Akatabu kaghuma ak’Abakatoliki [Catholic News Service] kakabugha kati omo kisomo ekyakoleka ekiro 25 oMwisi 3, 2022 omo basilique Saint-Pierre, ye Papa wa Roma oyukahulawamo François mwimana embere sy’esanamu ya Maria “amaliba ameso n’eryunamia omutwe akasaba kikutukutu.” Ye Papa wa Roma oyo “mwasaba Maria” ati alete obuholo. N’akandi katabu [Vatican News] kakatomekako kati “Ye Papa mwakasabira abandu b’omo kihugho kyosi, kutsibu-tsibu abandu b’omo Burusi ne Ukraine, n’eribaherera oko Mutima W’erire wa Maria.”

 Iwe, ukalengekanayaki? Kinatolere erisaba embere sy’esyosanamu kutse erikolesyasyo tukaramya? Langira ebyo Biblia ikabugha:

•   ‘Susyeyikokoteraya esanamu eyikahesawa, kutse ekisosekanio kyʼekindu nʼekiguma ekiri endata omo lubula, kutse ekiri eyikwa omo kihugo, kutse ebiri omo magetsi eyikwa oko kihugo. Susyunamirabyo kutse erikolerabyo; kusangwa ingye Yehova Mungu wawe, indi Mungu wʼobuha.’​—Eriluayo 20:4, 5. a

•   ‘Esyosanamu syabo sikahesawa omo bitsipa nʼesyamagetsi, omubiri wʼebyala byʼabandu. Siwite amuno, nikwa sisyetoka erisobola, nʼameso, nikwa sisyetoka erilangira. Siwite amatwi, nikwa sisyetoka eriowa, nʼesyonindo, nikwa sisyetoka eribeherwa. Siwite ebyala, nikwa sisyetoka erimata-mata, nʼebisando nikwa sisyetoka eribasula; sisyetoka eribugya omulenge. Abahesasyo, nʼabosi abakayiketerasyo, babye ngʼesyosanamu esyo bahesa!’​—Esyonyimbo 115:4-8.

•   ‘Ingye indi Yehova, eryo lyo lina lyage. Olukengerwa lwage sindiendihalo oko gundi, kutse eripipa lyage oko sanamu sibatsire.’—Isaya 42:8.

•   “Musage erisaba esyosanamu.”​—1 Abanya Korinto 10:14.

•   ‘Muyitegaye oko syosanamu.’​—1 Yoane 5:21.

 Eriminya bingyi oko ebyo eBible ikabugha oko syosanamu, usome omwatsi “Ekyo Biblia ikabugha oko syosanamu” kutse ukwame evideo Mungu analighire erikolesya esyosanamu tukaramya?

 Wangananza n’eriminya ebyo eBiblia ikabugha oko myatsi eno:

•   “EBiblia ikabughaki oko Bikira Maria?”

•   “Wanganasaba oko Bikira Maria?”

•   “Ebitiko-tiko n’erihulukirwa, ninabiminyikalo erilua oko Mungu?”

•   “Obuholo bunemwendisyabya oko kihugho?”

Esyopitsa ni sya: Vincenzo Pinto/AFP via Getty Images