekwenene y’eKinywa ky’oMungu kibuyirire.​—Tito 1:7-9.

 Abandu bangyi abatanzire erikwama esyokanuni sy’eBiblia sy’emighendere bakayisondera “abakangirirya ngoko esyo ngumbu syabo siri.” (2 Timoteo 4:3, NTN62) Aliwe, eKinywa ky’oMungu kirimo erikunga erikalire erikabugha liti: “Obulige ukwabo abakahula ebibi mo bibuya, n’ebibuya mo bibi.” (Isaya 5:20) Kwenene, oMungu akendisyatswera abasondoli b’ebisomo abatekangiriraya ndeke ebyo akabugha oko kibi n’ekibuya.

 Iyehe. Abanzire eritsemesya oMungu bakakwama eky’erileberyako kya Yesu Kristo n’amakangirirya wiwe. Mwakangirirya abigha biwe ati sibabye bakatswera abandi aliwe bakanganaye olwanzo n’erisikya abandu bosi.​—Matayo 5:43, 44; 7:1.

 Yesu mwakangirirya abigha biwe erikwama esyokanuni sy’oMungu sy’emighendere omo ngebe yabo yosi. Aliwe, mwakangiriryabo ngoko abandi bandu basyasombola erikwama awandi makangirirya. (Matayo 10:14) Yesu mwatalighira abigha biwe erikolesya emyatsi y’epolitike kutse eyindi nzira yosi-yosi y’erikasa abandu erisikya esyokanuni sy’oMungu.​—Yoane 17:14, 16; 18:36.

 Abakayikasa erikwama esyokanuni sy’oMungu esilebirye ekibi n’ekibuya bakabana endundi lino n’omo biro ebikasa. (Esyonyimbo 19:8, 11) Ebighuma byoko myatsi eyo bakabana bya bino:

•   Obutseme bunene.​—Emisyo 29:6.

•   Obwira obuwene haghuma n’oMungu.​—Emisyo 3:32.

•   Eriwatikibwa n’oMungu omo mighulu eyikalire.​—Emisyo 11:8.

•   Eriyiketera ly’erisyabana engebe y’erikota.​—Esyonyimbo 37:29.