Abandu hakuhi miliare tano bakendikwama Ekikombe ky’Ekihugho (Coupe du Monde) ye FIFA eyatsuka ekiro 20 Omwisi 11, 2022 erihika kiro 18 Omwisi 12, 2022. Abandu bangyi bakalengekanaya bati ebitsange ebyo byanganahira abandu b’omo bughuma kandi bati byanganaberererya n’eyindi myatsi.

•   “Amasata awite obutoki bw’eribindula ekihugho. Awite obutoki bw’erihira omo bandu m’omuhwa. Awite obutoki bw’erihira abandu b’omo bughuma omo nzira y’embaghane.”​—Nelson Mandela, omuprezida wa kera we Afika y’Endina.

•   “Amasata w’omupira . . . Akaletera amaha, akatuhira omo bughuma n’omo butseme, akatuhira m’omuhwa, olwanzo n’erileka itwabya n’omwatsi owakatuhira omo bughuma.”​—Gianni Infantino, omuprezida we FIFA. a

 Ekikombe ky’Ekihugho kutse ebindi bitsange byosi-byosi byanganaberererya emyatsi yosi eyo? Hane ekiro abandu basyabya omo bughuma n’eribya omo buholo?

 Omwaka ono, Ekikombe ky’Ekihugho mokikaleka abandu ibalengekania emyatsi mingyi. Omo mwanya w’erikania kuyo, bakatsuka erikania oko yindi myatsi, ng’emyatsi y’engebe n’emyatsi y’epolitike eyilebirye esyombangwa sy’abandu, akasololo busana n’erangyi y’engobi, n’eritendiyira oko syofranga omo lulengo lughumerera.

 Nomo bine, abandu bangyi babirilangira emyatsi y’amasata y’omo kihugho kyosi ng’Ekikombe ky’Ekihugho nga yikaleka abandu ibayitsemesya. Aliwe, nomo banzireyo kungahi, siyangabahira omo bughuma kera na kera. Omo mwanya w’ekyo, kangyi-kangyi ikabaghaba n’erileka ibabya n’emibere eyo eBiblia yabugha embere yiti abandu basyabya nayo omo mughulu owo ikahula mo “ebiro by’enyuma-nyuma.”​—2 Timoteo 3:1-5.

 EBiblia yikakanaya oko maha w’ekwenene w’erihira abandu b’omo bughuma omo kihugho kyosi. Yikalagha yiti abandu bosi omo kihugho basyabya omo bughuma erilabira obutabali bw’elubula obukahulawamo “oBwami bw’oMungu.”​—Luka 4:43; Matayo 6:10.

 Yesu kristo, Omwami w’oBwami obo, akasyahiraho buholo omo kihugho kyosi. EBiblia ikabugha yiti:

•   “Ekitunganene kikanye, n’obuholo bwasyabya bungyi.”​—Esyonyimbo 72:7.

•   “Asyalamya abera abakamulakira . . . Akalamayabo okwinuba n’obwagha.”​—Esyonyimbo 72:12, 14.

 Nibya munabwire, amakangirirya wa Yesu abirihira amamilioni w’abandu omo bughuma erilua omo bihugho 239. Babirigha erileka eripona abandi. Eriminya bingyi, usome emyatsi mbiriri-mbiriri omo myatsi eyiwite omutwe “Mambo ya Kufanya juu ya Kuachana na Chuki.”